O Concello de Carral ten por obxetivo establecer axudas complementarias para a financiación parcial de gastos ocasionados pola adquisición de libros de texto, material escolar, gastos de comedor escolar, transporte por estudos e gastos por pago de tasas e matrículas do alumnado matriculado en estudos durante o curso académico 2021/2022.

BENEFICIARIOS:

Estando empadroados/as no concello de Carral, as persoas que se atopen nalgunha/s das circunstancias seguintes:

2. a) Estudantes de 2.º ciclo de educación infantil que cursen os seus estudos durante o curso 2021/2022 en centros de carácter oficial, públicos ou concertados.
3. b) Estar matriculados/as en calquera curso dos estudos de educación postobrigatoria (ciclos formativos, bacharelato ou similares) durante o curso 2021/2022 nun centro de carácter oficial, público ou concertado.
4. c) Estar matriculados/as na formación profesional básica durante o curso 2021/2022 nun centro de carácter oficial, público ou concertado.
5. d) Estar matriculados/as durante o curso 2021/2022 en calquera curso das seguintes ensinanzas universitarias do sistema universitario español realizados en centros españois, públicos ou privados, con validez no territorio nacional: ensinanzas conducentes a títulos oficiais de Grao ou Mestrado/Máster (non Doutoramento); ensinanzas universitarias conducentes aos títulos oficiais de Licenciado/a, Enxeñeiro/a, Arquitecto/a, Diplomado/a, Mestre/a, Enxeñeiro/a Técnico/a e Arquitecto/a Técnico/a.

PRAZO:

Do 25 de maio ata o 14 de xuño tedes para presentar a documentación para solicitar axudas ao estudo relativas ao curso 2021/2022

SOLICITUDES:

Os anexos de solicitude podedes atopalos xunto coas bases  no boletin do 8 de abril. Tamén dispodes delas  no concello ou no Edificio Toñito Espiñeira.

Entregar pola sede electrónica ou no rexistro municipal.

COMPATIBLE COAS AXUDAS DO MINISTERIO DE EDUCACIÓN.

Modelo solicitude axudas ao estudo curso 2021/2022

Bases reguladoras axudas ao estudo curso 2021/2022

Carral exaltará, ao longo da fin de semana, un dos seus produtos estrela: o seu pan. Farao coa celebración da XVIII Festa do Pan, organizada polo Concello e pola Asociación de Panadeiros. A Casa do Concello acolleu, esta mañá, a presentación da décimo-oitava edición, un acto no que estiveron presentes o alcalde, Javier Gestal, os concelleiros do goberno e representantes das panaderías participantes: Panadería Bonome Bouzas, Panadería Da Cunha, Panadería Manuel Rodríguez e Hijos, Panadería Mercedes, Panadería O Pincho, Panadería Paraíso, Panadería Pedro Fernández e Panadería Insua. Tanto o equipo de goberno como os propios artesáns encaran a celebración con “ilusión” e coa previsión de alcanzar unha cifra histórica: a de 8.000 bocadillos cardiosaludables vendidos na fin de semana.
Á venda e exaltación deste produto hai que sumar, ademais, a feira medieval, así como outra das propostas que solicitan unha maior aceptación na festa: os obradoiros de elaboración de pan para os nenos e nenas. Estas actividades realizaranse tanto o sábado, 7 de maio, como o domingo, día 8. Outra das grandes atraccións da feira será, sen dúbida, o clásico bocadillo cardiosaludable, elaborado a base de tomate, xamón serrano, aceite e, por suposto, pan de Carral.
O programa do sábado incluirá a actuación da charanga Noroeste, que interpretará temas durante todo o día, e a realización de talleres de xogos tradicionais a cargo de ACNUR e doutros artístico-lúdicos e de olaría. Todas as actividades para os pequenos e pequenas comezarán ás 16.30 horas. Ás 17.00 horas está prevista a exposición dos traballos feitos polo alumnado do CEIP Vicente Otero Valcárcel e a organización do primeiro pase do espectáculo de animación ‘O circo’. O pregón terá lugar ás 21.00 horas e, ás 21.30 horas, a orquestra Claxxon pechará a xornada cun concerto.
A segunda e última xornada do programa arrincará o domingo, ás 11.00 horas, co inicio da exposición e venda de pan e do bocadillo cardiosaludable e cos obradoiros para os pequenos. A esa hora levarase a cabo tamén unha exhibición de cetrería e, ademais, a charanga Alambique poralle o toque musical á mañá. Ás 12.30 horas está prevista a misa solemne e, ás 14.00 horas, a sesión vermú a cargo da orquestra Miramar. A oferta para os nenos e nenas retomarase en horario de tarde, a partir das 16.30 horas. A Asociación de Baile ‘O Rueiro’ de Tabeaio actuará ás 17.00 horas e, a continuación, o público asistente poderá gozar do espectáculo de animación ‘Bufóns e Trobadores’. O evento pecharase ás 20.00 horas coa música da orquestra Miramar.
Durante a presentación, o rexedor agradeceu “a enorme implicación e esforzo que os panadeiros realizan ao longo destes días, nos que ademais do traballo habitual nos seus obradoiros hai que sumar o que fan na Festa do Pan”.

O Concello iniciou, esta mañá, o proxecto para mellorar e acondicionar a zona de aparcamento anexa ao Campo da Feira. Precisamente, debido á execución destes traballos, o acceso a esta área de estacionamento estará cortado ata que conclúan os labores.

Sempre que as condicións climatolóxicas o permitan, a previsión é que estas obras finalicen nos próximos días.

A área, situada en pleno núcleo urbano e a escasos metros do Concello, está moi concorrida. Con todo, o firme é irregular e presenta varias fochas. O proxecto do Concello permitirá reordenar o tráfico neste punto, renovando o firme e creando novas zonas axardinadas para delimitar as prazas de aparcamento.