O Concello celebrou un pleno no que se aprobou a proposta do goberno local para bautizar a senda peonil que une Carral e Tabeaio co nome de Martín Cortés Cacheiro. Este veciño, natural de Tabeaio, faleceu no ano 2018 e, ao longo da súa vida, contribuíu a mellorar os servizos, infraestruturas e, en xeral, a calidade de vida dos carraleses e carralesas. Durante a súa intervención, o alcalde, Javier Gestal, definiuno como “unha persoa moi querida e implicada na vida social da parroquia”.

No 1998, e ao non existir instalacións de titularidade municipal, deportiva e/ou cultural en Tabeaio, acordou coa Administración local a cesión dos terreos nos que, posteriormente, o Concello construíu a actual pista polideportiva da parroquia. Tal e como se recollía na proposta elevada a pleno, este espazo supuxo un gran impulso no fomento da actividade física e o deporte en Tabeaio. Esta operación implicou, así mesmo, a cesión dos terreos anexos á entidade cultural Xente Nova para a construción dun local social que, a día de hoxe, segue tendo un crecente uso.

A iniciativa parte dunha solicitude dos propios residentes da parroquia, así como dos familiares de Cortés Cacheiro, cos que tanto o alcalde como membros do goberno local mantiveron varias reunións. A proposta recibiu luz verde por unanimidade dos votos da corporación (Alternativa dos Veciños, PSOE, PP e a concelleira non adscrita).

Reforma das pistas deportivas

O pleno acordou, así mesmo, solicitar á Deputación da Coruña unha subvención nominativa para financiar a reforma das pistas deportivas da rúa Paleo. O rexedor alcanzou o apoio do ente provincial para destinar 89.684 euros á execución deste proxecto, que supoñerá unha importante mellora na instalación. A contía restante, 22.421 euros, procederán das arcas municipais.

Actualmente, o lugar está ocupado por dúas pistas de tenis que se atopan en malas condicións e que están en desuso. As obras supoñerán a reforma dunha das pistas e a creación doutra multideporte, dun skatepark e dun lavadoiro de bicicletas que se situará nun punto estratéxico polo que pasan moitos ciclistas cando baixan desde o Monte Xalo. O plan incluirá, ademais, a substitución da iluminación actual por outra con tecnoloxía LED e a instalación de bancos na zona.

A proposta aprobouse cos votos a favor de Alternativa dos Veciños, do PP e da concelleira non adscrita, que sinalaron a necesidade de acometer este proxecto, e coa abstención dos concelleiros do PSOE.

O goberno local reafirma así a súa aposta por mellorar as dependencias deportivas do municipio. Seguindo a mesma liña de traballo, o Concello acometerá a ampliación do Centro Deportivo de Carral.

Por último, o pleno aprobou, por unanimidade dos votos, o Plan de Prevención e Defensa contra os Incendios Forestais.

O Concello de Carral organiza unha actividade de voluntariado de sensibilización ambiental “Basuraleza” en algúns tramos do Camiño de Santiago (Camiño Inglés), coa finalidade de mellorar a situación ambiental do noso municipio.

O “Proxecto Orixe, Facemos camiño” está financiado pola marca Cabreiroá e impulsado pola asociación “SEOBIRDLIFE”, e poñera a disposición de todas as persoas voluntarias, un educador/a ambiental e os materiais necesarios para levar a cabo a actividade.

Por motivos de seguridade e para cumprir as normas anticovid-19, o grupo será dun máximo de 20 persoas.

• Día da xuntanza: 11 de xullo
• Hora: 10:00-13:00 horas
• Punto de encontro e saída: local social de Sergude
• Datas de inscrición: desde o 5 de xullo ata 8 de xullo
• Máis información: Concello de Carral (departamento Medioambiente)
• Teléfonos: 981 67 00 02 e 678 338 873

Carral acaba de mergullarse, de cheo, na época de verán co inicio dos cursos de natación, que arrincaron hoxe, xoves 1 de xullo, e se prolongarán ata finais de agosto. Trátase dunha das propostas deportivas e de lecer que o Concello ofrece, ano tras ano, e que forma parte xa da axenda estival do municipio.

As sesións do mes de xullo contarán coa participación dun total de 30 nenos e nenas de entre 3 e 15 anos. Porén, os cursillos levaranse a cabo en dúas quendas con 15 usuarios e usuarias cada unha: a primeira terá lugar de luns a venres de 12.00 a 12.45 horas, mentres que a segunda será os mesmos días de 13.00 a 13.45 horas.

Co fin de garantir o cumprimento da distancia interpersoal entre os mozos e mozas, en cada quenda haberá, á súa vez, dous grupos.

Carral viviu, esta semana, o pistoletazo de saída da 1ª quenda dos seus campamentos de verán, cos que se favorecerá a conciliación de 136 familias do municipio ao longo das vindeiras semanas. A nova convocatoria arrincou o luns con dúas importantes novidades en materia de conciliación: por un lado, ampliando os horarios das actividades ata as 16.00 horas e, polo outro, brindándolles aos pais e nais a posibilidade de anotar aos nenos e nenas por semanas.

Os campamentos están dirixidos a nenos e nenas de 3 a 15 anos e levaranse a cabo en tres quendas con diferentes temáticas. Ata o 16 de xullo celebraranse os campamentos deportivos. Entre o 19 de xullo e o 6 de agosto levaranse a cabo os English Sport camp e, por último, os campamentos de Medio Ambiente terán lugar do 9 de agosto ao 3 de setembro.

A través de diferentes actividades de lecer, a rapazada coñecerá, nesta primeira quenda, a vida deportiva de Carral, así como as modalidades que practican os deportistas do municipio.

Co fin de axustar á organización da actividade ás medidas hixiénicas e preventivas fixadas pola Xunta de Galicia, o Concello está celebrando os campamentos no recinto do CEIP Vicente Otero Valcárcel (pavillón do colexio, pista polideportiva, patio cuberto, etc.) e no local interxeracional, sito a poucos metros do centro de ensinanza.

Os nenos e nenas poden entrar no recinto desde as 8.00 horas. Así, entre a hora de entrada e as 10.00 horas ten lugar o programa Madrugadores, entre as 10.00 e as 14.00 horas realízanse as propias actividades e, de 14.00 a 16.00 horas, é a hora da comida. Naqueles casos nos que se solicitou, os cativos e cativas poden traer o seu propio xantar da casa e poderán tomalo no comedor do colexio baixo a supervisión dos monitores e monitoras.

Medidas covid-19

Os rapaces e rapazas están separados en grupos burbulla. Antes de entrar no recinto, os usuarios e usuarias desinfectan as mans. Ademais, os maiores de 6 anos empregan a máscara de xeito obrigatorio. A maiores, o Concello establece quendas nas saídas e entradas dos campamentos co fin de evitar aglomeracións.

Carral inaugura hoxe, venres 18 de xuño, a nova tempada de verán coa apertura da piscina municipal. O Concello abre a instalación despois de realizar as seguintes melloras: arranxo da soleira da piscina, poda das árbores para garantir unha maior claridade, encintado do vaso da piscina, limpeza da beirarrúa perimetral, cambio do material filtrante por nova tecnoloxía de cristal de vidro, arranxo das bombas de filtración, pintura do peche perimetral, etc. A piscina funcionará ata o 3 de setembro de 12.00 a 21.00 horas.

Como todos os anos, o Concello ofrecerá diferentes modalidades de abono. Ademais da entrada individual diaria –que contará con bonificacións para a 3ª idade e para as persoas menores de 18-, haberá abonos familiares. Os menores de 3 anos poderán acceder de xeito gratuíto.

A piscina funcionará cun protocolo de seguridade para previr contaxios pola covid-19. O aforo máximo da zona da praia será de 75 persoas, mentres que na propia piscina poderán estar 45 á vez. Co fin de garantir a distancia social, o Concello habilitou parcelas para os usuarios e usuarias. A desinfección das mans será obrigatorio, así como o emprego da máscara para circular pola instalación. Desde o Concello pregan aos usuarios e usuarias que eviten tocar barandas, obxectos e superficies.