O Concello celebrará o xoves, 14 de agosto, e o venres, día 15, a décima edición do seu ciclo Músicas Íntimas. O programa volve con varias novidades, a primeira en relación ao formato dos espectáculos e a segunda encanto á localización dos mesmos. Por un lado, ademais de música, esta convocatoria incluirá tamén espectáculos de danza previos aos concertos, ofrecendo así ao público asistente unha experiencia máis completa. Pola outra banda, as actividades levaranse a cabo no Campo da Feira de Carral.

A primeira proposta terá lugar o xoves, 14 de agosto, ás 20.30 horas. Compañía de Danza será a encargada de inaugurar o ciclo
con Un baile ceibe. Trátase dunha adaptación coreográfica de Ceibe, unha peza contemporánea de baile e música tradicional que afondará na relación entre o xénero e a nosa tradición. Ao longo do espectáculo, os bailadores convidarán ao público a reflexionar sobre as categorías de xénero e os estereotipos impostos socialmente para establecer distancia coa normatividade e construír novas formas de entender o corpo e o movemento.

Ese mesmo día, ás 21.00 horas, chegará Abril, un proxecto integrado por Claudia Abril (voz e percusións) e Marina Carpente
(violín e voz). Ambas as dúas interpretarán distintas melodías tradicionais galegas e ibéricas, adaptándoas ás sonoridades actuais
e cunha personalidade e frescura propias. No concerto soarán instrumentos como a pandeireta, o pandeiro ou o violín folk, dando
como resultado un repertorio que combinará a tradición e a modernidade.

Programa do venres

Analepsis, de Paula Quintas será a función de danza que inaugurará a xornada do venres, 15 de agosto (ás 20.30 horas).
Neste caso, trátase dun actuación de danza e circo na que se exporá unha historia de acción e reacción entre o corpo e o obxecto. Durante a mesma, o corpo verase sometido a diferentes experiencias acrobáticas e de funambulismo dirixidas polo obxecto.

O peche de Músicas Íntimas virá da man de SeKadra, un dúo galego-brasileiro formado a principios de 2022 e composto por
Arturo Rúa (teclados e sintetizadores) e Paulo Silva (batería, percusión e sintetizadores). O dueto ofrecerá un recital baseado na
música tradicional galega e con influencias da tradición escandinava, o jazz, a música flamenca e a brasileira. A pesar da
súa curta traxectoria, SeKadra actuou xa en numerosos escenarios, salas e teatros de España e participou tamén no festival alternativo de recente creación “Sons D’Ardora”. O seu concerto arrincará ás 21.00 horas.

A entrada é gratuíta. As persoas interesadas en asistir poderán obter máis información sobre as distintas propostas na páxina web
do Concello de Carral.

Branca Trigo Cabaleiro recibiu, esta tarde, o galardón que a acredita como vixésimo oitava gañadora do Premio de Poesía Concello de Carral. Coa súa obra Especies invasoras, a autora conquistou aos membros do xurado desta convocatoria, que elixiron o traballo de xeito unánime. A entrega levouse a cabo nun acto que serviu como broche de ouro para o certame carralés. Na cita presentouse, así mesmo, A pel do exilio, o traballo co que Silvia Penas Estévez venceu no ano 2024.

Á entrega acudiu o alcalde, Javier Gestal; membros do goberno e da corporación municipal do Concello de Carral; o director xeral de Cultura da Xunta de Galicia, Anxo Lorenzo; Armando Requeixo, membro do xurado nesta 28º edición; o poeta Anxo Mena e as vencedoras desta e da pasada edición, Branca Trigo Cabaleiro e Silvia Penas Estévez, respectivamente. O acto estivo conducido polo técnico de Cultura, Carlos Lorenzo.

Durante a súa intervención, o rexedor felicitou a ambas poetas, destacando que os seus traballos contribúen “a que Carral siga sendo un auténtico referente neste xénero”.

A cita incluíu a actuación O Ritual, a cargo de Constance Hurlé. Durante a mesma, a artista convidou ao público a formar parte dunha especie de cerimonia na que a poesía, a danzateatro e a bruxería se mesturaron.

O evento concluíu cun recitado de poemas do libro A pel do exilio por parte de Silvia Penas, así como coa sinatura de exemplares por parte da autora. 

Unha decisión unánime

Tras a avaliación de todas as obras presentadas, o xurado decidiu por unanimidade outorgar o premio a Especies invasoras. A obra gañadora foi eloxiada polo xurado como “un libro de poemas que explora de xeito radical a identidade, o desarraigo e a violencia estrutural”, facendo uso da metáfora da invasión biolóxica para abordar temas como o corpo, a casa e a memoria. Destacouse a súa estrutura fractal, a forza imaxinativa e a capacidade para fundir o íntimo e o colectivo nunha linguaxe poética profundamente innovadora e transgresora.

Unha voz transgresora

Branca Trigo Cabaleiro (Vigo, 1997) é poeta, editora e dinamizadora cultural. Codirixe Edicións Malafera, onde publicou os libros Coñecemento do Medo e trans0, así como varios fanzines. É tamén autora do poemario Condolore e participou en diversas publicacións colectivas como Alguén nos lembrará ou Gótico Urbano. Traballa na intersección entre poesía e outras artes a través de proxectos como Poetry Sniping: Simulacro, xunto a Pablo Rodríguez, ou accións en directo coa pintura de Ramón Trigo.

Tamén organiza o micro aberto Cerimonia de Gaivotas e coordina obradoiros de creación en distintos espazos culturais e educativos. Actualmente realiza a súa tese de doutoramento na Universidade de Vigo, centrada na monstruosidade queer dentro da poesía galega contemporánea.

Ademais da dotación económica por gañar o Premio de Poesía Concello de Carral, a obra de Branca Trigo pasará a engrosar a colección de poesía de Edicións Espiral Maior. Un ano máis, o certame carralés realizouse en colaboración coa Xunta de Galicia.