A representación de “Dúas donas que bailan” de Teatro do Atlántico, incluída no ciclo de Teatro de Outono e prevista para este sábado, muda de data para o 14 de decembro ás 20:30 h.
O motivo do cambio é a baixa médica dun membro do elenco.
Esta mudanza afecta tamén ao espectáculo “Puño Puñete” de Baobab Teatro, que fica fixado para o venres 6 de decembro ás 19:00 h.
Ámbolos dous espectáculos terán lugar no Local Xente Nova de Tabeaio.
A Concellería de Cultura do Concello de Carral ven de presentar a segunda edición do programa Papeques, que comprende espectáculos e cine para público infantil e familiar. Teatro, contacontos, películas e concertos configuran unha programación que se desenvolverá do 28 de marzo ao 12 de abril nas bibliotecas municipais, no local Xente Nova e no edificio social Toñito Espiñeira.
Todos os espectáculos son de balde e os aforos limitados. Para algúns deles será necesario retirar convites desde 48 horas antes da actividade.
Papeques comezará o xoves 28 de marzo con Un invento para chegar ao ceo, contacontos a cargo de Trinketrinke Teatro na Biblioteca da Casa da Cultura. Ao día seguinte proxectarase El bebé jefazo. O sábado 30 de marzo en Tabeaio presentarase a obra teatral O soutos dos prodixios de Producións Dispersas. A segunda sesión de cine será o xoves 4 de abril co clásico de Disney 101 Dálmatas. O primeiro espectáculo para bebés será un contacontos de Pavís Pavós na Biblioteca infantil o 5 de abril. Malasombra ofrecerá en Tabeaio un espectáculo para todos os públicos con pompas de xabón titulado Os fabulosos cleaners. Magín Blanco traerá o seu espectáculo musical Camiños ao Toñito Espiñeira o 11 de abril, e ao día seguinte, para pechar a programación, Títeres Babaluva ofrecerá un espectáculo sensorial para bebés titulado A alfombra máxica.
O departamento de Cultura deseña este ciclo coa intención de que sexa vivido en familia. Cada función é unha aprendizaxe e un goce. É moi importante a implicación dos adultos para que os máis pequenos comprendan e asimilen os valores que se transmiten en cada espectáculo.
Tamén é importante que os pais leven os pequenos ás funcións que mellor encaixen coas súas idades. Na publicidade de Papeques distribuída polo municipio, así como na web municipal, indícase a información de cada actividade, as idades ás que se dirixe e se é necesario retirar convites previamente.
O Concello de Carral quere consolidar este programa no seu calendario anual. Nesta nova edición mudou de datas para trasladalo aos meses de marzo e abril, coa intención de mantelo nesta época do ano entre o Entroido e a Semana Santa.
Para algúns dos espectáculos cóntase coa participación da Deputación da Coruña, a través da súa Rede Cultural.
O local Xente Nova de Tabeaio acollerá este sábado 9 de marzo un concerto do Quinteto InVento, cun repertorio de recoñecidas pezas latinoamericanas.
O concerto, que comezará ás 20:30 h, combinará obras orixinais con adaptacións que permitan escoitar grandes obras cunha nova sonoridade. Interpretarán obras de Astor Piazolla, Paquito d’Rivera, Vinicio Meza e Julio Medaglia, entre outros autores.
O Quinteto InVento é un grupo galego de música de cámara que xorde da amizade dos seus compoñentes, provenientes dalgunhas das principais orquestras de Galicia. O quinteto está formado por flauta, oboe, fagot, trompa e clarinete.
A entrada ao concerto é de balde. A Concellería de Cultura do Concello de Carral, organizadora do concerto, pide ao público puntualidade para evitar molestias unha vez iniciada a actuación.
Un ano máis, ao chegar estas datas do Nadal, a concellería de Cultura organiza en colaboración coa Asociación Cultural Aires de Carral, o Festival de Panxoliñas. Participarán a 
coral polifónica San Pedro de Domaio, o grupo de música tradicional Arnela e a coral polifónica Aires de Carral.
As tres agrupacións interpretarán as cancións típicas desta época, a partir das 19:00 h. do domingo 16 de decembro no local Xente Nova de Tabeaio.
A entrada é libre.
A Concellería de Cultura continúa cos seus ciclos de cine e de teatro con dúas ofertas moi interesantes para esta semana. O venres, ás 20:30 h na Casa da Cultura proxectarase o filme Handia, que acadou 10 premios Goya e que narra a historia real dun mozo que non deixa de medrar.
O sábado, no local Xente Nova de Tabeaio a compañía Teatro do Atlántico presentará Helena, xuízo a unha lurpia no programa Teatro de Outono de Carral. A actriz María Barcala é Helena de Troia, “a bela Helena”, a filla de Zeus e Leda, a esposa de Menelao, a amante de Paris. Estamos no século XXI. Helena xa non é “a bela Helena”, senón unha muller con certos signos que nos falan do implacable paso do tempo; malia iso mantense posuidora dunha enerxía desbordante, habitando nunha especie de tobogán emocional transitado polos intensos episodios da súa travesía vital, na que se mesturan a dor da nena violada por Teseo coa dor da 
esposa obrigada por Menelao; a paixón da amante namorada do fermoso Paris, co desafío e o rancor para con Zeus, o seu divino pai; a ironía ao redor de moitos dos seus contemporáneos –Aquiles, Ulises–, coa impotencia diante da crueldade da guerra… A función comeza ás 20:30 h e prégase puntualidade xa que unha vez iniciada a obra non se permitirá o acceso á sala.
Alumnado de 1º e 2º de primaria do CEIP Vicente Otero tiveron ocasión de desfrutar do espectáculo da compañía arxentina Chachakün, Un secreto increíble. A función tivo lugar o pasado martes no local Xente Nova de Tabeaio.
A Concellería de Cultura do Concello de Carral optou por manter unha das funcións previstas do festival Galicreques das Mariñas, que contaba ata o presente ano co apoio do Consorcio das Mariñas; mentres que nalgúns outros concellos onde tiña lugar a mostra, optaron por non programalo neste exercicio. En Carral decidiuse manter a función escolar de Galicreques para que os máis pequenos teñan unha opción máis de achegarse ao teatro de títeres.
Antes do inicio do espectáculo, o técnico municipal de Cultura explicoulles aos rapaces as características dunha función teatral, cal é o comportamento que hai que ter durante o espectáculo e animounos a participar d as múltiples disciplinas da cultura.
A compañía Contraproducións abrirá o ciclo Teatro de Outono de Carral coa representación da obra Fillos do Sol. Será este sábado 6 de outubro en Tabeaio.
Como cada ano, a Concellería de Cultura do Concello de Carral, en colaboración coa Deputación da Coruña co seu programa Rede Cultural, leva a cabo no último trimestre do ano unha programación de artes escénicas na que presenta obras de compañías profesionais e afeccionadas, con espectáculos de comedia, dramáticos e de maxia. Na edición de 2018 serán seis as funcións que se leven a cabo no local Xente Nova de Tabeaio: Fillos do sol – Contraproducións (sábado 6 de outubro), Será por camiños – Grupo Teatro Escola Narón (sábado 20 de outubro), Linguado país (maxia) – Martín Camiña – Ilusionista (sábado 3 de novembro), O caso é ter saúde – Malasombra Producións (sábado 17 de novembro), Helena, xuízo a unha lurpia – Teatro do Atlántico (sábado 24 de novembro), Politicamente incorrecto – Sal-Monela Teatro (sábado 1 de decembro).
Todas as funcións comezarán ás 20:30 h. e a entrada será de balde.
A obra deste sábado, Fillos do sol, está escrita e dirixida por Cándido Pazó e interpretada por César Cambeiro, Adrián Ríos e Alba Bermúdez. A cabalo entre a realidade ficcionada e a fabulación dramática, o poeta Eduardo Pondal, xa octoxenario e comesto pola neurose dos seus últimos anos, confronta as súas dúbidas, medos e insatisfaccións creativas, tendo por interlocutores un personaxe nacido da súa perturbación e a xove criada da pensión na que está albergado.
A Concellería de Cultura comeza o venres 8 de xuño cun novo programa cultural dirixido aos nenos e nenas de Carral. Papeques, que é o nome deste novo ciclo, terá películas, teatro e contacontos ao longo de tres semanas deste mes de xuño.
Os venres ofreceranse tres películas clásicas de Walt Disney, comezando por Dumbo, seguindo con Peter Pan e rematando con La dama y el vagabundo. Haberá unha sesión de contacontos a cargo de Pablísimo o xoves 14, e tres obras de teatro, tanto de actor como de monicreques, no local Xente Nova de Tabeaio, os tres sábados que comprende Papeques.
Dúas das funcións teatrais están dirixidas a bebés (de 1 a 3 anos de idade). A primeira é Redondo, un espectáculo de Caramuxo Teatro para a primeira infancia que xoga coas formas. A mr. Round fascínanlle todos aqueles obxectos redondos, os máis curiosos obxectos con forma de circunferencia. Un día, na súa incesante procura atopará unha asombrosa esfera que agocha historias sorprendentes. Unha proposta visual, case sen palabras, para gozar en familia. Redondo terá lugar o sábado 9 de xuño, ás 18:00 h.
Trompicallo ofrecerá a súa obra O día que chegou unha nube e choveu o sábado 16 de xuño. Dirixido a idades de 1 a 5 anos, é un espectáculo de actor e monicreques que destaca a importancia da auga para a existencia da vida. A compañía O Aturuxo de Melpómene pechará Papeques co espectáculo Misterios, escrita e dirixida por Paula Carballeira. Será o sábado 23 de xuño. Vai dirixida a nenas e nenos maiores de 6 anos.
As localidades para todas as actividades son limitadas e é recomendable que se retiren previamente as entradas na Casa da Cultura nos dous días anteriores a cada función ou proxección. As entradas son de balde.
Papeques é unha iniciativa do departamento de Cultura do Concello de Carral que conta coa colaboración da Deputación da Coruña a través da Rede Cultural e da Xunta de Galicia co seu programa Ler conta moito.
A Coral de Mulleres de Vilaboa (Culleredo) e a Polifónica Aires de Carral ofrecerán este domingo un concerto de panxoliñas no Local Xente Nova de Tabeaio, ás 1
9:00 h.
A coral cullerdense creouse no 2008 e desde entón ten acumulado un extenso historial de concertos por diversas localidades de Galicia e España. Desde o seu nacemento a Coral de Mulleres de Vilaboa está dirixida por Antonio Piñeiro. Pola súa banda Aires de Carral, que xa acumula 36 anos de existencia, ten desenvolto un extenso repertorio, do que parte foi publicado no seu disco Ecos de Carral no 2013. O seu director é Juan José Gordillo.
A entrada ao concerto é libre e pídese puntualidade para evitar molestias durante as actuacións.
A compañía de teatro amador O Aturuxo de Melpómene pechará o ciclo de teatro que organiza o Concello de Carral. Farao con Terapia de bar, unha comedia de terror, vicios e manías. O bar “Da Costa” é un bar perdido no medio do monte, onde rara vez para ninguén e cando o fai, non volve nunca máis. A propietaria e os seus dous únicos clientes habituais, movidos polo aburrimento e tamén polo seu desequilibrio psíquico, deciden converterse en salvadores da humanidade e elaboran un plan para eliminar do mundo os vicios que segundo eles son os culpables de todos os males do ser humano: o xogo (aínda que sexa a brisca), os avances tecnolóxicos (aínda que só sexa unha chamada polo móbil) e a ambición desmesurada polo diñeiro (aínda que o único síntoma sexa non deixar a propina axeitada).
A función terá lugar o vindeiro sábado 2 de decembro, ás 20:30 h. no local Xente Nova de Tabeaio. É un espectáculo para todos os públicos e con entrada de balde. Prégase puntualidade, xa que non se permitirá o acceso á sala unha vez iniciada a obra.
Esta función teatral está incluída na Rede Cultural da Deputación da Coruña.
Concello: 981670002
Policía local: 689544311 / 981670002
Protección civil: 112
Casa da cultura/bibliotecas: 981672580
Edif. Social Toñito Espiñeira: 981613520
Centro de saúde:981672186
