Carral dispoñerá, proximamente, dunhas instalacións deportivas de “primeiro nivel”. Así o confirman tanto o alcalde, José Luis Fernández Mouriño, como o concelleiro de Deportes, Óscar Bodelo, avanzando a intención do Concello por renovar o equipamento do Complexo Deportivo. Para logralo, destinaranse 124.938,91 euros financiados con cargo ao remanente de tesourería. Esta actuación supoñerá o último paso dun proxecto de modernización que permitirá ofrecer unhas instalacións máis completas, modernas e adaptadas ao crecente número de usuarios e usuarias.

O concelleiro de Deportes destaca que o investimento permitirá a Carral “dispoñer dunhas instalacións para a práctica deportiva á altura do crecente interese existente en Carral e, sobre todo, do elevado número de usuarios e usuarias do Complexo”.

A actuación responde á necesidade de renovar unha maquinaria que presentaba un importante desgaste tras anos de uso intensivo. A contía destinarase para dotar o ximnasio de novas cintas de correr, bicicletas estáticas e de ciclo indoor, máquinas elípticas, remos, prensas, bancos de musculación, unha estación multifunción, equipamento de peso libre e material para adestramento funcional.

A compra do equipamento levarase a cabo despois de que o Concello aprobase en xullo unha modificación de crédito para dedicar uns 800.000 euros do remanente de tesourería a diferentes investimentos estratéxicos, entre elas a mellora do Complexo Deportivo.

Broche final

A adquisición do equipamento poñerá o broche a un ambicioso proxecto de renovación concluído en xullo. Os traballos supuxeron a ampliación do ximnasio en preto de 100 metros cadrados, a creación dunha nova sala para actividades dirixidas de 150 metros cadrados e a reorganización dos espazos para optimizar a súa funcionalidade. Así mesmo, renovouse integramente o sistema de iluminación mediante tecnoloxía LED, executáronse traballos de pintura e instalación de nova sinalización e vinilos e mellorouse a imaxe xeral do recinto.

O Concello de Carral, a través da Concellería de Deportes, celebrará o vindeiro domingo, 23 de agosto, a VII Festa da Auga, unha das citas máis esperadas do verán, que volverá converter as piscinas municipais nun gran espazo de lecer para nenos, nenas e familias.

A actividade desenvolverase entre as 16:00 e as 20:00 horas e ofrecerá unha completa programación de xogos e diversión acuática pensada para todos os públicos. Nesta sétima edición instalaranse dous hinchables acuáticos, entre eles un gran tobogán de auga, ademais dun hinchable específico para os máis pequenos, tamén acuático. A xornada completarase cunha Festa da Auga e unha Festa da Espuma.

Esta iniciativa ten como principal obxectivo promocionar o uso das instalacións deportivas municipais durante a tempada estival, fomentar hábitos de ocio saudable e ofrecer unha proposta lúdica para desfrutar en familia, converténdose tamén nunha ocasión especial para despedir o verán antes do remate da tempada das piscinas.

As persoas abonadas ás instalacións deportivas municipais poderán acceder gratuitamente á actividade. O resto de usuarios e usuarias poderá participar mediante o pagamento da entrada habitual da piscina, sen ningún custo adicional.

Co obxectivo de garantir a máxima seguridade, os hinchables estarán supervisados en todo momento por monitores especializados neste tipo de instalacións. Ademais, o recinto contará coa presenza permanente dunha ambulancia con dous técnicos sanitarios e reforzarase o servizo de socorrismo durante toda a actividade para ofrecer unha resposta inmediata ante calquera incidencia.

O Concello de Carral anima á veciñanza a participar nesta sétima edición da Festa da Auga, unha actividade xa consolidada no calendario estival municipal que combina diversión, convivencia e seguridade nun ambiente pensado para toda a familia.