OS MOZOS DE CARRAL ACUDIRON UN ANO MÁIS Á PISTA DE XEO
A Concellería de Deportes de Carral organizou unha nova viaxe á pista de xeo, este ano ao Burgo.
O sábado 12 de xaneiro mozos e mozas de Carral acudiron a pista de xeo Invernalia no Burgo (xunto ao paseo), nunha viaxe organizada polo Concello da localidade coa colaboración de club de patinaxe Alquimia.
A excursión comezou o sábado sobre as 10.30 h, momento no que a expedición partiu cara a pista de xeo. Ao redor das 11.00 comezou a xornada de patinaxe na que algúns dos máis expertos patinadores puideron lucirse facendo verdadeiras acrobacias sobre os patíns, e outros simplemente fixeron as acrobacias para non caerse. Sobre as 12.00, e despois dalgunha que outra caída, terminou o día de patinaxe e os mozos carraleses volveron ás súas casas esgotados pola intensa e divertida actividade. Todos eles expresaron a súa alegría pola actividade e mostráronse impacientes por repetir a experiencia.
Esta viaxe é xa un clásico na programación deportiva municipal do Nadal do Concello de Carral; mediante esta excursión búscase fomentar a práctica deportiva e achegar novas formas de ocupación do tempo de lecer á poboación máis nova, vinculándoa como sempre coa idea do hábito deportivo saudable.
