A pasada semana tivo lugar a clausura das actividades do club de lectura de Carral deste curso 2018/2019.
O club de lectura, que comezou a súa andaina hai dous anos, forma parte das actividades desenvolvidas dende a Biblioteca Municipal e na actualidade está formado por quince participantes que se reúnen dúas veces ó mes.
Será no vindeiro mes de outubro cando retome a súa actividade con novas lecturas.
A Casa da Cultura de Carral acollerá este venres, ás 20:00 h, o acto do 22º Certame de Poesía Concello de Carral, no que se lle entregará o premio a Xurxo Alonso por gañar esta edición co seu libro En luz escrita, e no que tamén se presentará a publicación do libro gañador do ano pasado, As bicis de Xabier Cid.
O acto estará presidido polo alcalde en funcións José Luis Fernández Mouriño, e contará tamén coa participación do director xeral de Políticas Culturais, Anxo Lorenzo, do escritor e editor Miguel Anxo Fernán Vello, e de Inma Otero, membro do xurado da presente edición.
Teatro do Atlántico pechará o acto co espectáculo poético musical De abrentes e ocasos, facendo un percorrido por poemas dalgúns dos nosos autores e autoras galegas máis significativas, coa música en directo ao piano de Nani García.
Como en edicións anteriores deste premio, o Concello de Carral, grazas á colaboración da Xunta de Galicia, agasalla aos asistentes o libro que se presenta. Nesta ocasión Xabier Cid poderá dedicarllo aos participantes no acto.
Nesta semana tamén se están facendo os actos de entrega dos premios dos concurso escolar e xuvenil de poesía, no que se presentaron un total de 28 obras. Os actos estanse a facer nos centros de ensino, no que se premian os tres mellores poemas de cada categoría e no que se fai entrega a todos os participantes de agasallos consistentes en libros e discos cedidos pola Consellería de Cultura da Xunta de Galicia, a Deputación da Coruña e do propio Concello de Carral.
Xurxo Alonso, coa súa obra En luz escrita resultou gañador do Concurso de Poesía “Concello de Carral” do presente ano.
O xurado salienta neste poemario a súa sólida arquitectura, a forza intensional do conxunto e a admirable estratificación conceptual do discurso, inzado de citas, homenaxes e intertextualidades que entroncan este texto coa mellor tradición galega e foránea. Tamén si, o xurado destacou a singular voz poética que espella nun léxico celmoso, o perfilado de visopoemas que recrean unha moi particular e xenuína atmosfera luminosa e a concepción xeral do poemario como un mecano de magnífica orquestración sinfónica.
No ano 2004, Xurxo Alonso xa gañara este premio co libro Breviario de Aldemunde.
O xurado do concurso estivo formado por Inma Otero, Armando Requeixo e Xabier Cid, coa presidencia da Concelleira de Cultura, Margarita Ramilo Varela, e asistidos en calidade de secretario, polo técnico municipal de Cultura e coordinador do premio, Carlos Lorenzo Pérez. Ao certame presentáronse un total de 44 poemarios.
O premio de Carral está dotado con 2500 euros e a publicación da obra na colección de poesía de Edicións Espiral Maior.
Xurxo Alonso (Bos Aires, 1956) é pintor ademais de poeta. Licenciado en Bioloxía pola Universidade de Santiago de Compostela, formouse na súa faceta plástica nos obradoiros de importantes artistas como Josep Guinovart, Manuel Alcorlo, Bonifacio Alonso e Bruce McLean. No eido poético, Alonso ten obtido boa parte dos galardós máis importantes de Galicia: Francisco Añón (1998), Xoán de Requeixo (1999), Avelina Valladares (2000 e 2018), Feliciano Rolán (2001), Johán Carballeira (2001), Fermín Bouza Brey (2003), Concello de Marín (2007), Concello de Ourense (2016) e Díaz Castro (2018). O seu libro máis recente é No interior do vento, publicado por Edicións Fervenzas e que resultou gañador do Premio Avelina Valladares.
O acto de entrega do premio “Concello de Carral” terá lugar o 31 de maio, na Casa da Cultura de Carral, dentro da programación de Letras Galegas 2019. O mesmo acto servirá para a presentación do poemario que gañou na pasada edición, As bicis de Xabier Cid. Como remate a esta homenaxe á poesía, a compañía Teatro do Atlántico presentará o seu espectáculo poético De abrentes e ocasos.
Como ven sendo habitual nas últimas edicións, a Xunta de Galicia colabora co Concello de Carral, a través da Secretaría Xeral de Política Lingüística e da Dirección Xeral de Políticas Culturais para a publicación da obra premiada.
O departamento de Cultura do Concello ven de instalar en diversos puntos de Carral, paneis divulgativos sobre Antonio Fraguas Fraguas, importante persoeiro da cultura galega ao que se lle dedica este ano o Día das Letras Galegas.
Fraguas foi un dos principais investigadores nas áreas da historia, do folclore e da etnografía de Galicia. A súa obra é incontable e o seu activismo foi incansable, destacando como director do Museo do Pobo Galego, do que foi impulsor. En Carral o centro municipal de Formación leva o seu nome como recoñecemento á súa labor investigadora e divulgadora.
No mes das Letras Galegas. ademais dos paneis polas rúas, a Casa da Cultura acollerá unha exposición sobre Antón Fraguas, escolares de primaria e da ESO de Carral recibirán de agasallo da Concellería de Cultura exemplares dos libros Made in Galiza, de Sechu Sende, e O fillo do Rei e outros contos populares, e serán espectadores de Canta miña pedra canta a cargo de Xoán Curiel e Charo Pita, e de Language Planning de Os Quinquilláns.
O premio de poesía Concello de Carral é outro dos eventos importantes que se leva a cabo no marco das Letras Galegas. A vindeira semana o xurado elixirá a obra gañadora da 22ª edición do certame, facendo entrega do premio no acto que terá lugar o 31 de maio. O mesmo acto será o de presentación do libro As bicis, de Xabier Cid, gañador no 2018. Como colofón ao acto, actuará Teatro do Atlántico co seu espectáculo poético De abrentes e ocasos. Na mesma semana tamén terá lugar a entrega de premios e agasallos a todos os participantes dos concursos escolar e xuvenil de poesía.
É un completo programa de actividades que servirá para contribuír ao coñecemento da figura de Antón Fraguas e de promoción da nosa lingua e literatura.
Ao igual que en edicións anteriores, a Festa do Pan de Carral acollerá unha carpa para a campaña Libros Solidarios que organizan as Bibliotecas municipais, na que se poderá
facer o troco de libros por alimentos ou produtos de hixiene.
Durante case un mes numerosas persoas cederon libros para esta campaña, e na festa quen queira levar de balde algúns destes exemplares, poderao facer se cede produtos de alimentación non perecedeiros ou de hixiene persoal, que posteriormente serán xestionados polos Servizos Sociais municipais.
A carpa dos Libros Solidarios estará aberta de 11:00 a 14:00 h. e de 16:30 a 20:00 h.
Contacontos, agasallos, visitas, lecturas … durante este mes as bibliotecas do Concello de Carral celebran o día do libro cun montón de actividades para todas as idades.
Os nenos da escola infantil “A Galiña Azul” estiveron con nós o día do libro infantil. Visitaron a biblioteca e compartimos xogos e lecturas.
Para os alumnos de infantil do CEIP Vicente Otero e o CEIP de Tabeaio, Trinketrinke Teatro ten preparada unha sesión moi especial. A biblioteca municipal recibirá ós nenos de tres a cinco anos que gozarán con dúas sesións: O Rato Canguro e Paxariños. Será o día 24 de abril.
Non podemos esquecer o contacontos do último xoves de mes, o 25 de abril, Unhas botas misteriosas con Pillo e Carolina. Será na Biblioteca Municipal ás 18:00 horas e será necesario retirar convites 48 horas antes.
Durante este mes comezamos a VIII campaña Libros Solidarios que se estenderá dende o 15 de abril ata o 7 de maio e na que todos os interesados poderán entregar nas bibliotecas libros usados en bo estado.
A finalidade desta campaña é que durante a Festa do Pan (que se celebrará na nosa localidade os días 10 e 11 de maio) estes libros, se cambien por alimentos non perecedeiros que os Servizos Sociais do Concello repartirán entre os máis necesitados.
Por outra banda todos os usuarios que durante este mes se acheguen polos bibliotecas terán a oportunidade de levar un libro como agasallo.
A Concellería de Cultura do Concello de Carral ven de presentar a segunda edición do programa Papeques, que comprende espectáculos e cine para público infantil e familiar. Teatro, contacontos, películas e concertos configuran unha programación que se desenvolverá do 28 de marzo ao 12 de abril nas bibliotecas municipais, no local Xente Nova e no edificio social Toñito Espiñeira.
Todos os espectáculos son de balde e os aforos limitados. Para algúns deles será necesario retirar convites desde 48 horas antes da actividade.
Papeques comezará o xoves 28 de marzo con Un invento para chegar ao ceo, contacontos a cargo de Trinketrinke Teatro na Biblioteca da Casa da Cultura. Ao día seguinte proxectarase El bebé jefazo. O sábado 30 de marzo en Tabeaio presentarase a obra teatral O soutos dos prodixios de Producións Dispersas. A segunda sesión de cine será o xoves 4 de abril co clásico de Disney 101 Dálmatas. O primeiro espectáculo para bebés será un contacontos de Pavís Pavós na Biblioteca infantil o 5 de abril. Malasombra ofrecerá en Tabeaio un espectáculo para todos os públicos con pompas de xabón titulado Os fabulosos cleaners. Magín Blanco traerá o seu espectáculo musical Camiños ao Toñito Espiñeira o 11 de abril, e ao día seguinte, para pechar a programación, Títeres Babaluva ofrecerá un espectáculo sensorial para bebés titulado A alfombra máxica.
O departamento de Cultura deseña este ciclo coa intención de que sexa vivido en familia. Cada función é unha aprendizaxe e un goce. É moi importante a implicación dos adultos para que os máis pequenos comprendan e asimilen os valores que se transmiten en cada espectáculo.
Tamén é importante que os pais leven os pequenos ás funcións que mellor encaixen coas súas idades. Na publicidade de Papeques distribuída polo municipio, así como na web municipal, indícase a información de cada actividade, as idades ás que se dirixe e se é necesario retirar convites previamente.
O Concello de Carral quere consolidar este programa no seu calendario anual. Nesta nova edición mudou de datas para trasladalo aos meses de marzo e abril, coa intención de mantelo nesta época do ano entre o Entroido e a Semana Santa.
Para algúns dos espectáculos cóntase coa participación da Deputación da Coruña, a través da súa Rede Cultural.
Este xoves, 28 de febreiro, ás 18:00 h, Trinketrinke teatro presenta “Unha Praia particular”, contacontos teatral dirixido a nenos e nenas de tres a oito anos.
Será na Biblioteca Municipal da Casa da Cultura ás 18:00 horas. As entradas son limitadas e de balde polo que é necesario retiralas previamente en calquera das bibliotecas a partir do 25 de febreiro.
A compañía Trinketrinke Teatro será a encargada de ofrecer unha nova sesión de animación á lectura na Biblioteca municipal. Nesta 
ocasión o título do conto que centrará o espectáculo é “A vida na selva”. É unha sesión para nenas e nenos de 3 a 8 anos.
O contacontos terá lugar o xoves 31 de xaneiro, ás 18:00 h. na Biblioteca da Casa da Cultura. O aforo é limitado e é necesario retirar previamente as entradas, que son de balde. Poden retirarse nas bibliotecas a partir do luns 28 de xaneiro.
O Concello de Carral, a través do seu departamento de Cultura, ven de convocar unha nova edición do seu premio de poesía, que está dotado con 2500 euros e a publicación da obra gañadora en Edicións Espiral Maior.
Co certame do 2019 cúmprense 22 edicións, sendo un concurso de referencia no ámbito da poesía galega.
Esta nova edición do premio contempla un prazo para presentar orixinais aberto ata o 6 de abril. Poderán presentar obras os autores e autoras maiores de idade, con poemarios cun mínimo de 500 versos escritos en lingua galega.
O premio entregarase o 31 de maio, dentro dos actos das Letras Galegas en Carral, no que ademais se prevé a presentación da edición do libro gañador da vixésima primeira edición do concurso, titulado As bicis de Xabier Cid.
Ademais do premio e da publicación do libro, o Concello de Carral segue coas actividades escolares relacionadas coa poesía, consistentes en obradoiros de escrita poética e en concursos de poemas.
Para ampliar información, os interesados poden dirixirse á Casa da Cultura de Carral, no teléfono 981 672580, no correo electrónico cultura@carral.es ou a través da web carral.es.
Concello: 981670002
Policía local: 689544311 / 981670002
Protección civil: 112
Casa da cultura/bibliotecas: 981672580
Edif. Social Toñito Espiñeira: 981613520
Centro de saúde:981672186
