O goberno local propoñerá a adhesión do Concello ao Fondo Galego de Cooperación e Solidariedade. Farao nun dos dous plenos extraordinarios que se celebrarán este mércores, 10 de marzo. Esta asociación sen ánimo de lucro aglutina a Concellos e a institucións tanto públicas como privadas que buscan promover o desenvolvemento e contribuír á erradicación das desigualdades nos países empobrecidos.

A cada un dos Concellos que forman parte do Fondo asígnaselles unha cantidade en función do seu número de habitantes. No caso de Carral, a contía sería de 653,61 euros.

O pleno servirá, así mesmo, para aprobar, de forma definitiva, a creación dun servizo de tesourería conxunto cos Concellos de Abegondo e Bergondo. Actualmente, estes Concellos contan con habilitados nacionais en Secretaría e Intervención, pero non en Tesourería, tendo en conta a carga de traballo existente -tanto Carral como Abegondo e Bergondo teñen boa parte da recadación delegada na Deputación da Coruña-. Por esa razón, os tres Concellos apostan por compartir o servizo cun mesmo habilitado.

O Concello celebrará outro pleno extraordinario a solicitude de catro concelleiros da corporación municipal -4 do PP e a concelleira non adscrita-. Durante a sesión, pedirase información sobre a situación actual do procedemento xudicial contra o portavoz do Partido Popular con respecto ao proxecto da rúa Souto Castiñeiros de acceso ao IES de Carral.

O prazo de presentación de orixinais para participar na 24ª edición do Certame de Poesía do Concello de Carral. A persoa gañadora do concurso recibirá un premio de 2.500 euros e o título gañador publicarase a través da editorial Espiral Maior.

No certame poderán participar autores e autoras maiores de idade e que non recibirán o premio do concurso nos últimos dez anos. As obras terán que ser orixinais, inéditas, non ter sido galardoadas noutros concursos e ter unha extensión de, como mínimo, 500 versos.

Os traballos presentaranse na Casa da Cultura do Concello de Carral e, ante calquera dúbida, poderase chamar ao 981 672 580 ou enviar un correo electrónico a cultura@carral.es.

O xurado estará presidido polo alcalde de Carral -ou polo concelleiro ou concelleira no que delegue esta función- e formado por dúas persoas de recoñecido prestixio no mundo da poesía galega, así como polo autor gañador da pasada edición. O fallo do tribunal darase a coñecer na primeira quincena de maio e o galardón entregarase o día 28 do mesmo mes. 

O Complexo Deportivo do Concello de Carral volverá abrir as súas portas desde o luns, 1 de marzo. Farao, iso si, atendendo a un estrito protocolo de seguridade para reducir o risco de contaxio pola covid-19. Este documento inclúe medidas que afectan, non só ao uso do ximnasio, senón tamén ao desenvolvemento das actividades gratuítas dirixidas aos socios e socias, así como ás clases de pilates –de pago-.

O documento reflicte, entre outras, as seguintes cuestións: o aforo máximo da dependencia -20 persoas-, a obrigatoriedade no uso de máscara e no mantemento da distancia interpersoal e a obriga, por parte dos usuarios e usuarias, de empregar unha toalla e de desinfectar o material despois do seu uso.

No caso das actividades dirixidas, os grupos estarán conformados por 4 persoas participantes máis o monitor ou monitora. Antes e despois de cada sesión, levarase a cabo a ventilación, a limpeza e desinfección do material empregado e fregarase o chan. A maiores, o Concello realizará dúas desinfeccións diarias do recinto.

Ampliación do Centro Deportivo

Co obxectivo de adaptar esta instalación á nova realidade provocada pola pandemia da covid-19, o Concello de Carral proxecta a ampliación do Centro Deportivo. Actualmente, a dependencia dispón dunha única aula para o desenvolvemento das actividades. As actuacións previstas polo equipo de goberno suporán o incremento do espazo, a creación dunha zona de almacén e a colocación de renovadores de aire e climatización adaptados á instalación. Estas intervencións implicarán, ademais, a reubicación do acceso ás pistas de pádel e a rehabilitación e acondicionamento da pista multideporte actual.

O alcalde de Carral, Javier Gestal, mantivo unha reunión coa xefa de servizo de Infraestruturas Agrarias para abordar a situación actual da parcelaria de San Vicente de Vigo. Durante o encontro, o rexedor preguntou polo estado no que se atopa este proceso actualmente. Segundo os cálculos do organismo, o 100% das leiras estarán entregadas aos propietarios no mes de marzo.

Segundo a información proporcionada ao alcalde, o 80% das parcelas xa están rexistradas e listas para entregar aos donos. Con todo, a intención é completar o proceso co 20% das parcelas restantes para facer a entrega.

Se algún veciño ou veciña require información sobre unha parcela, pode solicitar unha nota simple acudindo presencialmente ao Rexistro da Propiedade ou a través da páxina web do organismo.