O Festival Internacional de Títeres Galicreques do Consorcio das Mariñas segue coa súa programación, cunha nova representación este sábado no edificio social Toñito Espiñeira.
A función será ás 18:00 h, con Sapo y Sepo en abstracto de Títeres Larderos (Castela A Mancha). É un espectáculo infantil para maiores de 2 anos no que Sapo e Sepo son amigos inseparables, non saben vivir o un sen o outro. Os dous xuntos saen de paseo, coidan o xardín, buscan botóns e viven emocionantes aventuras. É unha pequena homenaxe ao Museo Abstracto de Cuenca, que no ano 2016 cumpre 50 anos, con ambientación e decorados en branco e negro, seguindo o estilo de Antonio Saura.
A entrada ao espectáculo é de balde e o aforo limitado.

Despois dos éxitos acadados por Yésica Val e Sergio Pazos nas dúas primeiras funcións dos Venres de Monólogo de Carral, Isabel Risco presentará o seu personaxe Nabiza Girl para pechar este ciclo que organiza a Concellería de Cultura do Concello de Carral.

Risco presentará o seu espectáculo este venres ás 21:00 h, no edificio social Toñito Espiñeira. A entrada é libre e o aforo limitado.

OLYMPUS DIGITAL CAMERA

Isabel Risco será Chelo Garcia Naveira, máis coñecida como Naviza Girl, unha superheroína rural galega con denominación de orixe protexida con poderes que proveñen do sulfato e que acode ás chamadas de socorro de quen precisa do seu auxilio. Non se sabe se poderá atender ás necesidades de axuda de quen chama por ela, mais as risas están garantidas.

Isabel Risco é actriz, clown e pedagoga teatral. Desde o ano 2000 participa en espectáculos profesionais nas compañías Espello Cóncavo, Os sete magníficos máis un, Manicómicos e Produccións Desaqueloutradas, coas que ten participado nalgúns dos festivais de teatro e clown máis importantes da península.

No ámbito do audiovisual, traballa como actriz secundaria e protagonista en series como Padre Casares, A vida por diante, O Nordés ou Air Galicia, e outros programas da TVG como O Show dos Tonechos, En Pé de Festa, Zapping Comando, Máxima Audiencia, etc., e ultimamente en A Solaina, BumBumBumeran, Land Rober e Tourilandia; ademais de realizar curtas, publicidade e algunha longamentraxe, como Os mortos van de présa, Onde está a felicidade? ou 9 Ondas.

Hoxe chega ao ciclo Venres de Monólogo o actor Sergio Pazos, que presentará “Rebento se non o conto” ás 21:00 h. no edifico social Toñito Espiñeira.

Un galego recoñecido, ou recoñecible segundo se mire, atrévese a analizar unha realidade tan próxima e tan afastada como a que conforma España. Destripa os seus tópicos, as súas mentiras piadosas e as súas medias verdades coa ironía como único bisturí. E sempre coa percepción dun tipo que sae da súa terra para traballar. Como tantos outros. No fondo, é o que di Sergio: “hai máis galegos fóra que dentro”. Falou Pazos e falou ben.

No seu percorrido retranqueiro desta realidade reflexionará sobre os monólogos e de por que el non os fai (ou si), sobre xeito de sermos os galegos e sobre a idiosincrasia de Mariano Rajoy (que é galego ao 100%).  Tamén esmiuzará a apocalipse, os recortes e, sobre todo, falará da crise: na Casa Real, dos políticos, do goberno, entre outras cousas.

A entrada á función é libre ata completar o aforo.