Carral reivindicouse, un ano máis, como capital da empanada. Fíxoo, ademais, con récord de vendas na que é xa a 49ª edición da súa festa na honra a este produto.

As panadarías participantes, Panadaría Mercedes, Panadaría Pedro Fernández, Panadaría Cañás e Panadaría Da Cunha, puxeron o seu forno a todo funcionamento para lograr vender, ao longo desta xornada, ata 12.000 racións deste produto.

Trátase dun dos eventos máis agardados no municipio xa que a empanada é, xunto co pan, o seu produto estrela. Ademais, está consolidada como unha das citas gastronómicas de referencia en toda a comarca.

Nel, veciños e visitantes puideron gozar da degustación de diferentes variedades do produto, habendo dispoñibles racións de empanada de bonito, bacallau e polo (5 euros) e de zamburiñas, polbo e bacallau con pasas (7 euros).

Son xa corenta e nove edicións nas que as panadarías “dobran o seu traballo para poder, así, chegar a estas cifras de venda. É un evento con gran arraigo entre os nosos veciños e veciñas, pero tamén unha cita de referencia para moitas persoas que veñen de fóra para probar a empanada”, sinalou o alcalde, Javier Gestal.

Ao longo da tarde non faltou a música. O grupo de música tradicional ‘Arnela’ e ‘Embruxo Gaiteiros’ foron os encargados de amenizar a tarde dunha xornada que continuará pola noite, a partir das 22:00 horas, coas orquestras París de Noia e Zona Zero nas Festas do Socorro de Carral.

En relación ao convenio entre a Xunta de Galicia, a FEGAMP e SEAGA, en materia de prevención de incendios forestais, informámosvos do seguinte:

• Vanse volver a realizar inspeccións do estado da xestión da biomasa nas faixas secundarias das parroquias definidas no Plan municipal de prevención e defensa contra incendios forestais do Concello.
• Lembramos ás persoas propietarias das parcelas particulares dentro destas faixas que deberán levar a cabo a xestión de biomasa e retirada de especies arbóreas prohibidas.

Carral clausura este venres, 30 de agosto, os cursos de natación impartidos ao longo deste mes nas piscinas municipais.

Neste día os nenos e nenas participantes poderán gozar dunha xornada lúdica, con diferentes xogos e actividades para o seu libre desfrute.

Un total de 61 nenos e nenas con idades comprendidas entre os 3 e os 13 anos participaron nas clases, que foron impartidas por monitores especialistas e sempre coa presencia dun socorrista.

As sesións, de 45 minutos de duración, dividíronse en tres grupos segundo a súa idade e, en cada un deles, establecéronse dous: un de iniciación e outro de perfeccionamento.

Este mesmo día tamén terá lugar a clausura dos campamentos de verán, iniciados o pasado 1 de xullo e no que participaron arredor de 110 nenos e nenas por semana.

Ao longo destes dous meses, a cativada gozou de múltiples actividades nas instalacións deportivas do colexio Vicente Otero Calcárcel, no local interxeracional, nas piscinas municipais, no complexo deportivo de Paleo e na área recreativa da Brexa.

Todas elas permitíronlle coñecer máis sobre as diferentes disciplinas deportivas da localidade, dos deportes tradicionais e outros vencellados á natureza, etc.

Festa da auga e xadrez para despedir o verán

O sábado, día 31, terá lugar a cuarta edición da Festa da Auga para clausurar, así, a tempada de piscina, que pecharán as súas portas o 8 de setembro.

Esta actividade, que será de acceso libre, desenvolverase de 16:00 a 20:00 horas, tempo no que as persoas participantes poderán gozar de inchábeis e dunha festa da escuma para pechar a xornada.

Durante este tempo, co obxectivo de atender a sobredemanda de xente nas piscinas, reforzarase o servizo de socorrismo. Ademais, estará presente o servizo municipal de emerxencias e a agrupación de voluntarios de Protección Civil.

De maneira paralela, no pavillón de Espiño levarase a cabo, entre as 16:00 e as 20:30 horas, a undécima edición do Torneo de Xadrez de Verán.

Agárdase a participación de, aproximadamente, 60 persoas de toda a xeografía galega. Estableceranse catro categorías: absoluta, sub14, sub10 e local. Recibirán trofeo os tres mellores de cada unha delas.

A competición, que contará con árbitro federativo, constará de sete roldas cun incremento de tres segundos.