O Concello continúa ofrecendo unha ampla variedade de actividades deportivas durante os meses de verán. A oferta inclúe propostas para veciños e veciñas de todas as idades e pertencentes a distintas disciplinas. O Concello abrirá o luns, 14 de xullo, o prazo de inscrición para os seus cursos de natación de agosto e para o VIII Torneo de Pádel. Trátase de dúas iniciativas xa consolidadas e que reúnen, edición tras edición, a un gran número de persoas participantes.

Por unha banda, os cursos de natación de agosto contarán con 70 prazas para nenos e nenas de entre 3 e 15 anos, tendo preferencia aquelas persoas empadroadas no municipio. Os rapaces e rapazas estarán divididos en tres quendas en función das idades, comezando en primeiro lugar as clases para os máis maiores e rematando coas dos máis pequenos e pequenas. As sesións impartiranse entre as 11.45 e as 14.00 horas e terán unha duración de 45 minutos.

A inscrición poderá realizarse a través da sede electrónica ou, presencialmente, no rexistro municipal do Concello.

Torneo de Pádel

En canto ao VIII Torneo de Pádel, o Concello abrirá tamén o luns, día 14, o prazo de inscrición. As parellas que se anoten estarán divididas en función das idades, tendo un torneo escolar para aquelas entre 10 e 14 anos e un de adultos para as maiores de 15 anos.

O torneo de adultos consta de dúas categorías: a A, dirixida a xogadores/as dun nivel medio/alto, e a B, destinada ás parellas de nivel medio.

O torneo dará comezo o vindeiro 31 de xullo e prolongarase ata o 14 de setembro. Nas primeiras semanas disputarase unha fase de liguiña por grupos, da cal sairán as clasificacións para o cadro eliminatorio. Os partidos celebraranse en horario de tarde-noite, podendo modificarse os horarios sempre que haxa acordo entre as parellas enfrontadas.

O obxectivo desta competición é o fomento do deporte entre a poboación adulta, así como posibilitar a práctica de novas modalidades deportivas ás persoas habitantes de Carral. Por iso, a participación no torneo terá carácter gratuíto.

As persoas que necesiten máis información ou desexen tramitar a súa inscrición, poden facelo ata o 24 de xullo no Complexo Deportivo de Carral, no 678 338 847 ou a través do formulario web.

Carral despediu, esta semana, a súa terceira Liga de Pádel, na que se enfrontaron un total de 24 parellas divididas en dúas categorías: a A, para os xogadores máis avanzados, e a B, para os de nivel intermedio. Tras unha dura contenda, a parella formada por Marcos Sande e Samuel Ferreiro proclamouse campioa na clase A, mentres que Rodrigo Fuentes e Alejandro Sánchez fixeron o propio na B. O alcalde, Javier Gestal, fixo entrega dos trofeos aos campións e subcampións, aos que felicitou por “o esforzo realizado durante a competición”.

Na primeira fase da liga, disputada entre febreiro e maio, celebráronse un total de 62 encontros. A continuación, comezou a fase eliminatoria, na que se clasificaron as catro mellores parellas de cada grupo. A gran final tivo lugar o pasado xoves, saíndo dela dous campións e dous subcampións en cada categoría. Nas segundas posicións quedaron Santiago Rivera e David Lameiro (A) e Manuel Cortés e Raúl Varela (B).

O Concello abrirá, proximamente, o prazo de inscrición para o Torneo de Pádel de Verán. A actividade dará comezo a mediados de xullo e prolongarase ata a metade de setembro.

Carral deu, esta semana, o pistoletazo de saída aos seus campamentos deportivos de verán. Trátase dunha actividade coa que o goberno local busca un dobre obxectivo: por unha banda, promover a conciliación da vida laboral e familiar dos veciños e veciñas durante a época estival e, pola outra, dar a coñecer aos pequenos e pequenas as distintas modalidades deportivas que se practican no municipio. Ao longo das dez semanas de duración do programa, tomarán parte nas actividades preto de 200 nenos e nenas.

As propostas levaranse a cabo nas instalacións do CEIP Plurilingüe Vicente Otero Valcárcel e no pavillón deportivo. Ademais das iniciativas que celebrarán nestas dependencias, os e as participantes gozarán tamén de visitas ás distintas instalacións deportivas municipais, así como a espazos naturais do concello, saídas á praia e excursións a diferentes recintos culturais e deportivos de concellos limítrofes.

Os campamentos deportivos realizaranse en diferentes quendas, prolongándose ata o 29 de agosto. Máis aló das propias actividades, o Concello ofreceu ás familias solicitantes a posibilidade de dispor dos servizos de madrugadores e comedor, garantindo así un maior horario de atención para os cativos e cativas.

O Concello de Carral resultou beneficiario da subvención solicitada á Consellería de Política Social e Igualdade.

Orde do 3 de xaneiro de 2025 pola que se establecen as bases reguladoras das subvencións ás entidades locais da Comunidade Autónoma de Galicia para a promoción da igualdade, de forma individual e mediante o sistema de xestión compartida, cofinanciadas parcialmente pola Unión Europea no marco do programa FSE+ Galicia 2021-2027, e se procede á súa convocatoria para o ano 2025 (códigos de procedemento SI436A, SI435A e SI427B).

Este programa está financiado pola Consellería de Política Social e Igualdade e polo Ministerio de Igualdade.