O GOBERNO LOCAL RECOLLE FIRMAS PARA ESIXIR AO SERGAS QUE RESTAURE O SERVIZO DE PEDIATRÍA NO CENTRO MÉDICO DE CARRAL

Debido ás noticias que circularon por Carral sobre a supresión temporal do servizo de pediatría do Centro de Saúde da localidade, o Concello iniciou contactos coa Dirección do mencionado Centro de Saúde, así como coa Xerencia do Sergas co fin de confirmar a situación real deste problema.

A Dirección do Centro de Saúde confirmou que, debido á falta de persoal médico coa especialidade de pediatría, e por causa das oposicións que o Sergas ten convocadas para o día 1 de marzo, tivéronse que reducir o número de asistencias e os Centros de Saúde onde se prestaba o servizo de pediatría, afectando coa suspensión temporal do servizo ata que non remate o proceso de selección de persoal ao Centro de Saúde de Carral.

O Concello manifestou, tanto á Dirección do Centro como á Xerencia a súa total oposición á medida acordada polo Sergas, debido ao grave prexuízo que, ao seu entender, provoca nos nenos e adolescentes do municipio, así como aos seis pais, que se vén obrigados a desprazarse a Cambre ou a outros Centros Hospitalarios da Coruña, utilizando os seus propios medios, debido a non existir medios de transporte público que poidan prestar dito servizo.

Por esta razón, o Concello habilitou nas súas instalacións, así como no propio Centro de Saúde e na Casa da Cultura da localidade un documento para a recollida de firmas en contra da decisión do Sergas, sobre todo tendo en conta que en Concellos limítrofes non se tomaron estas medidas, cando a diferencia parece estar no partido que sustenta os distintos gobernos municipais. “A toma de medidas contra os dereitos dos cidadáns en función da opción política escollida polos mesmos nun sistema democrático é un atentado contra a libertade cidadá, e un acto contrario ao noso ordenamento xurídico e á nosa Constitución”, manifestaron membros do actual equipo de goberno do Concello de Carral.

O alcalde e a concelleira da área de Saúde teñen convocadas varias reunións coa Xerencia do Sergas, o Delegado Provincial, e están en fase de axendar unha reunión co propio conselleiro de Sanidade. É intención do Concello seguir presionando á administración autonómica ata conseguir a anulación da medida de supresión temporal do servizo.

/by

O CONCELLO ADXUDICARÁ AS OBRAS PARA MELLORAR A EFICIENCIA ENERXÉTICA NOS CENTROS CULTURAIS DAS TRAVESAS E SAN VICENTE

Centro cultural y deportivo de As Travesas

O goberno local mellorará, proximamente, os centros culturais das parroquias de San Vicente de Vigo e As Travesas. O Concello acaba de adxudicar as obras de rehabilitación enerxética dos centros culturais das Travesas e San Vicente de Vigo. Estas actuacións terán un custo de máis de 100.000 euros e financiaranse a cargo de dúas subvencións do IDAE –Instituto para a Diversificación e o Aforro da Enerxía-. Os traballos, que contarán cun prazo de execución de tres meses, consistirán na renovación das fachadas, as cubertas e as carpinterías exteriores para illar térmicamente estes inmobles.

Por unha banda, no de San Vicente de Vigo aplicarase un sistema de illamento térmico exterior de la de roca de 8 cm e substituirase a cobertura de fibrocemento da planta alta e do almacén por unha cobertura de tella curva. Ademais, substituiranse as carpinterías exteriores da planta baixa por outras de PVC e acristalamento dobre.

Doutra banda, no caso de As Travesas se replicarán as actuacións para mellorar o illamento térmico exterior, colocaranse elementos de protección da madeira e unha cuberta na parte superior mediante falso teito. O obxectivo do goberno local é que esta intervención poida dar servizo aos peregrinos que chegan ás Travesas, punto por onde pasa o Camiño Inglés.

Tal e como indican desde o equipo de goberno, estes proxectos servirán para mellorar estas instalacións, para garantir un maior confort térmico nestas instalacións e para conseguir un maior aforro enerxético.

/by

CONVOCADA A 23ª EDICIÓN DO CERTAME DE POESÍA CONCELLO DE CARRAL

O Concello de Carral, a través do seu departamento de Cultura, ven de convocar unha nova edición do seu premio de poesía, que está dotado con 2500 euros e a publicación da obra gañadora en Logo Premio de Poesía CarralEdicións Espiral Maior.

Co certame do 2020 cúmprense 23 edicións, sendo un concurso de referencia no ámbito da poesía galega.

Esta nova edición do premio contempla un prazo para presentar exemplares aberto ata o 3 de abril. Poderán presentar obras os autores e autoras maiores de idade, con poemarios cun mínimo de 500 versos escritos en lingua galega.

O premio entregarase o 29 de maio, dentro dos actos das Letras Galegas en Carral, no que ademais se prevé a presentación da edición do libro gañador da vixésima segunda edición do concurso, titulado Cantar de Cortegada de Xurxo Alonso.

Ademais do premio e da publicación do libro, o Concello de Carral segue coas actividades escolares relacionadas coa poesía, consistentes en obradoiros de escrita poética e en concursos de poemas.

Para ampliar información, os interesados poden dirixirse á Casa da Cultura de Carral, no teléfono 981 672580, no correo electrónico cultura@carral.es ou a través da web carral.es.

Bases XXIII Concurso de Poesía Concello de Carral

/by

OS REIS MAGOS VISITARÁN CARRAL DESDE PRIMEIRA HORA DA TARDE

Os Reis Magos de Oriente pasarán polos centros socioculturais de todas as parroquias de Carral. Os  horarios das visitas dos Reis para o vindeiro domingo son:
– Monte Xalo: 15:00 h.
– Cabrois: 15:30 h.
– San Vicente: 15:45 h.
– A Cabra: 16:10 h.
– Cañás: 16:30 h.
– O Canedo: 16:35 h.
– As Travesas: 17:10 h.
– Sergude: 17:15 h.
– Beira: 17:35 h.
– Tabeaio: 17:45 h.
– Barcia: 18:10 h.
– Quembre: 18:40 h.
– Carral (O Espiño): 19:00 h.
No pavillón deportivo do Espiño terá lugar unha festa para recibir aos Reis Magos desde as 18:00 h, con ludoteca, hinchables e obradoiros.

Cartel Reis Magos 2020

/by

XIX TORNEO DE XADREZ DE NADAL EN CARRAL

A concellería de deportes agarda a uns 50 rexistrados para este clásico torneo do 27 de decembro.  Read more

/by

VIII TORNEO DE CHAVE DE NADAL EN CARRAL

Máis de 50 chaveiros daranse cita o domingo no Campo da Feira de Carral. Read more

/by

TABEAIO ACOLLE O CONCERTO DE PANXOLIÑAS

Cartel Panxoliñas 2019.O Coro de Mulleres Rurais de Guísamo e a Coral Polifónica Aires de Carral ofrecerán un concerto de panxoliñas en Tabeaio, organizado pola Concellería de Cultura do Concello de Carral.

O concerto terá lugar o domingo 22, ás 19:00 h. no local Xente Nova. A entrada é de balde.

Este festival forma parte da programación de Nadal que organiza o Concello de Carral.

/by

CARRAL LEVA A PLENO O PLAN ÚNICO 2020, CON MELLORAS NO ACCESO Á AREA DA BREXA E O ACONDICIONAMENTO DO PAVILLÓN O ESPIÑO

  • O POS servirá tamén para financiar a creación dunha zona de aparcamento en Cañás e a construción dun muro de contención de granito na zona.
  • Como parte do Plan Complementario, o Concello executará a segunda fase do saneamento na parroquia de San Vicente de Vigo.

O Concello de Carral celebrará mañá, mércores 18 de decembro ás 20.30 horas, unha sesión extraordinaria do pleno que servirá para levar o Plan de Obras e Servizos POS+ 2020 da Deputación A Coruña. Con cargo ao Plan provincial, incluíronse intervencións cun dobre obxectivo: incrementar os servizos para os veciños e veciñas e mellorar as infraestruturas e dotacións existentes no municipio. O equipo de goberno proxecta tres grandes obras que se financiarán coa axuda provincial: a mellora da senda peonil para acceso ao área recreativa da Brexa, a construción dun muro de contención de granito e a creación de aparcamento en lugar de Bacelo (Santa Baía de Cañás) e o acondicionamento do pavillón O Espiño.

Por unha banda, no caso da área recreativa A Brexa, proponse unha importante mellora no acceso (37.701,79 euros). Como parte do plan, dotarase a senda cun pavimento tipo Aripaq, un material acorde coa contorna e resistente ao tempo e ás inclemencias meteorolóxicas. Como medida para mellorar a visibilidade da senda e ampliar os horarios de uso, colocaranse balizas nesta zona. A execución desta obra supoñerá, ademais, a adaptación do percorrido para favorecer o acceso a persoas con mobilidade reducida.

Doutra banda, en Cañás, o proxecto incluirá o acondicionamento dunha zona anexa á igrexa da parroquia para o estacionamento de vehículos (38.895,01 euros). Procederase tamén á construción dun muro de bloques de granito sobre o que se colocará un cerramento constituído por malla metálica e postes.

Por último, o Concello expón o acondicionamento do pavillón polideportivo O Espiño (34.479,43 euros). Neste caso, as obras proxéctanse tanto na parte interior –onde se eliminarán as pingueiras-, como na parte exterior –con traballos de limpeza de fachadas e aplicación de pintura plástica-.

Segunda fase do saneamento en San Vicente

Doutra banda, como parte do Plan Complementario da Deputación para investimentos financeiramente sustentables, o Concello pretende continuar coa segunda fase do saneamento na parroquia de San Vicente de Vigo. As actuacións supoñerán un custo de 241.998, 68 euros.

Con este plan, o goberno dará continuidade ás obras da primeira fase –que supoñen un custo de 134.000 euros e que implican a execución de preto de 2.000 metros lineais de colector-. Esta segunda etapa implicará a dotación doutros 3.400 metros de colector. En total, o goberno local pretende instalar 5 km de saneamento na parroquia.

Posto de tesourería

O pleno servirá tamén para elevar a proposta de estatutos para a constitución dunha agrupación cos Concellos de Abegondo, Bergondo e Miño para dispoñer dun servizo de tesourería.

/by

PROGRAMA DE EDUCANDO EN VALORES

Educando en Valores

O programa Educando en Valores leva 7 anos levándose a cabo no CEIP Vicente Otero Valcárcel e no IES de Carral. Trátase dunha iniciativa na que se traballan as competencias necesarias para desenvolver a intelixencia emocional das nenas e nenos, non só para poder obter un mellor rendemento académico, senón tamén para favorecer que o clima de convivencia nos centros educativos sexa respectuoso, afectivo e humano.

O curso pasado o programa tamén se estendeu ás familias con moito éxito, e este ano vaise repetir a experiencia a través da organización de obradoiros.

O primeiro será este xoves, 19 de decembro de 17:00 a 19:00 horas, para familias con rapaces do CEIP Vicente Otero Valcárcel  de Carral. O contido do taller será o seguinte:

  • Necesidades emocionais e sociais dos nenos e nenas. A importancia do vínculo seguro.
  • Intelixencias múltiples: a intelixencia emocional.
  • Claves para a educación desde a afectividade consciente.
  • Estratexias e ferramentas para a educación emocional.
  • A comunicación positiva.
  • Normas e límites dende o afecto.
  • Como axudar as crianzas a manexar as súas emocións.

O aforo é limitado.

Para máis información:

  • Departamento de orientación do CEIP Vicente Otero Valcárcel.
  • Servizos Sociais do Concello de Carral.

 

/by