A Concellería de Cultura mantén desde hai anos unha estratexia de avaliación da súa programación anual, tendo especial atención nalgunhas das súas propostas. O programa Teatro de Outono é un dos máis importantes e no que conta coa participación dos espectadores que atenden enquisas postas á súa disposición na sala ao remate de cada función ou de xeito “en liña”. Para a análise da edición do ano 2025 o departamento de Cultura contou con 244 enquisas atendidas, o que lle ofrece un nivel aceptable de fiabilidade dos resultados.
O informe aborda múltiples aspectos, tanto das obras exhibidas como dos hábitos de consumo teatral do público. Carlos Lorenzo, técnico municipal de Cultura e responsable do informe, presenta no documento unha serie de conclusións que servirán para o mellor deseño de vindeiras programacións. Algúns dos datos a salientar son que as obras Neura (De Ste Xeito Producións) e Cortello de amor (Amorodio Teatro) foron as mellor valoradas polo público; os espectadores proceden fundamentalmente de Tabeaio e Carral con moi pouca asistencia desde as parroquias rurais; as mulleres seguen a ser maioritarias na asistencia ás funcións e sobre todo persoas de mediana idade; o medio máis eficaz para comunicar a programación é o whatsapp Novas Carral; unha gran maioría indica que nos últimos anos ten aumentado o seu interese polo teatro e puntúan entre alto e moi alto a calidade do ciclo teatral de Carral.
O informe, que é de doada lectura e que conta os datos de xeito moi gráfico, pódese consultar e descargar premendo neste link.
O Concello de Carral organiza dous novos cursos formativos de carácter gratuíto, nesta ocasión centrados na saúde e a alimentación: primeiros auxilios pediátricos e manipulación de alimentos no fogar.
O taller de primeiros auxilios pediátricos será o primeiro de ambos e impartirase o mércores 25 do próximo mes de marzo. O horario será de mañá, de 10.00 a 12.30 horas
No que respecta a a formación sobre manipulación de alimentos no fogar, esta levará a cabo o mércores 8 de abril, tamén pola mañá, en horario de 10.00 a 13.30 horas.
Os dous talleres contarán con prazas limitadas e as súas respectivas inscricións poderán realizarse ata o mércores 18 de marzo, tanto a través do correo eduacion@carral.es como do teléfono 678338872.
O Concello de Carral, a través da súa Concellería de Cultura, presenta unha nova programación dedicada aos máis pequenos da familia. PAPEQUES ESCENA é unha serie de espectáculos de teatro, música, danza, monicreques e narración oral que terá lugar durante catro venres consecutivos no Local Xente Nova en Tabeaio.
A programación, que comeza o 27 de febreiro, está formada polos espectáculos Comenoites (Os Náufragos Teatro), Canta miña pedra, canta (Charo Pita e Xoán Curiel), Güela güela (Galitoons / Chisco Casteleiro) e O arcón de Noa (Amarelo Cía.).
Esta é unha nova oferta que se pretende fixar no calendario cultural municipal e que é posible grazas ao programa Dinamiz-ARTj do Instituto de la Transición Justa O.A. a través da Fundación Ciudad de la Energía-CIUDEN, F.S.P., que para esta primeira edición achega tres dos catro espectáculos. Con este tipo de propostas, a Concellería de Cultura busca facilitar o achegamento dos nenos e nenas a espectáculos escénicos especialmente concibidos para estas idades, a espazos culturais menos frecuentes aprendendo a desfrutar do traballo en vivo e directo de artistas entendendo que o fan en colectividade, o que supón a adquisición de hábitos e comportamentos que enriquecerán o seu desenvolvemento social e educativo.
As datas, horarios e detalles de cada espectáculo pódense consultar premendo neste vencello.
O Concello de Carral continúa dando pasos firmes para a construción dunha nova estación depuradora de augas residuais (EDAR), unha infraestrutura estratéxica que permitirá mellorar de maneira significativa o servizo de saneamento no municipio e planificar con garantías o seu crecemento futuro.
O alcalde, José Luis Fernández Mouriño, e os concelleiros Óscar Bodelo e Francisco Bello mantiveron unha reunión de traballo coa conselleira de Medio Ambiente e Cambio Climático da Xunta de Galicia, Ánxeles Vázquez, para analizar o proxecto municipal que permitirá dotar a Carral dunha nova infraestrutura de depuración.
A nova EDAR terá como finalidade tratar tanto os caudais de augas residuais urbanas como as industriais asimilables a urbanas, substituíndo e mellorando o servizo que actualmente presta a EDAR de O Quenllo. Esta actuación permitirá incrementar a capacidade de tratamento, mellorar a eficiencia do sistema e adaptalo ás necesidades actuais e futuras da poboación.
Segundo explicou Fernández Mouriño, “estamos ante unha actuación clave para Carral. O saneamento é un servizo básico e esencial, e esta nova depuradora permitirá ofrecer unha prestación máis moderna, eficaz e respectuosa co medio ambiente”.
O rexedor destacou tamén que “desde o Concello estamos a traballar con visión de futuro. Queremos que Carral medre, pero que o faga de maneira ordenada e sostible, e para iso é fundamental contar con infraestruturas dimensionadas ás necesidades que virán”, agradecendo de igual modo “a atención e a colaboración dá Xunta de Galicia”.
Durante o encontro, a Xunta trasladou que o persoal técnico de Augas de Galicia avaliará o proxecto presentado polo Concello co obxectivo de estudar posibles vías de colaboración e financiamento.
O Concello de Carral convoca unha nova edición do seu certame de poesía, un dos máis prestixiosos da literatura galega.
A obra gañadora será publicada en Edicións Espiral Maior e o seu autor ou autora recibirá un premio económico de 3.500 €. Os poemarios deberán estar escritos en galego, deberán ser orixinais e inéditos e ter unha unha extensión mínima de 500 versos.
O prazo límite para presentar as obras é o 20 de marzo de 2026. O xuri tomará a decisión da obra gañadora no mes de maio e o acto de entrega do premio, que ademais é o de presentación do libro Especies invasoras de Branca Trigo, que foi a vencedora na edición do pasado ano, será o venres 5 de xuño, no que será obrigatoria a presenza da persoa gañadora.
A Consellería de Cultura, Lingua e Xuventude da Xunta de Galicia colabora no desenvolvemento do concurso.
As dúbídas pódense consultar en cultura@carral.es ou no teléno 981 672 580. As bases están dispoñibles premendo neste vencello.
O Concello de Carral organiza, de cara ao vindeiro mes de marzo, uns cursos formativos gratuitos de iniciación á tecnloxía para impulsar a integración das persoas maiores de 60 anos no mundo dixital.
Estes obradoiros municipais impartiranse entre o luns día 9 e o xoves, 12 de marzo, en horario de mañá, das 10.00 ás 13.00 horas.
A organización desta actividade nace baixo a premisa do Goberno municipal de brindar aos maiores a posibilidade de aprender a navegar por Internet de xeito útil, proveitoso e seguro, para involucralos así nesta sociedade tecnolóxica.
No que respecta as inscricións, estas poderán formalizarse ata o vindeiro mércores, 18 de febreiro, tanto de forma presencial na planta 2 do edificio Toñito Espiñeira, en horario de 9.00 a 14.00 horas, como por teléfono no 981 61 35 20. As plazas son limitadas.
O alcalde de Carral, #osé Luis Fernández Mouriño, e os concelleiros Óscar Bodelo, Fran Bello, Patricia López, Isabel López e Cristina Casal, recibiron este luns ao conselleiro de Presidencia, Xustiza e Deportes da Xunta de Galicia, Diego Calvo, e á directora xeral de Administración Local, Natalia Prieto, nunha visita institucional centrada en varias actuacións prioritarias en materia deportiva.
A visita comezou na pista deportiva exterior situada xunto ao pavillón O Espiño, onde o conselleiro comprobou as melloras executadas co apoio da Xunta de Galicia. A través da Orde de infraestruturas de uso público de 2025, o Goberno galego destinou 35.000 euros a esta actuación, que incluíu o revestimento e marcado de liñas conforme á normativa federativa, a instalación de iluminación LED na zona cuberta e un novo cadro eléctrico, cun orzamento total de 50.000 euros.
Posteriormente, a comitiva desprazouse ao campo de fútbol Borja Rodríguez Ans, onde se analizou a situación da instalación e a necesidade de executar as demandadas bancadas. O Concello traballa actualmente para poder levar a cabo esta actuación mediante un convenio coa Xunta de Galicia.
En relación co pavillón O Espiño, o Concello de Carral está a tramitar un Plan Especial de Dotacións e Infraestruturas (PEID) que permitirá modificar a cualificación do chan e facer posible a ampliación da instalación.
O alcalde, José Luis Fernández Mouriño, sinalou que se trata dun paso “necesario para executar un proxecto esencial para incrementar os usos do pavillón”.
O rexedor agradeceu a visita e a disposición mostrada polo conselleiro Diego Calvo, destacando “a implicación e a sensibilidade da Xunta de Galicia coas necesidades reais dos concellos”, e subliñou a importancia da colaboración institucional para sacar adiante proxectos “moi demandados pola veciñanza”.
O Concello de Carral celebrará o Entroido o vindeiro domingo 15 de febreiro de 2026 cunha variada programación festiva que terá lugar no Campo da Feira. O evento virará en torno ao tradicional desfile e concurso de disfraces, unha iniciativa que busca estimular e fomentar a participación veciñal.
A xornada comezará ás 17:00 horas co desfile das persoas participantes nos diferentes concursos. O percorrido partirá desde a rúa Víctor Velasco e discorrerá pola rúa Manuel Ferrol, rúa Paraíso, avenida dúas Mártires, rúa Víctor Velasco, rúa Belvís de Paleo e rúa de Paleo, finalizando no Campo da Feira, onde se desenvolverá o resto da programación.
O concurso contará con catro modalidades de disfraces: infantil, dirixida a nenos e nenas de 0 a 11 anos; individual ou parellas, a partir de 12 anos; comparsas, formadas por máis de cinco integrantes; e comparsas con carroza, con máis de dez participantes.
No Concurso Infantil de Disfraces premiaranse os cinco mellores disfraces con agasallos. Na modalidade de disfraces individuais ou por parellas outorgaranse catro premios económicos, cunha dotación de 150 euros para o primeiro premio, 100 euros para o segundo, 75 euros para o terceiro e 50 euros para o cuarto clasificado.
No Concurso de Disfraces de Comparsas premiaranse as tres mellores agrupacións con 300 euros para o primeiro premio, 200 euros para o segundo e 100 euros para o terceiro. Pola súa banda, o Concurso de Comparsas con Carroza repartirá cinco premios económicos, sendo o primeiro de 500 euros, o segundo de 400 euros, o terceiro de 300 euros, o cuarto de 200 euros e o quinto de 100 euros. A entrega de premios está prevista para as 20:00 horas no Campo da Feira.
O prazo de inscrición para poder participar abrirase ao día seguinte da publicación do extracto da convocatoria na páxina web do Concello de Carral e finalizará ás 14:00 horas do xoves 12 de febreiro de 2026. A inscrición para o concurso infantil poderá realizarse na Casa da Cultura, de forma presencial, por teléfono no 981 672 580 ou por correo electrónico en casadacultura@carral.es, en horario de 09:00 a 14:00 e de 17:00 a 20:00 horas.
Para as modalidades con premios económicos, a inscrición deberá formalizarse a través da Sede electrónica do Concello de Carral mediante unha Solicitude Xeral, anexando o Anexo I debidamente cuberto e asinado.
Para finalizar, a celebración do Entroido en Carral pecharase ás 21:30 horas coa actuación musical de Somoza Trío, que poñerá o broche a unha xornada festiva pensada para todos os públicos.
O Concello de Carral continúa mantendo reunións coa Consellería de Sanidade para avanzar no proxecto de construción dun novo Centro de Saúde no municipio. Neste contexto, o alcalde, José Luis Fernández Mouriño, recibiu esta semana ao xerente da área Sanitaria da Coruña e Cee, Luis Verde, acompañado de dous técnicos da Consellería, co obxectivo de coñecer de primeira man o estado actual das instalacións sanitarias.
Durante o encontro analizáronse as principais problemáticas que presenta o actual centro de saúde, entre as que destacan as humidades, a sensación térmica no interior do edificio e o estado das xanelas. Posteriormente, o xerente e os técnicos realizaron unha inspección do inmoble, na que tomaron nota dos danos detectados.
As humidades constitúen un dos principais danos do edificio, xa que en épocas de mal tempo e choivas prodúcense filtracións de auga de maneira continuada. Outra das cuestións abordadas foi a sensación térmica no interior, que os expertos puideron comprobar directamente durante a visita. A deterioración do revestimento exterior provoca unha importante perda de calor, o que dificulta manter unha temperatura adecuada no interior do centro. Entre as posibles solucións expostas figura a substitución das xanelas por outras con maior capacidade illante.
O alcalde agradeceu a implicación da Xunta de Galicia por atender “con tanta rapidez unha dás maiores demandas do Concello de Carral”, subliñando a importancia desta actuación ante o crecemento poboacional do municipio. “Carral está moi preto de chegar aos 7.000 habitantes, polo que é imprescindible contar con servizos de calidade para que a xente queira seguir tendo ou noso concello como a primeira opción para vivir”, sinalou Fernández Mouriño.
O alcalde, José Luis Fernández Mouriño, propoñerá destinar 755.064,34 euros do Plan Único da Deputación da Coruña á execución de tres actuacións “clave” para o municipio: a mellora da seguridade viaria na estrada do Quenllo, a rehabilitación da pista polideportiva do local social de O Canedo, e á rehabilitación da pista polideportiva de Tabeaio. A proposta someterase a debate no pleno ordinario deste xoves, 29 de xaneiro (ás 20.00 horas).
Tal e como explica o rexedor, trátase de tres actuacións “moi demandadas polos veciños e veciñas” e que responden a dous obxectivos prioritarios para o goberno: reforzar a seguridade viaria, no caso do Quenllo, e mellorar as infraestruturas públicas ao servizo da cidadanía en Tabeaio e O Canedo.
No que respecta a a estrada do Quenllo, as obras contemplan a ampliación do ancho da vía, a execución de cunetas de seguridade e a realización de traballos de sinalización e balizamento.
Pola súa banda, na pista polideportiva de Tabeaio, o investimento provincial permitirá mellorar o rendemento e o uso da instalación mediante a execución dunha nova cuberta.
As actuacións incluirán, ademais, a rehabilitación do pavimento deportivo, coa reparación da superficie existente e un novo marcado para diferentes modalidades, como fútbol sala e baloncesto. Así mesmo, mellorarase a accesibilidade, adaptando os accesos desde o vial e a contorna do centro social Xente Nova de Tabeaio, renovarase o peche perimetral e instalarase novo equipamento deportivo (redes de protección, bancos e papeleiras).
En O Canedo, as obras comprenderán a instalación dun novo pavimento mediante soleira de formigón, a marcaxe das pistas de fútbol sala e baloncesto, así como a subministración e colocación de porterías e canastras.
Plan Complementario 2026
O goberno municipal someterá tamén a debate a súa proposta de actuacións para o Plan Complementario 2026, que ascende a 1.073.373,70 euros. O executivo local expón destinar integramente esta cantidade a obras de mellora da seguridade viaria en distintos puntos do municipio, a través das seguintes intervencións:
• Mellora da pavimentación das beirarrúas en Belvís de Paleo
• Mellora da pavimentación da beirarrúa da rúa José Boga
• Mellora da capa de rodadura da estrada en Abrigosa (San Vicente de Vigo)
• Mellora da capa de rodadura, formación de cunetas e canalización da rede de pluviais na rúa da Chousa
• Mellora da pavimentación das beirarrúas desde Paleo ata o centro de saúde de Carral
• Mellora da pavimentación das beirarrúas da rúa Manuel Ferrol
- Saneamento en Cañás
Costa da Égoa
Por último, o alcalde elevará ao pleno a ratificación dun decreto para solicitar unha subvención á Deputación da Coruña. A axuda serviría para executar o proxecto de mellora e actualización da contorna do conxunto hidráulico Costa da Égoa-Batán.
