O Concello de Carral, en colaboración co Club de Ximnasia Rítmica de Carral, celebrará o próximo 19 de abril o XXIII Certame Municipal de Ximnasia Rítmica, unha actividade plenamente consolidada dentro da programación deportiva de primavera do municipio.
O evento está programado en horario de 10.00 a 14.30 horas no pavillón municipal do Colexio Vicente Otero Valcárcel. O cambio de localización débese á ocupación do ximnasio do pavillón municipal de O Espiño.
Este certame municipal de ximnasia rítmica é un evento de carácter non competitivo, concibido como unha exhibición e mostra deportiva na que participan distintas escolas e clubs de ximnasia rítmica da comarca e da provincia, co obxectivo de fomentar a práctica deportiva e a convivencia entre entidades.
Está prevista a participación de ao redor de 250 ximnastas pertencentes ao Club de Ximnasia Rítmica de Carral, a Escola Municipal de Ximnasia Rítmica de Carral, a Escuela de Gimnasia Rítmica de Ordes, a Escuela Municipal de Abegondo, o Colegio Obradoiro, o Club de Gimnasia Rítmica As Pontes e o Colegio Internacional Eirís
A ximnasia rítmica é unha das disciplinas deportivas con maior implantación no municipio de Carral, onde conta cun club local con máis de 60 licenzas federativas, así como cunha Escola Municipal que reúne a preto de 70 nenas rexistradas.
Ao longo das súas vinte e tres edicións, o Certame Municipal converteuse nunha cita de referencia dentro do calendario deportivo local, consolidándose como un dos eventos habituais das primaveras deportivas do municipio.
O Concello de Carral pon en marcha o programa ‘Carral en Equipo’, unha iniciativa de dinamización social e deportiva que ten como finalidade promover o coñecemento, a visibilidade e a posta en valor das distintas disciplinas deportivas máis numerosas existentes no municipio. A través desta proposta, búscase fomentar a implicación activa da veciñanza, incentivando a asistencia como público a competicións de relevancia nas que participan clubs e entidades deportivas locais.
O programa contribúe tamén a reforzar o tecido asociativo deportivo, fortalecendo o sentimento de pertenza e a identidade colectiva arredor do deporte de base e competitivo, ao tempo que promove a participación interxeracional e o apoio aos equipos de Carral. Neste sentido, ‘Carral en Equipo’ pretende consolidar unha comunidade máis cohesionada arredor da actividade deportiva.
Un dos aspectos centrais da iniciativa é a súa aposta polo deporte feminino, xa que os desprazamentos programados están vinculados a competicións protagonizadas por equipos ou disciplinas maioritariamente femininas. O obxectivo é avanzar na igualdade e incrementar a visibilidade destas disciplinas, contribuíndo así a un maior recoñecemento do deporte feminino.
Neste marco, o Concello organizará viaxes gratuítas en autobús, cun número limitado de prazas, para facilitar que veciños e veciñas poidan asistir como público a diferentes citas deportivas. O programa arrinca o vindeiro 18 de abril en Nigrán (Pontevedra), cun desprazamento para apoiar ao Club de Ximnasia Rítmica de Carral nun torneo galego.
Ademais, están previstas outras dúas saídas: o 3 de maio a Gondomar (Pontevedra), para acompañar á UD Carral Feminino, e o 5 de xullo ao Carballiño (Ourense), para apoiar ao Club Patinaxe Alquimia Carral.
As inscricións para cada unha das viaxes realizaranse nos días previos no Complexo Deportivo, a través do correo complexo.deportivo@carral.es ou do teléfono 678 33 88 47, ata completar as prazas dispoñibles.
O Concello de Carral impulsa unha nova iniciativa baixo o título ‘Parroquia a parroquia. O Concello preto de ti’, un programa que levará a cabo unha serie de charlas informativas en distintas parroquias do municipio co obxectivo de achegar á cidadanía información crave sobre o Inventario de Camiños.
A través destes encontros, realizarase unha exposición detallada, incluíndo planos e información específica adaptada a cada zona. Así mesmo, durante as sesións explicarase o procedemento para a presentación de alegacións. No caso das parroquias de As Travesas, Sergude e Tabeaio, as charlas servirán tamén para informar sobre o proxecto ‘Fomento da movilidade sostible. Proxecto de trazado dos treitos comúns non Camiño Inglés de Santiago’, que afecta directamente a estes núcleos, así como sobre os mecanismos para formular alegacións ao mesmo.
O programa contempla un total de 12 charlas, nas que ademais se abrirá un espazo para escoitar e atender todas as dúbidas, suxerencias ou propostas que desexen trasladar os veciños e veciñas. A primeira das sesións terá lugar este xoves, 16 de abril, en O Xalo, a partir das 18.00 horas, na Local Urbanización. As charlas desenvolveranse ata o próximo 30 de abril, data na que se poñerá fin a esta iniciativa en Carral.
O alcalde de Carral, José Luis Fernández Mouriño, destacou a importancia deste programa como ferramenta de participación directa: “Con este programa queremos achegar o Concello aos veciños, explicar de primeira man os proxectos que lles afectan e escoitar as súas achegas para melloralos”.
A Concellería de Cultura publica o seu informe sobre os resultados da programación cultural do ano 2025. Desde hai unha década este departamento ten implantado un sistema de seguimento das actividades que levan a cabo co fin de valorar a consecución de obxectivos e a evolución das programacións, ao tempo que redifinir, se é necesario, as liñas de actuación. O traballo está asinado polo técnico de Cultura, Carlos Lorenzo, e nel, ademais das conclusións que se derivan dos datos recollidos, formula propostas para mellorar a oferta e actividade cultural no municipio.
O informe de avaliación da programación cultural de Carral para o ano 2025 destaca un balance moi positivo cun crecemento na participación e unha excelente valoración por parte dos profesionais do sector. As principais conclusións que poden resultar de maior interese para a veciñanza son as seguintes:
- Aumento da participación veciñal: No ano 2025 rexistrouse un total de 4.667 asistentes ás actividades, o que supón un incremento do 14% (581 persoas máis) con respecto ao exercicio anterior.
- Éxito de programas específicos:
- As artes escénicas (teatro, monicreques, monólogos e maxia) continúan a ser a categoría preferida, con máis propostas e público.
- O ciclo Músicas e Danzas Íntimas experimentou un crecemento excepcional (un 957% máis que en 2024) tras o seu traslado ao Campo da Feira e a inclusión de danza contemporánea.
- O Premio de Poesía Concello de Carral acadou un record histórico de participación con 100 obras presentadas.
- A Biblioteca como motor cultural: Os servizos de préstamo da biblioteca seguen a medrar de xeito constante, acadando duplicar as cifras totais de 2019. Ademais, as actividades de animación á lectura para nenos de 0 a 8 anos foron a segunda categoría con máis oferta e seguimento.
- Valoración da calidade: O 84% dos profesionais (artistas e técnicos) que traballaron en Carral consideran que o departamento de Cultura funciona mellor que na maioría dos concellos de Galicia. Valoran especialmente o trato recibido, a profesionalidade do persoal e a organización das actividades.
- Espazos e densidade de oferta: A Biblioteca e o Local Xente Nova son os centros neurálxicos da cultura, acollendo case a metade da programación. O outono (especialmente outubro) mantense como a época con maior volume de actividades.
- Necesidades de futuro e melloras: Como principal eiva, o informe sinala a necesidade urxente de mellorar os espazos escénicos, mencionando especificamente a demanda de construír un teatro para ofrecer mellores condicións tanto ao público como aos artistas.
Para o futuro, o informe propón estratexias para motivar a participación da mocidade, atender mellor aos colectivos inmigrantes e manter o rigor orzamentario que permite que o concello asuma o 69% do gasto con fondos propios.
Para a descarga do informe prema en INFORME DE AVALIACIÓN CULTURA CARRAL 2025
O Concello de Carral mantivo un encontro no propio CEIPP Vicente Otero co director territorial de Educación, Santiago Freire, para analizar a situación do centro e estudar posibles vías de ampliación, unha necesidade trasladada pola propia comunidade educativa ante o incremento de alumnado.
Na reunión participaron o alcalde, José Luis Fernández Mouriño; os concelleiros Cristina Casal e Francisco Bello; a directora do centro, Nerea Paz; e representantes do ANPA, como Mari Nieves Silveira, presidenta; Beatriz Otero, vicepresidenta; e María Varela, vogal. O equipo directivo expuxo a necesidade de ampliar as instalacións debido ao crecemento da poboación en Carral e ao aumento de solicitudes de matrícula, que mesmo continúan chegando unha vez iniciado o curso. As previsións apuntan a que o colexio podería pasar a ser de tres liñas nun futuro próximo, e mesmo seguir crecendo.
Ante esta situación, o Concello mostrou a súa total disposición a apoiar as demandas do centro. O alcalde subliñou o compromiso municipal coa comunidade educativa: “Dende o Concello imos apoiar ao centro e á comunidade educativa para dar resposta a esta demanda real, porque é unha prioridade garantir unhas instalacións axeitadas para o alumnado”, afirmou.
Opcións de ampliación
Durante a reunión analizáronse distintas alternativas para levar a cabo a ampliación e crear máis aulas para o alumnado. A directora do centro explicou que a opción máis viable pasa por aproveitar o espazo das antigas vivendas de profesorado: “A proposta das vivendas permitiría reorganizar o centro, trasladando servizos como o comedor e liberando espazos actuais para aulas, sen perder zonas comúns”, sinalou.
Pola súa banda, o director territorial de Educación, Santiago Freire, explicou que se estudarán todas as alternativas desde o punto de vista técnico e económico: “Imos avaliar as diferentes opcións para atopar a mellor solución posible, tendo en conta tanto as necesidades do centro como a viabilidade das actuacións”, indicou, destacando que a petición será avaliada pola Consellería de Educación.
O representante de Educación incidiu na importancia de evitar solucións provisionais e apostar por unha intervención definitiva que non prexudique o funcionamento do centro. O obxectivo é que as obras poidan executarse, na medida do posible, durante os meses de verán para evitar interferencias no curso escolar.
Desde a ANPA tamén se puxo sobre a mesa a necesidade de aproveitar a futura actuación para mellorar e humanizar os espazos educativos.
Tras a reunión, o alcalde destacou que desde o goberno municipal “cumprimos co prometido e seguiremos apoiando todas as demandas do centro, traballando de maneira coordinada coa comunidade educativa”.
Finalmente, pactouse unha nova reunión en maio para seguir explorando as liñas de actuación e definir a solución máis adecuada para garantir unhas instalacións que respondan o crecemento do alumnado e ás necesidades do municipio.
A través do Programa de Financiamento dos Servizos Comunitarios Municipais en 2026, o Concello de Carral recibiu unha axuda da Deputación da Coruña de 156.000 euros.
O vindeiro sábado 11 de abril, en horario de tarde, terá lugar a inauguración da pista municipal de tenis de Carral, nun acto aberto á cidadanía e concibido para achegar este deporte a veciños e veciñas dunha forma dinámica e participativa.
Para esta xornada contarase coa colaboración do Club Escuela de Tenis Marineda, que será o encargado de dinamizar a actividade mediante unha sesión práctica de tenis dirixida a todos os públicos, combinando exhibición e participación das persoas asistentes.
A actividade desenvolverase entre as 17.00 e as 18.30 horas e dará comezo cunha breve presentación, acompañada dunha demostración inicial a cargo dun grupo de xogadores e xogadoras en idade xuvenil, que realizarán un exemplo de inicio dunha sesión de adestramento con exercicios de quecemento físico e específico de tenis.
A continuación, terá lugar unha demostración práctica de adestramento de golpes de fondo e de rede, protagonizada polos xogadores e xogadoras dos equipos cadetes do club. Posteriormente, desenvolverase un exercicio centrado no adestramento do saque, seguido dun exemplo de xogo final no que se recrearán situacións reais de partido, incluíndo puntos con saque e resto.
A xornada finalizará cunha foto de grupo na que participarán tanto os xogadores e xogadoras como as persoas asistentes.
Esta actividade está concibida cun carácter participativo, de xeito que, en función do número de asistentes e da súa disposición, o público poderá tomar parte nos diferentes xogos e exercicios propostos.
En caso de menor afluencia, a xornada desenvolverase en formato de exhibición por parte dos xogadores e xogadoras cadetes, ofrecendo un espectáculo deportivo de gran atractivo polo seu nivel de xogo.
O Concello de Carral finalizou recentemente tres actuacións destinadas á mellora da rede viaria municipal, reforzando a seguridade, a drenaxe e a accesibilidade en distintos puntos do municipio. O conxunto das obras supuxo un investimento total de máis de 140.000 euros.
O alcalde, José Luis Fernández Mouriño, subliñou que “estas obras responden ao compromiso do goberno municipal co mantemento e mellora da nosa rede viaria, que é fundamental para a seguridade e a calidade de vida da veciñanza”, destacando a aposta municipal por este tipo de intervencións.
A primeira das actuacións levouse a cabo en marzo en Tabeaio, con traballos de mellora de cunetas ao longo de 275 metros. Procedeuse á limpeza de cunetas, foxos e marxes do camiño, así como á demolición de tres entradas de formigón. Posteriormente, estas foron repostas mediante pasos salvafoxos con cunetas de formigón, unha solución que permite ampliar a sección do vial e facilitar o paso de vehículos. O custo total desta obra ascendeu a 32.885,23 euros.
Por outra banda, o Concello finalizou o proxecto de mellora do vial entre A Ribeira e Soavila, na parroquia de Cañás. A actuación desenvolveuse ao longo de 675 metros, nunha zona onde as cunetas estaban invadidas pola vexetación e os noiros presentaban deficiencias. Os traballos incluíron a limpeza e perfilado de cunetas, a execución de cunetas de formigón en gran parte do trazado e en ambas as marxes, así como tramos hormigonados. Tamén se instalou unha canalización de polietileno e reforzáronse tres noiros. O orzamento total foi de 74.035,19 euros, cunha axuda de 56.417 euros da Axencia Galega de Desenvolvemento Rural.
Sobre esta actuación, o rexedor destacou que “a mellora do drenaxe, o reforzo dos noiros e a ampliación das seccións dos viarios contribúen a facer máis seguros os desprazamentos, especialmente nas zonas rurais”.
Finalmente, completouse a mellora da capa de rodadura do vial entre Cimadevila e Montecelo, na parroquia de Quembre, dentro do Plan de Obras e Servizos 2025. A actuación contou cun orzamento de 35.608,73 euros. Os traballos incluíron o estendido dunha nova capa de rodadura, a limpeza de cunetas, a mellora da drenaxe e a renovación da sinalización horizontal. A intervención abarcou dous tramos de 215 e 195 metros.
O alcalde concluíu que estes investimentos “son clave para garantir unha mobilidade máis eficiente e sostible e para dar resposta ás necesidades reais do territorio”.
O Concello de Carral habilitou na súa páxina web oficial unha nova pestana en portada que recolle toda a información relativa ao Inventario de camiños e vías municipais, co obxectivo de facilitar o acceso á documentación por parte de todos os veciños e veciñas.
Esta iniciativa púxose en marcha logo da publicación no Boletín Oficial da Provincia da aprobación inicial do Inventario de camiños e vías municipais do Concello de Carral. A partir de mañá, 2 de abril, ábrese un prazo de dous meses para a presentación de alegacións por parte das persoas interesadas.
Deste xeito, o Concello pon ao dispor de todos os veciños e veciñas tanto o documento completo como ferramentas dixitais para a súa consulta, incluíndo un visor específico e unha ligazón de descarga directa.
Ademais, o inventario será presentado polas distintas parroquias, co fin de achegar a información a todos os núcleos do municipio.
O alcalde de Carral, José Luis Fernández Mouriño, destacou a importancia deste proceso para a participación cidadá: “Queremos que toda a veciñanza teña acceso sinxelo a esta información e poida revisala con detalle, xa que se trata dun documento moi relevante para ou noso territorio”.
Así mesmo, o rexedor subliñou o compromiso do Concello coa transparencia e a implicación veciñal: “Abrimos este período de alegacións para garantir que o inventario recolla a realidade dos nosos camiños e vías, contando coa colaboración de todos os veciños”.
A Casa da Cultura acollerá o 5º Ciclo de Cine Documental Galego que organiza a concellería de Cultura con tres sesións de gran interese e atractivo. Todas comezarán ás 20:00 h.
A primeira das producións é Crónicas dun non, un documental que conta a historia do movemento da insubmisión, no que moitos mozos desde 1989 se negaron a realizar o Servizo Militar Obrigatorio e a Prestación Social Sustitutoria. O filme conta a historia da insubmisión en Galicia a través da experiencia persoal do seu director, Fernando Rodríguez Gómez “Peñaño”, que foi detido en 1989 pola súa negativa a incorporarse ao Servizo Militar, permaneceu en prisión preventiva, foi xulgado e condenado a un ano de cadea. É o relato dun tempo e dunha loita colectiva, cargada de inxenuidade, amor e tenacidade.
Crónicas dun non proxectarase o xoves 9 de abril e haberá un coloquio co seu director.
Un semana despois, o 16 de abril, preséntase Onde máis doe de Manane Rodríguez. Este filme trata sobre a violencia vicaria. Despois de ameazar durante anos á súa exparella, MM asasina a golpes de pa ao seu fillo de 11 anos. Un ano máis tarde, un xurado popular condénao por asasinato (matar facendo uso pleno das súas facultades mentais e determina que o crime contra o neno non buscaba outra cousa que castigar á nai. Que move a unha persoa en pleno uso das súas facultades para matar a un fillo? Por que o feito de que unha muller non se someta e intente actuar pola súa conta pode alentar un castigo tan brutal?.
Manane Rodríguez estará presente na sesión para presentar o documentar e manter unha conversas co público asistente.
A terceira e última sesión do ciclo será o xoves 23 de abril con Basal, que é un docudisco que retrata a vida da cantautora Ugia Pedreira coñecida como A Pedreira, xunto a súa filla Lúa Awel, que ten parálise cerebral e unha relación “curiosa, expléndida e excelsa” coa música. O relato abarca desde as sesións de Feldenkrais en Donostia ata a participación de Lúa na gravación do álbum tamén chamado Basal. O documental é un relato íntimo, cargado de tenrura e paisaxes sonoras e visuais rotundas.
Este documental preséntase grazas á Deputación da Coruña.
A entrada a todas as sesións é de balde con límite na capacidade da sala.
Carral, con este ciclo consolidado na súa programación cultural municipal, estase a converter nun dos poucos puntos nos que é posible ver este tipo de producións que carecen de circuítos estables para amosalas ao público. Ademais gaña interese nun tempo no que o cine documental, tanto con longametraxes como con curtas, está sumando un gran auxe e espazo no número total de producións cinematográficas en todo o mundo.
Esta programación de cine galego documental conta coa colaboración da Rede de Normalización Lingüística da Xunta de Galicia.
