O alcalde propoñerá destinar 800.000 euros do remanente a desbloquear “proxectos estratéxicos” para Carral
O alcalde, José Luis Fernández Mouriño, propoñerá no pleno ordinario de mañá, xoves 30 de xullo, destinar preto de 800.000 euros do remanente de tesourería a impulsar novos proxectos “estratéxicos” para Carral. A proposta, que ascende a 781.660,30 euros, contempla a adquisición de varias parcelas, a compra de equipamento para o Complexo Deportivo de Carral e a redacción de proxectos de futuras actuacións. A relación inclúe, entre outras, a compra dunha parcela en Paleo para a construción do futuro centro de saúde. O rexedor incide na importancia desta iniciativa, que supoñerá “dar ou primeiro paso para desbloquear proxectos fundamentais para ou futuro do municipio como, por exemplo, a construción do novo centro de saúde ou a execución dá nova estación depuradora de augas residuais do Quenllo”.
Unha parte importante do remanente destinarase á adquisición de terreos en distintas parroquias do municipio co obxectivo de avanzar en proxectos de interese público. En concreto, o Concello prevé incorporar 280.738,14 euros para a compra dun terreo en Paleo que se destinaría á construción do futuro centro de saúde. Así mesmo, proponse a adquisición dunha parcela en Tabeaio (38.940,70 euros), doutra en Sergude (24.415,85 euros) para a creación de novos equipamentos públicos, así como dunha terceira para ampliar a área recreativa da Brexa (3.566,50 euros). A proposta inclúe tamén 15.210,20 euros para a compra dunha carballeira centenaria en Cañás.
A modificación de crédito reserva igualmente 124.938,91 euros para a renovación de maquinaria e equipamento no Complexo Deportivo de Carral. Ademais, incorpora financiamento para a redacción de varios proxectos que o primeiro edil cualifica de “prioritarios”: 60.000 euros para elaborar as actuacións que o Concello presentará ao POS 2027 da Deputación da Coruña e 223.850 euros para a redacción do proxecto da futura estación depuradora de augas residuais (EDAR) do Quenllo.
Novas actuacións
A modificación de crédito non será o único punto que se debaterá no pleno de mañá, senón que o goberno local expoñerá tamén a proposta de obras que se executarían con cargo ao POS Adicional 2.ª fase. O investimento provincial alcanzará os 434.901,63 euros, unha contía coa que o goberno local manterá o seu compromiso por reforzar e mellorar a seguridade viaria en varios puntos do municipio.
As intervencións previstas son as seguintes: mellora da pavimentación das beirarrúas da rúa Belvís, en Paleo (86.576,96 euros); renovación da capa de rodadura da estrada no lugar de Abrigosa (36.385,69 euros); mellora da capa de rodadura, a execución de cunetas de formigón e a canalización da rede de pluviais en Novás (280.954,15 euros) e a mellora da capa de rodadura e a construción de cunetas na rúa da Chousa (30.984,83 euros).
