O Concello organiza, outro ano máis, unha nova edición do seu concurso Tapeando Carral, unha iniciativa coa que o goberno local busca un claro obxectivo: impulsar o consumo no tecido hostaleiro e dar a coñecer a ampla oferta do municipio antes da campaña do Nadal. 

A iniciativa levarase a cabo entre o xoves, 5 de decembro, e o domingo, día 8, e contará coa participación de 10 locais que farán as delicias do público asistente. 

O goberno local confía en que o certame acade unhas cifras de participación similares ás das edicións anteriores: “esperamos que a veciñanza volva a desfrutar deste certame e teña a mesma afluencia que nos últimos anos sendo esta medida, unha vez máis, un revulsivo para promover o consumo nos establecementos, dándolle así máis vida á nosa vila”. 

Nesta ocasión, o certame municipal contará coa participación dos seguintes negocios: Boca Grande, Pizzería Centro, Bar Tropezón, Bar Adolfo, Vinoteca A Taberna XXI, Dopincho, Terra, O Lareiras, A Parola e Costa da Egoa.

O concurso levarase a cabo entre o xoves, 5 de decembro, e o domingo, día 8. O xoves, as elaboracións dos participantes poderán degustarse desde 20:00 horas e o domingo, estarán dispoñibles de 12:30 a 15.30 horas. O venres e sábado, o público poderá probar as receitas en xornada de mañá en tarde, entre as 12.30 e as 15.30 horas e as 20.00 e as 23.00 horas. 

Como en anteriores edicións, haberá premios tanto para os locais participantes como para os propios comensais. Por unha banda, os establecementos poderán optar ao premio á Tapa Máis Popular (elixida polos propios clientes) e ao de Mellor Tapa (neste caso, será un xurado profesional o que outorgue o galardón). 

Pola outra, unha vez que o cliente acade un número mínimo de selos diferentes terá a posibilidade de facerse tamén con agasallos e recompensas. Neste caso, a persoa terá que cumprir o cupón cos diferentes selos e depositalo nas furnas que estarán situadas nos negocios.

Haberá un primeiro premio para as persoas participantes que teñan o 100% dos selos cumprimentados, un segundo premio para as persoas que teñan polo menos o 75% dos selos e un terceiro premio para as persoas participantes que teñan como mínimo o 50% dos selos. O sorteo terá lugar o 20 de decembro, ás 20:00 h.

O concurso, organizado polo Concello de Carral, realízase en colaboración coas empresas Estrella Galicia, Exclusivas Rivas Suárez, Jamones y Embutidos Elote e Bodegas As Laxas. 

Actividade subvencionada pola Deputación da Coruña

Desde consellería de Emprego, Comercio e Emigración da Xunta de Galicia informan que, por motivo da normativa de protección de datos, establécense restricións que imposibilitan o uso da pegada dixital nos puntos de información do Servizo Público de Emprego de Galicia, que desconectaranse proximamente.

Nas vindeiras datas acudirá persoal enviado pola AMTEGA para a súa retirada definitiva.

Carral inaugurará, esta semana, unha nova tempada de artes escénicas coa 11ª edición das súas Noites de Monólogo. O ciclo arrincará mañá, venres 13 de setembro, cunha primeira sesión a cargo de Xan Veiga. Vero Rilo e Santi Cribeiro tomarán a remuda a vindeira semana (venres, 20 de setembro) e Marta Doviro será a encargada de pechar a onceava edición o venres, 27 de setembro.

O primeiro monólogo será Que anos aqueles , de Xan Veiga. Ao longo do mesmo, o público embarcarase nunha viaxe ao pasado para lembrar as desventuras dun galego e para rememorar, así mesmo, costumes, ditos, xogos, cantigas, etc. O obxectivo de Veiga non será outro que facer reflexionar aos asistentes sobre se as cousas para os galegos cambiaron ou non con respecto a outras épocas.

Unha semana despois, Vero Rilo e Santi Cribeiro chegarán ao municipio con Tralalareira , un espectáculo no que a tradición oral e a música se mesturarán para revelar ao público historias de vida, de tradición e desas que se contaban arredor dunha lareira.

Marta Doviro será quen peche as Noites de Monólogo con Memorias dunha rapasa da costa . Nesta actuación falaranos sobre o seu propio periplo polas distintas vilas nas que viviu. Doviro valerase da comedia para retratar o carácter das súas xentes, vivencias e ata historias reais de piratas facendo, así mesmo, un paralelismo entre a realidade de Galicia e a hollywoodiense .

Todas as actuacións levaranse a cabo no local Xente Nova de Tabeaio ás 21.00 horas. O acceso aos espectáculos é libre ata completar aforo.

As Noites de Monólogo preséntanse como un dos eventos de maior traxectoria do municipio. Así, ao longo destas 11 edicións subiron ao escenario carralés artistas de renome como Luis Zahera, Evaristo Calvo, Sergio Pazos, Pedro Brandariz, Oswaldo Digón, Cándido Pazó ou Paula Carballeira, entre outros.