PUBLÍCANSE AS LISTAXES DE ADMITIDOS NOS CAMPAMENTOS DEPORTIVOS DE NADAL

INFORMACIÓN XERAL SOBRE OS CAMPAMENTOS DEPORTIVOS DE NADAL

LISTAXE DE ADMITIDOS


DATAS E Nº DE PRAZAS:

– 1ª semana: do 23 ao 27 de decembro (60 prazas)

– 2ª semana: do 30 de decembro ao 3 de xaneiro (60 prazas)

HORARIOS: (luns a venres, excepto festivos) 

1. Servizo Madrugadores: 7.30 a 10.00 h *
2. Campamentos: 10.00 a 14.00 h, ESTE HORARIO SERÁ “OBRIGATORIO” PARA TODOS OS NENOS/AS, non       podendo nin entregar nin recoller aos nenos/as durante o mesmo salvo excepcións previamente                          comunicadas.
3. Tempo de Xantar: 14.00 a 16.00 h *

*Nota. Os nenos/as que fagan uso destes horarios deberán traer o seu almorzo ou xantar da casa.

LUGAR: 

No recinto escolar do Colexio Vicente Otero Valcárcel – (ubicación: 43.224984, -8.354894) -; pavillón polideportivo cuberto, pista polideportiva descuberta, zona axardinada, patio escolar cuberto, comedor escolar, aula psicomotricidade)

DESTINATARIOS:

1. Para nenos/as dende Educación Infantil (dende 3 anos) e toda a Educación Primaria.

PREZO:  30 €/semana (consultar condicións dos campamentos)

              + 9,25 €/semana pola opción de madrugadores/tempo de xantar.

OBSERVACIÓNS NA INSCRICIÓN:

  1. Prazo entre o 11 (09:00 h) e o 18  de decembro (12:00 h).
  2. Prazas limitadas (60/semana). 
  3. CRITERIOS DE ADXUDICACIÓN DAS PRAZAS: 

                – Por orde de inscrición ou ata esgotar a oferta.
                – Preferencia aos empadroados/as en Carral ou matriculados nos centros educativos da localidade. 

       4. Publicación das listaxes: 19 de decembro (pago do 19 ao 22 de decembro)

Máis info na Casa da Cultura (981.67.25.80) ou en casadacultura@carral.es

/by

XXIII TORNEO DE XADREZ DE NADAL EN CARRAL

A concellería de deportes agarda a uns 50 inscritos para este clásico torneo do 22 de decembro.  Read more

/by

CARRAL REPARTIRÁ 2.000 EUROS EN PREMIOS DURANTE A SÚA CAMPAÑA DE COMERCIO DE NADAL

Outro ano máis, Carral celebrará a súa campaña de turismo, a XXX edición, co obxectivo de seguir traballando no impulso de medidas que promovan a actividade turística e comercial durante o Nadal.


Así, ademais do concurso Tapeando Carral, celebrado recentemente, o Concello porá en marcha unha nova edición da súa campaña Volve a Carral no Nadal, na que se repartirán 2.000 euros en premios ás persoas que fagan as súas compras nos negocios adheridos.


A iniciativa estará en funcionamento durante un mes, entre o 12 de decembro e o 12 de xaneiro de 2025. Durante eses días, as persoas que realicen as súas compras nos comercios adheridos poderán optar a premios de entre 100 e 300 euros. En total, o Concello repartirá 25.000 rascas entre os que se atoparán dous galardóns de 300 euros, catro de 200 e seis de 100.


O funcionamento da iniciativa é sinxelo: as persoas que fagan o consumo mínimo recibirán un rasca. No caso de resultar agraciada, a persoa deberá entregar o boleto premiado no Concello, xunto co ticket de compra, ata o 30 de xaneiro. A cambio, expediráselle un cheque coa contía correspondente.

Consulta as bases aquí.

/by

ÁBRESE O PRAZO DE INSCRICIÓN NOS CAMPAMENTOS DEPORTIVOS DE NADAL

Carral abre este mércores, 11 de decembro ás 9:00 h, o prazo de inscrición nos campamentos de Nadal, un programa co que o Concello busca favorecer a conciliación entre as familias do municipio. O período de inscrición estará aberto ata o 18 de decembro ás 12.00 h, dándolles aos veciños e veciñas a posibilidade de inscribir aos nenos e nenas nalgunha/s das 2 semanas que se ofertan dende o 23 de decembro ata o 3 de xaneiro.

Como nas últimas edicións, o Concello mantén o horario ampliado destas actividades. Deste xeito, os pequenos e pequenas poderán ser atendidos entre as 7.30 ata as 16.00 horas xa que, ademais das propias actividades dos campamentos (10.00-14.00 h), o Concello ofrece servizos opcionais de Madrugadores (de 7.30 a 10.00 horas) e de tempo de xantar (de 14.00 a 16.00 horas).

Estes campamentos, dirixidos a rapaces e rapazas de Ed. Infantil e Ed. Primaria, levaranse a cabo durante as vacacións de Nadal en quendas semanais (2) e terán unha temática deportiva, con especial atención aos deportes de inverno e as disciplinas locais. Ofertaranse 60 prazas/semana, tendo preferencia os nenos e nenas empadroados ou os que acudan aos centros de ensinanza de Carral.

O prezo destes campamentos é de 30,00 €/semana, e o prezo polo uso do servizo opcional de madrugadores (7:30-10.00 h)/tempo de xantar (14:00-16:00): 9,25 €/semana.

As persoas interesadas poderán tramitar a inscrición cubrindo o boletín dispoñible na páxina web do Concello ou, se o prefiren, cubrindo o formulario online disposto para tal fin. Como noutras convocatorias, as persoas interesadas terán a posibilidade de inscribir aos nenos e nenas por semanas soltas. Máis información na Casa da Cultura de Carral – casadacultura@carral.es – 981.67.25.80.

/by

O 5 DE DECEMBRO ABRE O PRAZO PARA PARTICIPAR NA CABALGATA DE REIS

O Concello de Carral abre mañá, 5 de decembro, o prazo de inscrición para participar na Cabalgata de Reis que se celebrará o 5 de xaneiro.

Poderán anotarse todos os nenos e nenas menores de idades, nados entre o ano 2016 e o 2018, tendo preferencia os e as empadroadas no Concello de Carral.

As inscricións poderán realizarse presentando o ANEXO I, no rexistro municipal ou na sede electrónica, ata o 18 de decembro as 15:00 horas.

Consulta as bases nesta ligazón.

Anexo-I-inscricion-autorizacion-1Descarga
/by

SORTEO DAS PRAZAS (6) DA CAMPAÑA DA NEVE DA DEPUTACIÓN DA CORUÑA

En cumprimento do punto 3.d das bases reguladoras da convocatoria da “Campaña da Neve da Deputación da Coruña para o ano 2025”,, comunícase a todos os interesados que o MÉRCORES 4 DE DECEMBRO, ÁS 10.00 H NO SALÓN MUNICIPAL DE PLENOS terá lugar o SORTEO PÚBLICO DAS 6 PRAZAS ADXUDICADAS A ESTE CONCELLO, ASÍ COMO A ORDE DOS SUPLENTES.

Aquí podedes consultar as bases do sorteo

/by

CARRAL ORGANIZA OUTRA EDICIÓN DE ‘PAPEQUES’ E OFRECE 7 FUNCIÓNS DE TEATRO, CINE, CONTACONTOS E MAXIA PARA A RAPAZADA 

Carral ofrecerá, ao longo do mes de decembro, unha nova edición do seu programa de espectáculos infantís ‘Papeques’, dirixido aos nenos e nenas do municipio durante este Nadal. 

A programación arrincará o vindeiro 5 de decembro, e prolongarase ata o 20 de decembro. Ao longo das vindeiras semanas, os pequenos e pequenas poderán gozar de funcións de teatro, contacontos, cine e maxia.

A primeira actividade terá lugar o xoves, 5 de decembro ás 18.00 horas, no edificio Toñito Espiñeira. A compañía Pérez&Fernández tráenos o ‘Rosa e Azul’, un contacontos dirixido ao público familiar que quere gozar das novas narrativas da literatura infantil. 

O programa continuará o sábado, 7 de decembro ás 18:00 horas, no edificio Toñito Espiñeira con “CABICIVAI” de Pablísimo. O xoves 12 de decembro, ás 19.00 horas, terá lugar a proxección da película “La Navidad en sus manos” na Casa da Cultura. 

A primeira función teatral terá lugar o venres 13 de decembro, ás 19:00 horas, no local Xente Nova de Tabeaio. A interpretación correrá a cargo da Asociación Teatral Paso de Valverde con “Os Contos Clásicos de Tía Carolina”. Un día despois, a agrupación Pedras de Cartón realizará a función ‘Contos de William Shakespeare’, o sábado 14 de decembro, ás 18.00 horas, no edificio Toñito Espiñeira.  

O calendario continuará coa obra ‘O que non sabías do Nadal’, da compañía Trinketrinke Teatro, que terá lugar o xoves, 19 de decembro, ás 18:00 horas, na Casa da Cultura. Para esta función será preciso reservar praza chamando ao 981 672 580.

Este ciclo pecharase coa ‘Gala de Maxia’ de Dani García. Será o venres, 20 de decembro ás 19:30 horas no local Xente Nova de Tabeaio.  

Todas as actividades, agás a do 19 de decembro, serán de libre acceso ata completar aforo e desde o Concello prégase puntualidade para non interrumpir o desenvolvemente dos espectáculos. 

‘Papeques’ conta coa colaboración da Deputación da Coruña, a través da súa Rede Cultural, e co apoio do Instituto para a Transición Justa e a Fundación Ciudad de la Energía (CIUDEN) a través do programa Dinamiz-artj.

/by

ENTREGA GRATUÍTA DE COMPOSTEIROS EN CARRAL

O Consorcio As Mariñas inicia unha nova campaña de compostaxe doméstica coa distribución de 1.700 composteiros de baldeentre a veciñanza dos oito concellos que o conforman: Abegondo, Bergondo, Betanzos, Cambre, Carral, Culleredo, Oleiros e Sada. Esta iniciativa busca fomentar a separación e reciclaxe en orixe de biorresiduos mediante a compostaxe doméstica nos fogares que dispoñan dun pequeno terreo.

Material e inscricións

A campaña inclúe a entrega de composteiro, aireador, peneira e termómetro, que se repartirán tras a asistencia a unha das sesións formativas programadas nos diferentes concellos. A participación é totalmente gratuíta, e as persoas interesadas só teñen que rexistrarse previamente a través da páxina web: https://consorcioam.rsu.gal.

Xornadas formativas

As sesións formativas teñen como obxectivo ensinar á veciñanza o uso correcto do composteiro, así como os beneficios ambientais e económicos desta práctica. Estas son as datas e localizacións dispoñibles ás que poderá acudir toda a veciñanza que o desexe:

  • Local de Cañás – 3 de decembro ás 19:00 h
  • Local de Barcia – 12 de decembro ás 19:00 h
  • Local de Tabeaio – 16 de decembro ás 18:00 h

Un compromiso coa sostibilidade

Esta campaña é unha mostra do compromiso do Consorcio As Mariñas coa educación ambiental e a promoción de prácticas sostibles. A compostaxe doméstica permite reducir os residuos enviados a vertedoiros, diminuír a pegada de carbono e obter un fertilizante natural de gran calidade.

Trátase de actuacións cofinanciadas polo fondo europeo relativo ao Mecanismo de recuperación e resiliencia da UE no marco do Plan de recuperación, transformación e resiliencia, financiado pola Unión Europea-NextGenerationEU, a través da subvencións covocadas pola Consellería  de Medio Ambiente, Territorio e Vivenda da Xunta de Galicia.

Máis información

Para calquera dúbida ou consulta, pode chamar ao 981 784 704, escribir a info@consorcioam.org ou rexistrarse directamente en https://consorcioam.rsu.gal.

/by

VOLVE TAPEANDO CARRAL, O CONCURSO PARA IR ABRINDO BOCA E IMPULSAR O CONSUMO NO TECIDO HOSTALEIRO ANTES DO NADALVOLVE

O Concello organiza, outro ano máis, unha nova edición do seu concurso Tapeando Carral, unha iniciativa coa que o goberno local busca un claro obxectivo: impulsar o consumo no tecido hostaleiro e dar a coñecer a ampla oferta do municipio antes da campaña do Nadal. 

A iniciativa levarase a cabo entre o xoves, 5 de decembro, e o domingo, día 8, e contará coa participación de 10 locais que farán as delicias do público asistente. 

O goberno local confía en que o certame acade unhas cifras de participación similares ás das edicións anteriores: “esperamos que a veciñanza volva a desfrutar deste certame e teña a mesma afluencia que nos últimos anos sendo esta medida, unha vez máis, un revulsivo para promover o consumo nos establecementos, dándolle así máis vida á nosa vila”. 

Nesta ocasión, o certame municipal contará coa participación dos seguintes negocios: Boca Grande, Pizzería Centro, Bar Tropezón, Bar Adolfo, Vinoteca A Taberna XXI, Dopincho, Terra, O Lareiras, A Parola e Costa da Egoa.

O concurso levarase a cabo entre o xoves, 5 de decembro, e o domingo, día 8. O xoves, as elaboracións dos participantes poderán degustarse desde 20:00 horas e o domingo, estarán dispoñibles de 12:30 a 15.30 horas. O venres e sábado, o público poderá probar as receitas en xornada de mañá en tarde, entre as 12.30 e as 15.30 horas e as 20.00 e as 23.00 horas. 

Como en anteriores edicións, haberá premios tanto para os locais participantes como para os propios comensais. Por unha banda, os establecementos poderán optar ao premio á Tapa Máis Popular (elixida polos propios clientes) e ao de Mellor Tapa (neste caso, será un xurado profesional o que outorgue o galardón). 

Pola outra, unha vez que o cliente acade un número mínimo de selos diferentes terá a posibilidade de facerse tamén con agasallos e recompensas. Neste caso, a persoa terá que cumprir o cupón cos diferentes selos e depositalo nas furnas que estarán situadas nos negocios.

Haberá un primeiro premio para as persoas participantes que teñan o 100% dos selos cumprimentados, un segundo premio para as persoas que teñan polo menos o 75% dos selos e un terceiro premio para as persoas participantes que teñan como mínimo o 50% dos selos. O sorteo terá lugar o 20 de decembro, ás 20:00 h.

O concurso, organizado polo Concello de Carral, realízase en colaboración coas empresas Estrella Galicia, Exclusivas Rivas Suárez, Jamones y Embutidos Elote e Bodegas As Laxas. 

Actividade subvencionada pola Deputación da Coruña

/by