Co fin de adaptar o día a día no Complexo Deportivo Municipal á nova normalidade, o Concello de Carral elaborou un estrito protocolo para garantir a seguridade dos usuarios e usuarias. Este documento inclúe medidas que afectan, non só no emprego do ximnasio, senón tamén no desenvolvemento das actividades gratuítas dirixidas para socios e socias. A oferta inclúe zumba, abdominais, pilates, global training, circuit training, core, gap, step tonic e body tonic. Así mesmo, organízanse tamén clases de pilates –de pago- que responden ao mesmo protocolo.

Como parte do mesmo, establécese un número máximo de 5 alumnos/alumnas máis o monitor/a por grupo. Isto é, a aula conta con 17 m² por persoa. Para participar, os socios e socias deben facer previamente a súa reserva na recepción da dependencia. A desinfección de mans e o emprego da máscara é obrigatorio ao longo de toda a actividade –procurando, ademais, ventilar o espazo-. Antes e despois de cada sesión, lévase a cabo a ventilación, a limpeza e desinfección do material empregado e frégase o chan.

En total, unhas 30-40 persoas fan uso do ximnasio do Complexo Deportivo ao longo do día. Pola outra banda, as actividades dirixidas reciben, de media, a unhas 60 persoas á semana. 

O Concello de Carral abrirá mañá, venres 6 de novembro, o prazo para solicitar as axudas do PEL-Reactiva da Deputación Provincial da Coruña. A contía do programa, de 112.962 euros, servirá para axudar ás microempresas e autónomos con domicilio fiscal en Carral. Do total, o 80% das axudas serán achegados polo ente provincial e o 20% polo Concello. Como explican desde o goberno local, “estas axudas son fundamentais para apoiar a uns dous sectores máis afectados pola crise dá COVID-19”.

Esta prestación está dirixida a persoas traballadoras autónomas –con ou sen empregados ao seu cargo- e a microempresas que se atopen nalgún dos seguintes supostos:

• Que se visen afectados polo peche do seu negocio debido ao decreto do estado de alarma do pasado 14 de marzo.
• Que percibisen un descenso na súa facturación no 2º trimestre fiscal de 2020 de, polo menos, un 75% en comparación coa media efectuada no semestre natural anterior á declaración do estado de alarma.
• Que se visen na obrigación de acollerse a un Expediente de Regulación Temporal de Emprego – ERTE-.

As contías oscilan entre os 1.500 e os 3.000 euros segundo os requisitos que cumpra a persoa traballadora autónoma ou microempresa. Como parte dos gastos subvencionables, atópanse os seguintes: compra de material –material antiséptico ou desinfectante, produtos hixiénicos e de limpeza-, alugueres, renting e canons –maquinaria, vehículos, locais, instalacións, reparación e conservación –adaptación de locais ás medidas de protección fronte á COVID-19-, primas seguros, subministracións –auga, gas, combustibles e electricidade-.

O prazo de solicitude estará abierto desde mañá ata o 25 de novembro. As demandas derán realizarse a través da sede electrónica del Concello de Carral.

A Casa da Cultura de Carral acollerá este mércores, 4 de novembro ás 20.00 horas, unha homenaxe á vida e obra de Ricardo Carvalho Calero, o autor laureado nas Letras Galegas de 2020. Trátase dun recital poético e musical no que o público asistente vivirá unha auténtica viaxe sonora e audiovisual sobre a traxectoria do escritor.

Durante o acto, os poemas de Carvalho Calero converteranse en música grazas á guitarra de Moisés Quintas Suárez e á voz de Aser Álvarez. O espectáculo inclúe a proxección do documental ‘Carvalho Calero sem fronteiras’, dirixido por Aser Álvarez.

Atendendo á situación sanitaria da COVID-19, a función contará con aforo limitado. As persoas interesadas en acudir deberán anotarse previamente chamando ao teléfono 981 67 25 80.

O Concello de Carral acaba de pospor o inicio das Escolas Municipais atendendo á evolución epidemiolóxica da COVID-19 en Galicia. A Xunta de Galicia decretou novas restricións para toda a comunidade que entraron en vigor hoxe, xoves 22 de outubro. Entre elas, o organismo autonómico limita a realización de actividades en instalacións deportivas cubertas a grupos de 5 persoas como máximo –sen contar ao monitor-, sexan ou non conviventes.

O goberno local incide en que “nesta situación, a saúde e o benestar dos veciños e veciñas é a máxima prioridade, polo que adiaremos o inicio destas actividades ata que mellore a situación sanitaria”.

As actividades dirixidas que se levan a cabo no Complexo Deportivo, ao longo de todo o ano, manteranse. Iso si, o desenvolvemento destas adaptaranse á última resolución anunciada pola Xunta de Galicia. Isto é, os grupos estarán compostos por un total de 5 persoas.

Co fin de reanudar o programa tan pronto como a situación sanitaria o permita, o Concello manterá aberto o prazo de inscrición. Así, as persoas interesadas poderán presentar a súa solicitude cuberta e asinada, preferiblemente, de xeito telemático a través do correo casadacultura@carral.es ou da sede electrónica carral.es. Así mesmo, poderán presentala de xeito presencial na Casa da Cultura ou no Complexo Deportivo.

Boletín informativo Escolas Municipais Concello de Carral

O Concello de Carral mantén a súa aposta pola cultura segura. Así se reafirmou hoxe, venres 16 de outubro, coa presentación oficial do Ciclo de Teatro de Outono. A iniciativa arrincará, sábado día 17 de outubro, e prolongarase ata o mes de decembro, ofrecendo un total de oito funcións teatrais.

Ao acto de presentación acudiron o alcalde de Carral, Javier Gestal, o concelleiro de Cultura, Francisco Bello, o deputado de Cultura da Deputación da Coruña, Xurxo Couto Rodríguez, e varios membros do goberno local. Así mesmo, o evento contou coa presenza de representantes dalgunhas das compañías que participarán neste ciclo: Pérez&Fernández, Producións Teatrais Excéntricas, Teatro da Ramboia, Talía Teatro e Malasombra Producións.

Durante a súa intervención, o rexedor agradeceu a colaboración da Deputación da Coruña a través da súa Rede Cultural, e aproveitou para reafirmar o compromiso do Concello co desenvolvemento de actividades culturais. Pola súa parte, os membros das compañías teatrais agradeceron ao Concello a súa aposta por este sector, un dos máis afectados pola pandemia da COVID-19.

Un programa para todos os públicos

Todos os espectáculos do ciclo levaranse a cabo no local Xente Nova de Tabeaio ás 20.30 horas, e realizaranse atendendo a un estrito protocolo para evitar contaxios pola COVID-19.

O primeiro terá lugar mañá, sábado 17 de outubro. Será entón cando a compañía Talía Teatro aterre con Vida de cans. Trátase dunha comedia paródica e metafórica na que os actores se converten en tres cans. Durante a función, os animais terán que afrontar un conflito diferente en función da súa personalidade.

Malasombra Producións tomará o relevo con Bernarda o sábado, 24 de outubro. A función está protagonizada por Bernarda, unha muller dura e loitadora cuxa personalidade se forxou a raíz da súa infancia na posguerra. Ao morrer o seu marido, a muller ten que asumir o papel de pai e de nai, educando ás súas fillas o mellor que sabe.

O meu mundo non é deste reino, de Teatro da Ramboia, será a vindeira proposta do Ciclo de Teatro de Outono de Carral -31 de outubro-. Neste caso, trátase dunha adaptación da Farsa de Bululú de Manuel María na que se presenta unha parodia da ditadura franquista.

O ciclo continuará o 14 de novembro coa interpretación de Halsel, da compañía cullerdense O Ruiseñor. A historia preséntase como unha metáfora ambientada no inicio da Guerra Civil española na que se combina a beleza e a dureza, converténdoa nunha función única.

O Ciclo de Teatro de Outono contará, o 21 de novembro, coa interpretación de Os nenos da variola, de Pérez & Fernández. A obra está baseada na Real Expedición Filantrópica da Vacina que partiu desde o porto da Coruña o 30 de novembro de 1803. Ese día, 22 orfos e orfas conformaron unha cadea humana “brazo a brazo” para facer chegar a vacina aos territorios de ultramar.

Culturactiva Producións chegará ao municipio co seu espectáculo cómico Senior, no que os actores Luis Iglesia e Marcos Orsi explicarán ao público como é a crise dos 50. Unha reflexión en clave de humor sobre a chegada ás portas da terceira idade.

Decembro contará coa representación de Lolo e mamá, por parte De Ste Xeito Producións. Trátase dunha danza teatral na que o público descubrirá, a través do humor, que as cousas case nunca son o que semellan.

O Ciclo cerrarase con Cartoons, unha proposta de Producións Teatrais Excéntricas. A función narra a historia de persoas que o perderon todo e que teñen que aprender a facelo de novo. Todo parece un drama, peor en realidade non o é.

Os aforos de todas as funcións son limitados, polo que as persoas interesadas deberán reservar os seus convites chamando ao teléfono 981 67 25 80.