O novo equipo de goberno do Concello de Carral puxo en marcha o Premio 8 de marzo, unha iniciativa que suscitou un gran interese entre os carraleses e carralesas. Tanto é así, que nesta primeira edición do certame presentáronse un total de sete candidaturas de mulleres vinculadas ao municipio. O broche de ouro do Premio será este domingo, 8 de marzo ás 12.00 horas, no salón de plenos do Concello de Carral. Ese día, coincidindo coa conmemoración do Día Internacional da Muller, realizarase unha homenaxe en recoñecemento á elixida.

Durante o prazo de inscrición, os veciños e veciñas, asociacións e entidades rexistradas no Rexistro Municipal do Concello de Carral puideron presentar como candidata a calquera muller vinculada ao municipio –xa fora por nacemento ou por vinculación persoal, laboral ou profesional-. Agora, o xurado deberá elixir á gañadora do recoñecemento. Ao non poderse constituír o Consello da Muller de Carral, o tribunal estará composto pola concelleira de Igualdade, por un ou unha representante de cada grupo político presentado nas últimas eleccións e por unha das traballadoras sociais do Concello.

Tal e como explican desde o goberno local, as candidatas ao Premio pertencen a sectores laborais diferenciados. Ademais, algunhas das candidaturas están vinculadas a mulleres que yan faleceron, pero outras son de carralesas que seguen en activo a día de hoxe.

O goberno local iniciou esta medida para conseguir varios obxectivos: por unha banda, visibilizar e poñer en valor o papel das mulleres do municipio e, polo outro, promover o seu empoderamento. Desde o goberno sinalan “ou gran interese que esta convocatoria tivo entre vos carraleses e carralesas” e animan a todos os veciños e veciñas a “asistir ao acto de recoñcemento do domingo”.

Carral practicou, durante toda a semana, o seu acento francés. Fíxoo a través do programa de intercambio no que están a participar un total de 28 alumnos e alumnas do IES de Carral e do David Buján (18 de Cambre e 10 de Carral) e os seus 28 homólogos do Collège Privè La Salle (Annecy, Francia).
O salón de plenos do Concello acolleu hoxe, 20 de febreiro, a recepción oficial dos estudantes que están a tomar parte nesta iniciativa. Ao acto acudiron varios membros do goberno local, así como profesorado dos tres centros educativos. Ao remate do acto, os mozos degustaron unha deliciosa maridaxe de pan de Carral e queixo francés.
Como parte do planning de actividades semanal, os mozos gozaron de xogos, roteiros de sendeirismo –como a que fixeron a Costa da Égoa- e excursións, como a saída a Santiago de Compostela. Unha das actividades que máis gustou aos franceses foi a visita a unha panadería de Carral. Durante a súa estancia no obradoiro, os mozos e mozas aprenderon a elaborar pan de Carral. En marzo, serán os de Carral e Cambre os que se despracen ata Annecy para completar a experiencia.

O novo equipo de goberno recibiu esta semana a resposta ás alegacións ao Plan de Transporte Público da Xunta presentadas no mes de agosto. A Consellería de Transporte e Mobilidade anunciou, hai uns días, importantes novidades en materia de mobilidade que supoñerán, tal e como indican desde o goberno local, “unha gran mellora nos desprazamentos diarios dos veciños e veciñas de Carral”. Entre elas, alcanzou o compromiso da Xunta para reforzar as liñas que conectan Carral coa Coruña, Betanzos e Cambre. Con todo, tal e como sinala o equipo de goberno, “aínda quedan moitas cousas que mellorar en materia de transporte”. Así mesmo, tal e como puntualiza o goberno, “algunhas dás peticións que fixemos non se responderon coas condicións esixidas”.

Por unha banda, o goberno conseguiu a mellora da conexión cos institutos de Betanzos mediante a ampliación da liña Xeixade-Betanzos a Tabeaio e a adaptación do horario da mesma. No mes de agosto, o equipo de goberno solicitou, precisamente, a ampliación desta liña para que pasase por Tabeaio, segundo núcleo con maior poboación de Carral. O goberno local lamenta que, a pesar das súas reiteradas peticións, esta parroquia siga sen ter conexión directa co IES David Buján (Cambre).

Esta liña é moi utilizada polos mozos que estudan nos institutos da cidade. Por esa razón, o goberno segue vendo as frecuencias do autobús “moi xustas”.

Doutra banda, lográronse seis novas expedicións na liña que une o municipio coa Coruña (catro máis de luns a venres e dous os domingos e festivos). Así mesmo, o goberno alcanzou o compromiso de que se mellorará a funcionalidade dos roteiros que conectan o municipio coa Coruña mediante a alternancia de expedicións entre as liñas que teñen como orixe Carral (Panteón) e Santa María de Vigo.

Outra das solicitudes do goberno local foi a mellora da liña Os Campóns- Carral (Panteón), que os veciños e veciñas utilizan para acudir ao PAC de Cambre. O goberno conseguiu catro novas expedicións que se realizarán durante as fins de semana e festivos.

Unha das novidades máis importantes será para os veciños e veciñas de Cabrois, que dispoñerán dunha parada nas liñas que conectan Entrexardíns e a Urbanización Monte Xalo.

Tal e como explica o goberno, a conexión das parroquias de Carral co núcleo urbano segue sendo “unha conta pendente, e seguiremos traballando para conseguilo”. Ademais, o equipo de goberno segue vendo “insuficiente” a conexión do concello cos hospitais da Coruña (CHUAC, Materno e Abente e Lago).

Por último, o goberno conseguiu que se inclúa unha parada antes do outlet do Corte Inglés e outra no Polígono Vos Capelos.