Tag Archive for: casa da cultura

A QUINTA EDICIÓN DE CULTURÚA COMEZA COA PELÍCULA GALEGA SALTA!

O programa municipal CultuRúa 2025 trae ao Campo da Feira propostas de cine, teatro, música e maxia. Esta programación estival comeza o venres 20 de xuño coa película galega Salta! dirixida por Olga Osorio. É unha divertida película recomendada para toda a familia, rodada na Coruña, e que mestura ciencia ficción con comedia. A proxección comezará ás 22:30 h.

Moby Dick é un espectáculo teatral de rúa a cargo da compañía Pedras de Cartón que se presenta en Carral o xoves 26 de xuño ás 18:00 h. A famosa balea do conto de Herman Melville deambulará polo Campo da Feira xunto a un mariñeiro que vivirá perigosas aventuras.

A música infantil chega da man de Paco Nogueiras con C@nto Contigo, no que repasará algúns dos seus principais éxitos. O concerto terá lugar o xoves 24 de xullo ás 18:00 h. Á mesma hora do día 21 de agosto preséntase Punto en boca: entre fíos anda o lío, unha proposta do Centro Dramático Galego e Raquel Crespo. É un espectáculo de música, narración e movemento para o goce de pequenos e maiores, ofrecéndonos historias de costureiras.

CultuRúa rematará o 22 de agosto co espectáculo que repasará os 50 anos de traxectoria artística do Mago Antón. 50 (1975 – 2025) presenta algúns dos números máis aplaudidos nas funcións do Mago Antón, xunto con algunhas novas creacións que sorprenderán ao público. Este espectáculo terá lugar no Magomóbil que se instalará no Campo da Feira, en 4 pases que terá lugar cada hora, sendo o primeiro ás 17:00 h. Para a boa organización de cada pase, as persoas interesadas deberán retirar os convites na Casa da Cultura desde o día 20 de xuño en horario de mañá.

No caso de meteoroloxía desfavorable, os espectáculos (agás o Magomóbil) trasladaranse á pista cuberta de Paleo, detrás do Centro de Saúde.

Para facer posible esta programación, o Concello de Carral conta coa colaboración da Deputación da Coruña a través da súa Rede Cultural e da Xunta de Galicia co Centro Dramático Galego e o programa Cultura no Camiño.

Información detallada dos espectáculos de CultuRúa 2025 premendo aquí

/by

PUBLÍCANSE AS LISTAXES DOS ADMITIDOS/AS NOS CAMPAMENTOS DEPORTIVOS MUNICIPAIS – VERÁN 2025

HORARIO E LUGAR DOS CAMPAMENTOS.

  • As datas nas que se levará a cabo este programa serán durante o período escolar non lectivo das vacacións de Verán: do 23 de xuño ao 29 de agosto de 2025.
  • O horario (luns a venres, excepto festivos) será:
    • Servizo Madrugadores: 7.30 a 10.00 h *
    • Campamentos: 10.00 a 14.00 h (horario obrigatorio dentro do campamento, non podendo nin entregar nin recoller aos nenos/as durante o mesmo salvo excepcións previamente comunicadas.)
    • Servizo de comedor: 14.00 a 16.00 h *
  • *Nota. Nestes servizos contratarase unicamente o coidado e atención dos menores. Os nenos/as que fagan uso destes horarios deberán traer o seu almorzo ou xantar da casa.
  • Este programa se desenrolará no recinto escolar do Colexio Vicente Otero Valcárcel (pavillón polideportivo cuberto, pista polideportiva descuberta, zona axardinada, patio escolar cuberto, comedor escolar, aula psicomotricidade).

 

DESTINATARIOS: Idades e grupos

  • Para nenos/as dende Educación Infantil (dende 3 anos) e toda a Educación Primaria.
  • Para formalizar a inscrición é preciso que o interesado/a non teña débedas co Concello de Carral.
  • Este campamento dividirase en quendas/semanas atendendo ao número de inscritos:
  1. 1ª semana: do 23 ao 27 de xuño (120 prazas)
  2. 2ª semana: do 30 de xuño ao 4 de xullo (120 prazas)
  3. 3ª semana: do 7 ao 11 de xullo (120 prazas)
  4. 4ª semana: do 14 ao 18 de xullo (120 prazas)
  5. 5ª semana: do 21 ao 24 de xullo (90 prazas)
  6. 6ª semana: do 28 de xullo ao 1 de agosto (90 prazas)
  7. 7ª semana: do 4 ao 8 de agosto (90 prazas)
  8. 8ª semana: do 11 ao 14 de agosto (90 prazas)
  • As prazas son limitadas e adxudicaranse por rigorosa orde de inscrición.
  • O concello fará unha reserva de prazas dun 10% para nenos/as con NEAE, con NEE con autonomía persoal ou en risco de exclusión social,  para participar nas diversas actividades propostas en cada campamento, previa valoración polo equipo técnico municipal competente.
  • Organizaranse os grupos por idades. Estes grupos serán o máis homoxéneos posible (permitíndose unha oscilación de 2 anos), cumprindo sempre a normativa vixente.
  • Os nenos/as poderán facer uso do servizo Madrugadores (7.30‐10.00 h) e Tempo de Xantar (14.00‐16.00 h) para o que deberán traer o seu propio almorzo e xantar da casa (disponse de forno microondas).

PREZOS: Cotas e xeito de pagamento.

  • Segundo o acordo regulador nº 1 do prezos por actividades deportivas, culturais, xuvenís e socio educativas do Concello de Carral (Epígrafe 5: Actividades durante as vacacións escolares e outras actividades), o prezo do campamento urbano será de 30 €/semana, máis 9,25 €/semana polas opcións de madrugadores e tempo de xantar:
  • Os importes aboados NON SE DEVOLVERÁN AGÁS CAUSAS DEBIDAMENTE XUSTIFICADAS.
  • As datas límites para facer os pagos serán:
    • Semanas da 1º á 5ª: pago entre o 11 e 18 de xuño.
    • Semanas da 6º á 10ª: pago entre o 16 e o 23 de xullo.
  • SE O INTERESADO/A NON ABOA A CANTIDADE CORRESPONDENTE ÁS SEMANAS QUE ELIXA DENTRO DO PRAZO MARCADO, PERDERÁ O DEREITO Á PRAZA RECAENDO ESTA NA SEGUINTE PERSOA NA LISTA DE AGARDA.
  • Formas de pago:
    • Mediante transferencia bancaria (ES21 2100 5781 3102 0000 1826), para o cal será IMPRESCINDIBLE enviar o resgardo de ingreso ao mail casadacultura@carral.es.
    • Con Tarxeta bancaria nas dependencias da Casa da Cultura.
  • Condicións de pago: O pago de cada semana elixida deberase realizar nas datas e xeitos indicados.

/by
,

BRANCA TRIGO PROCLÁMASE VENCEDORA DO 28º PREMIO DE POESÍA CONCELLO DE CARRAL

O Concello de Carral vén de anunciar a obra gañadora da 28ª edición do seu Premio de Poesía: Especies invasoras, autoría da viguesa Branca Trigo Cabaleiro. O certame contou nesta edición cunha participación récord de 100 obras, consolidándose así como un dos principais referentes da poesía en lingua galega.

O xurado, presidido polo alcalde Javier Gestal e co técnico de cultura Carlos Lorenzo como secretario, estivo composto tamén por destacadas figuras do ámbito literario galego; Silvia Penas, gañadora da edición de 2024: Armando Requeixo, crítico e investigador literario; e Antía Marante, poeta, tradutora e docente. Tras a avaliación de todas as obras presentadas, o xurado decidiu por unanimidade outorgar o premio a Especies invasoras, presentada baixo o lema Magma.

A obra gañadora foi eloxiada polo xurado como “un libro de poemas que explora de xeito radical a identidade, o desarraigo e a violencia estrutural”, facendo emprego da metáfora da invasión biolóxica para abordar temas como o corpo, a casa e a memoria. Destacouse a súa estrutura fractal, a forza imaxinativa e a capacidade para fundir o íntimo e o colectivo nunha linguaxe poética profundamente innovadora e transgresora.

O premio está dotado con 3.500 euros e a publicación da obra por parte da editorial Espiral Maior. A entrega oficial do galardón terá lugar o venres 30 de maio na Casa da Cultura de Carral, nun acto no que tamén se presentará o libro A pel do exilio de Silvia Penas, gañador da edición anterior.

O Premio de Poesía Concello de Carral conta coa colaboración da Consellería de Cultura da Xunta de Galicia, a través da Secretaría Xeral de Política Lingüística e da Dirección Xeral de Cultura. Ademais, o certame vén de recibir o terceiro premio “Rodolfo Prada á xestión cultural” outorgado pola Deputación de Ourense, recoñecendo así a súa traxectoria e impacto no panorama cultural galego.

Branca Trigo, voz transgresora da poesía galega actual

Branca Trigo Cabaleiro (Vigo, 1997) é poeta, editora e dinamizadora cultural. Codirixe Edicións Malafera, onde publicou os libros Coñecemento do Medo e trans0, así como varios fanzines. É tamén autora do poemario Condolore e participou en diversas publicacións colectivas como Alguén nos lembrará ou Gótico Urbano. Traballa na intersección entre poesía e outras artes a través de proxectos como Poetry Sniping: Simulacro, xunto a Pablo Rodríguez, ou accións en directo coa pintura de Ramón Trigo.

Tamén organiza o micro aberto Cerimonia de Gaivotas e coordina obradoiros de creación en distintos espazos culturais e educativos. Actualmente realiza a súa tese de doutoramento na Universidade de Vigo, centrada na monstrosidade queer dentro da poesía galega contemporánea.

/by

O NOVO CICLO DE DOCUMENTAIS GALEGOS TRAE TEMÁTICAS BIOGRÁFICAS, MEDIOAMBIENTAIS E DE MEMORIA HISTÓRICA

Coa preestrea de Julio Camba: o home que non quería ser nada, comeza a cuarta edición de Cine Documental Galego.

En catro sesións que terán lugar na Casa da Cultura presentaranse cinco producións galegas con temáticas diversas, pasando por biografías, a concienciación medioambiental ou a memoria histórica. En todas as sesións contarase cos directores ou directoras das películas para manter un coloquio cos espectadores. Abre o ciclo o 20 de febreiro Julio Camba: o home que non quería ser nada, de Aser Álvarez. Este documental biográfico de carácter creativo é unha viaxe para descubrir a Julio Camba (Vilanova de Arousa, 1884 – Madrid, 1962), un dos xornalistas españois máis populares do século XX. Transcorre durante o seu último baño na habitación 383 do Hotel Palace de Madrid, onde pasou os trece últimos anos da súa vida. Viaxaremos a través da súa memoria, dos testemuños dos seus biógrafos e amigos e as lecturas dos seus artigos nalgunhas das cidades do mundo nas que traballou como correspondente: Lisboa, París, Londres, Berlín, Roma ou Nova York.

O 27 de febreiro será unha sesión con dúas proxeccións. Na pel da Memoria fala de Mariví Villaverde, filla de alcalde republicano, que con 14 años vese obrigada a exiliarse por culpa do golpe de estado. Este relato reflexiona sobre a importancia da memoria histórica a través das vivencias da súa protagonista. Pola súa banda Dores recolle as historias de catro persoas que, dunha forma ou outra, foron testemuñas ou recollen os testemuños das consecuencias da represión franquista en Galicia. Coral Piñeiro, directora das dúas curtametraxes, estará presente para comentalas co público asistente.

Ignacio Benedeti presentará a súa película Spitsbergen: o gardián do Ártico o xoves 6 de marzo. O director viaxou a bordo do buque rompexeos Malmó para gravar as consecuencias que a actividade humana descontrolada provocan no Ártico. Esta longametraxe de 81 minutos proxectarase en película celuloide de 16 mm.

Ese programa remata o 13 de marzo co documental Os espazos en branco, de Bruno Arias, que resultou premiado nos Mestre Mateo do 2024. Bruno leva moito tempo cunha espiña cravada: non lembra case nada de quen máis lle influíu na súa vida. A súa tía Xela (Arias) morreu cando el tiña 5 anos e só lle quedan dela as memorias doutras persoas. É por iso que, dezaoito anos despois, Bruno decide transitar as caras e lugares que viviron a súa tía para dar luz a este conflito interno a través da primeira herdanza que lle deixou: o impulso creativo.

Todas as proxeccións comezarán ás 20:00 h, con entrada de balde ata completar a capacidade da sala de audiovisuais da Casa da Cultura.

Este ciclo de cine galego documental conta co apoio da Deputación da Coruña e da Secretaría Xeral de Política Lingüística da Xunta de Galicia.

/by

XA ESTÁ ABERTO O PRAZO DO 28º PREMIO DE POESÍA CONCELLO DE CARRAL

O Concello de Carral ven de convocar unha nova edición do Premio de Poesía Concello de Carral. Neste ano 2025 o certame suma xa as 28 edicións, mantendo sempre a intención de seguir colaborando a fornecer o sistema literario galego, a difundir a poesía entre a poboación de Carral, a descubrir novos valores da nosa literatura ou a consolidar poetas  que xa contan con obra publicada. Durante estas 28 anos o premio de Carral consolidouse coma un dos máis importantes de Galicia, o cal lle foi recoñecido pola Deputación de Ourense que lle concedeu un dos seus premios Rodolfo Prada 2024 a iniciativas galegas de xestión cultural.

Nas bases da actual convocatoria están recollidos todos os aspectos que atinxen á presentación de obras e que se resumen en:

  • Premio: 3500 € e a publicación da obra en Edicións Espiral Maior
  • Obras orixinais e inéditas en galego cun mínimo de 500 versos
  • Prazo aberto para a presentación de obras ata o 31 de marzo

O premio entregarase nun acto que terá lugar o 30 de maio, no que tamén se presentará a edición do libro gañador o ano pasado, A pel do exilio de Silvia Penas.

Para levar a cabo o certame o Concello de Carral conta coa colaboración da Consellería de Cultura da Xunta de Galicia.

Bases do 28º Premio de Poesía Concello de Carral

Acceso á plataforma para a presentación de obras

/by

O CONCELLO DE CARRAL ABRE O TERCEIRO PRAZO DE INSCRICIÓN PARA AS ACTIVIDADES DAS ESCOLAS MUNICIPAIS

O Concello de Carral abre o terceiro prazo de inscrición das Escolas Municipais para aquelas actividades nas que aínda quedan prazas dispoñibles.

As persoas interesadas poderán inscribirse entre as 9:00 h do 7 de xaneiro ata as 12:00 h do 10 de xaneiro. A matrícula pode formalizarse de maneira presencial na Casa da Cultura, a través do enlace http://manuelseijas.ddns.net/fmi/webd/MSInscripcionWEB, ou a través da sede electrónica no enlace: https://sede.carral.es/sxc/gl/procedimientosytramites/index.html#actividades_culturales_deportivas

PRAZAS VACANTES ESCOLAS MUNICIPAIS DE CARRAL

SOLICITUDE DE INSCRICIÓN

/by

PUBLÍCANSE AS LISTAXES DE ADMITIDOS NOS CAMPAMENTOS DEPORTIVOS DE NADAL

INFORMACIÓN XERAL SOBRE OS CAMPAMENTOS DEPORTIVOS DE NADAL

LISTAXE DE ADMITIDOS


DATAS E Nº DE PRAZAS:

– 1ª semana: do 23 ao 27 de decembro (60 prazas)

– 2ª semana: do 30 de decembro ao 3 de xaneiro (60 prazas)

HORARIOS: (luns a venres, excepto festivos) 

1. Servizo Madrugadores: 7.30 a 10.00 h *
2. Campamentos: 10.00 a 14.00 h, ESTE HORARIO SERÁ “OBRIGATORIO” PARA TODOS OS NENOS/AS, non       podendo nin entregar nin recoller aos nenos/as durante o mesmo salvo excepcións previamente                          comunicadas.
3. Tempo de Xantar: 14.00 a 16.00 h *

*Nota. Os nenos/as que fagan uso destes horarios deberán traer o seu almorzo ou xantar da casa.

LUGAR: 

No recinto escolar do Colexio Vicente Otero Valcárcel – (ubicación: 43.224984, -8.354894) -; pavillón polideportivo cuberto, pista polideportiva descuberta, zona axardinada, patio escolar cuberto, comedor escolar, aula psicomotricidade)

DESTINATARIOS:

1. Para nenos/as dende Educación Infantil (dende 3 anos) e toda a Educación Primaria.

PREZO:  30 €/semana (consultar condicións dos campamentos)

              + 9,25 €/semana pola opción de madrugadores/tempo de xantar.

OBSERVACIÓNS NA INSCRICIÓN:

  1. Prazo entre o 11 (09:00 h) e o 18  de decembro (12:00 h).
  2. Prazas limitadas (60/semana). 
  3. CRITERIOS DE ADXUDICACIÓN DAS PRAZAS: 

                – Por orde de inscrición ou ata esgotar a oferta.
                – Preferencia aos empadroados/as en Carral ou matriculados nos centros educativos da localidade. 

       4. Publicación das listaxes: 19 de decembro (pago do 19 ao 22 de decembro)

Máis info na Casa da Cultura (981.67.25.80) ou en casadacultura@carral.es

/by

ÁBRESE O PRAZO DE INSCRICIÓN NOS CAMPAMENTOS DEPORTIVOS DE NADAL

Carral abre este mércores, 11 de decembro ás 9:00 h, o prazo de inscrición nos campamentos de Nadal, un programa co que o Concello busca favorecer a conciliación entre as familias do municipio. O período de inscrición estará aberto ata o 18 de decembro ás 12.00 h, dándolles aos veciños e veciñas a posibilidade de inscribir aos nenos e nenas nalgunha/s das 2 semanas que se ofertan dende o 23 de decembro ata o 3 de xaneiro.

Como nas últimas edicións, o Concello mantén o horario ampliado destas actividades. Deste xeito, os pequenos e pequenas poderán ser atendidos entre as 7.30 ata as 16.00 horas xa que, ademais das propias actividades dos campamentos (10.00-14.00 h), o Concello ofrece servizos opcionais de Madrugadores (de 7.30 a 10.00 horas) e de tempo de xantar (de 14.00 a 16.00 horas).

Estes campamentos, dirixidos a rapaces e rapazas de Ed. Infantil e Ed. Primaria, levaranse a cabo durante as vacacións de Nadal en quendas semanais (2) e terán unha temática deportiva, con especial atención aos deportes de inverno e as disciplinas locais. Ofertaranse 60 prazas/semana, tendo preferencia os nenos e nenas empadroados ou os que acudan aos centros de ensinanza de Carral.

O prezo destes campamentos é de 30,00 €/semana, e o prezo polo uso do servizo opcional de madrugadores (7:30-10.00 h)/tempo de xantar (14:00-16:00): 9,25 €/semana.

As persoas interesadas poderán tramitar a inscrición cubrindo o boletín dispoñible na páxina web do Concello ou, se o prefiren, cubrindo o formulario online disposto para tal fin. Como noutras convocatorias, as persoas interesadas terán a posibilidade de inscribir aos nenos e nenas por semanas soltas. Máis información na Casa da Cultura de Carral – casadacultura@carral.es – 981.67.25.80.

/by

ÁBRESE O SEGUNDO PRAZO DE INSCRICIÓN PARA O CURSO 2024-2025 DAS ACTIVIDADES MUNICIPAIS DE CARRAL

O Concello de Carral abre un segundo prazo de inscrición no programa das escolas deportivas e socio- educativas para aquelas actividades nas que quedaron prazas vacantes. Son un total de 95 novas prazas para un total de 18 actividades/grupos. Os interesados poderanse inscribir nas ofertadas dende ás 9.00 h do luns 7 de outubro.

O prazo pecharase o día 10 de outubro ás 14.00 h. Os alumnos/as inscritos serán contactados polos departamentos municipais correspondentes e poderán incorporarse ás correspondentes actividades dende o luns 14 de outubro.

/by

CARRAL ABRE O PRAZO DE INSCRICIÓN PARA AS ESCOLAS MUNICIPAIS DO CURSO 2024-2025

• As persoas interesadas poderán presentar a súa solicitude ata o 18 de setembro.
• Ofertaranse actividades para diferentes idades en distintas categorías: deportes, educación e servizos sociais.

O Concello de Carral presenta a súa programación de escolas municipais que inclúe, un ano máis, diferentes actividades para todos os gustos e idades.

O período de inscricións abriuse hoxe, luns, ás 09:00 horas e estará activo ata o 18 de setembro. Poderá pecharse antes se se completan todas as prazas da modalidade.

As prazas son limitadas e as solicitudes poderán presentarse presencialmente na Casa da Cultura, a través do formulario web habilitado para tal fin na web https://carral.es/escolas-municipais/ e a través da sede electrónica.

As formacións darán comezo a primeira semana de outubro, sendo responsabilidade do alumnado informarse nas dependencias municipais das datas, horas e lugares concretos das súas actividades.

A cota xeral será de 14 euros mensuais por persoa e actividade ou de 15 euros para aquelas que inclúen tres horas semanais. O prezo da Escola de Música é de 40 euros mensuais.

Haberá bonificacións para as familias numerosas, para persoas da terceira idade ou con discapacidade e para as voluntarias de Protección Civil. Todos elas terán un desconto de tres euros ao mes por actividade.

Deportes
Atletismo, ioga, patinaxe, rítmica e judo son as modalidades ofrecidas para os máis pequenos e pequenas no pavillón do colexio durante o horario escolar.


Equitación, baloncesto e pádel serán as opcións para o público xeral.

Pola outra banda, os adultos terán á súa disposición clases de zumba e ximnasia de mantemento. Ademais, durante este curso ofreceranse, a través do departamento de Deportes, cursos de iniciación a diferentes modalidades deportivas.

Educación
O CEIP Vicente Otero Valcárcel volverá contar con servizo de madrugadores, de 7:30 a 9:20 horas, e de conciliación, de luns a venres de 15:20 a 16:20 horas.

O centro acollerá tamén distintas actividades extraescolares entre as que se inclúen: robótica, debuxo e pintura, inglés, informática, baile moderno ou cociña.

Ademais, a escola municipal de música continuará coa súa formación de música e movemento nas mesmas instalacións.

Asociacións
As asociacións ofrecerán diferentes opcións deportivas e culturais para os veciños e veciñas das parroquias.

/by