O CONCELLO ABRE UNHA NOVA CANLE DE INFORMACIÓN CIDADÁ A TRAVÉS DE WHATSAPP

O Concello acaba de estrear unha nova canle de información cidadá a través de WhatsApp. Por medio desta vía, os veciños e veciñas recibirán información sobre calquera novidade de carácter municipal como, por exemplo, incidencias, actividades culturais e deportivas, etc.

O concelleiro de Participación Cidadá, Francisco Bello, sinala que esta novidade permite reforzar o compromiso do goberno local “por ofrecer máis vías de comunicación coa veciñanza”. Ademais, como explica o edil, WhatsApp ten un gran uso entre a veciñanza, “polo que se conseguirá que a información municipal chegue ao maior número de persoas posible”.

As persoas que desexen empregar esta canle deberán gardar o teléfono 698 192 847 na súa lista de contactos co nome ‘Novas Carral’. A continuación, terán que enviar unha mensaxe co texto ‘Alta novas Carral’. Así mesmo, os veciños e veciñas que o desexen poderán tamén escanear o código QR que estará dispoñible na páxina web municipal e nas redes sociais. Como no suposto anterior, terán que gardar o número de teléfono na súa axenda de contactos.

Para darse de baixa do servizo, os veciños e veciñas deberán mandar unha mensaxe co texto “Baixa novas Carral”.

 

/by

BANDO TELEFONÍA MÓBIL

Tras o encendido das novas estacións de telefonía móbil o 30 de setembro finalizará o prazo para solicitar a atención gratuíta das novas incidencias.

Atención de problemas técnicos no 900 833 999 e máis info no 981 567 002.

/by

CARRAL ABRE O PRAZO DE INSCRICIÓN PARA AS ESCOLAS MUNICIPAIS, OFRECENDO 40 PROPOSTAS PARA TODAS AS IDADES

Folleto Escolas 22-23     BOLETÍN DE INSCRICIÓN

O Concello abrirá mañá, luns, 5 de setembro, o prazo de inscrición para as súas Escolas Municipais, ofrecendo unhas 40 actividades. Nesta edición, o programa inclúe propostas deportivas, culturais, educativas, de Servizos Sociais e algunhas organizadas polas asociacións e clubs do municipio. Desde o goberno local sinalan que se trata dunha oferta “completa e que conta con iniciativas para os veciños e veciñas de todas as idades coa que se busca, entre outros obxectivos, promover a conciliación da vida laboral e familiar”.

Como novidade con respecto a outros anos, o Concello inclúe, nesta ocasión, as diversas iniciativas culturais e deportivas que levan a cabo as entidades do municipio. Con isto conséguese, non só ampliar o listado de actividades, senón tamén pór en valor e impulsar o labor que realiza o tecido asociativo de Carral. A maiores, por primeira vez, o centro de formación Antón Fraguas acollerá a Escola Municipal de Música, con clases para aprender a tocar os seguintes instrumentos: piano, guitarra, batería, baixo, contrabaixo, violonchelo, violín, frauta, clarinete, trompeta e saxo.

A convocatoria incorpora as seguintes actividades:

  • Atletismo escolar: para nenos e nenas a partir de 4 anos
  • Ximnasia rítmica escolar: para nados no 2018 e anteriores
  • Patinaxe escolar: a partir dos 4 anos
  • Judo: a partir dos 4 anos
  • Judo (Tabeaio): a partir dos 4 anos e tamén para adultos
  • Baloncesto: a partir dos 6 anos
  • Tiro con arco: a partir de 6 anos e para adultos
  • Equitación: a partir de 7 anos e para adultos
  • Pádel: a partir de 8 anos
  • Tiro Olímpico: a partir de 8 anos e para adultos
  • Zumba: a partir de 12 anos
  • Ioga: a partir de 14 anos
  • Jumping fítness: a partir de 14 anos
  • Teares e tapices
  • Obradoiros culturais
  • Actividades escolares: servizo de madrugadores e concilia día a día, robótica, debuxo e pintura, fun english, música e movemento, baile moderno, informática, cociña divertida e ciencia divertida.
  • Escola municipal de música
  • Ximnasia de mantemento en Carral
  • Ximnasia de mantemento nas parroquias
  • Fútbol sala e balonmán coa U.D. Carral
  • Bailes latinos, cociña e repostería, costura para principiantes e calceta e gancho coa asociación de Mulleres Rurais.
  • Baile tradicional e pandeireta e teatro coa AA.VV. O Rueiro de Tabeaio.
  • Escola de música da man da asociación Cultura Aberta de Carral.

As persoas interesadas deberán presentar a solicitude cuberta e asinada, preferiblemente, de xeito telemático a través do correo casadacultura@carral.es ou da sede electrónica carral.es. Así mesmo, poderanse presentar de xeito presencial na Casa da Cultura ou no Complexo Deportivo. O prazo de solicitude estará aberto desde mañá, 5 de setembro ás 9.00 horas, ata o día 23. As actividades comezarán na primeira semana de outubro.

/by

Abertas as inscricións para a terceira edición de #ItinerariosEmprendeverde!

O Ministerio para a Transición Ecolóxica e o Reto Demográfico (MITECO), a través da Fundación Biodiversidade, ofrece unha “Formación en emprendemento vinculado a restauración ecolóxica e infraestruturas verdes”

Está dirixido a persoas emprendedoras, residentes en España, con proxectos ou ideas de negocio que persigan un impacto positivo no medio ambiente e que aspiren a crear unha nova empresa nos próximos 12 meses. Tamén poderán participar persoas que xa sendo autónomos/as, queiran crear unha nova empresa con personalidade xurídica diferente e que cumpran cos criterios de participación. Darase prioridade a persoas que pertenzan aos grupos prioritarios: mulleres, mozas ata 35 anos, maiores de 45 anos, persoas inmigrantes, persoas con discapacidade e residentes en áreas protexidas e/o zonas rurais

 

Existen 3 itinerarios diferentes que permite a participación de persoas que queiran levar a cabo emprendementos en diferentes etapas ou momentos do proceso.

Mais información neste enlace

Inscricións ata o 31 de outubro de 2022

/by

A XV EDICIÓN DA LIMPEZA SIMULTÁNEA DE RÍOS ‘MÓLLATE POLOS RÍOS’ TERÁ LUGAR O 25 DE SETEMBRO EN CARRAL

O vindeiro, 25 de setembro, aterrará no concello de Carral unha nova edición do programa de voluntariado ambiental ‘Móllate polos ríos’, na que participa a Asociación de Custodia do Territorio Brexa.

A xornada, que terá lugar de 10:30 a 13:30 horas, centrarase nas labores nun tramo do río Barcés, ao seu paso polas parroquias de Paleo e Sarandóns.

Podedes anotarvos no 698 146 685, en brexa.asociacion@gmail ou na páxina web e as redes sociais da asociación.

/by

O CONCELLO BUSCA COLABORAR COAS COMISIÓNS DE FESTAS CUNHA NOVA LIÑA DE AXUDAS DE 9.000 EUROS

  •   O prazo de solicitude estará durante 10 días hábiles contados a partir de hoxe, martes 13 de setembro.

Carral, 13 de setembro de 2022. O Concello acaba de abrir o prazo de solicitude dunha nova liña de axudas dirixida ás comisións de festas. O obxectivo desta subvención, de 9.000 euros, é contribuír cos organizadores das celebracións patronais que, ao longo do ano, puideron retomar a súa actividade tras dous anos de parón pola covid-19.

O Concello lanza a medida tras formular a solicitude á Deputación e, no lugar de investilo, decidiuse colaborar coas múltiples comisións do termo municipal. Os fondos municipais proceden do programa PEL-Concellos, axudas ao sector das orquestras e verbenas e repartiranse de xeito equitativo entre as entidades que cumpran os requisitos fixados nas bases.

As empresas propietarias de orquestras que vaian ser contratadas deberán cumprir, ademais, cos seguintes requisitos:

  • Ter o seu domicilio fiscal e social en Galicia.
  • Contar cun mínimo de dous anos de experiencia continua na actividade a partir da data de publicación da convocatoria no Boletín Oficial da Provincia.
  • Declarar, responsablemente, que teñen unha composición mínima de seis integrantes. Da cifra, polo menos catro deben tocar algún instrumento musical na súa actuación.
  • Declarar, responsablemente, que o 80% da súa actividade se centra na organización de espectáculos e actuación musicais en directo.

As comisións interesadas deberán pedir estas axudas nun prazo de 10 días hábiles contados desde hoxe, martes 13 de setembro. As que resulten beneficiarias poderán sufragar eventos levados a cabo entre o 1 de xaneiro e o 31 de decembro de 2022, non podendo imputarse cargos realizados con posterioridade.

/by

UNHA UNIDADE MÓBIL DE INSPECCIÓN TÉCNICA DE AGRÍCOLAS DESPRAZARASE AO CONCELLO DE CARRAL DO 14 AO 18 DE OUTUBRO

Dende o Concello de Carral informamos de que, do 14 ao 18 de outubro, permanecerá no noso municipio unha unidade móbil de inspección técnica de vehículos agrícolas, situado no Polígono Industrial, xunto ao Punto Limpo.

O horario de dita instalación será de 9:00 a 13:30 horas e de 15:15 a 18:00 horas.

Todas as persoas interesadas poden solicitar a súa cita previa no 902 30 90 00 ou a través da web: www.sycitv.com.

Máis información no servizo de medio ambiente do Concello ou no 981 67 00 02.

 

 

/by

OBRADOIRO DE EMPREGO RESERVA DA BIOSFERA

Publícanse para xeral coñecemento as bases para a selección de alumno/traballador e persoal do Obradoiro de emprego  Reserva da Biosfera: Emprego Verde II.

 

Para calquera dúbida ou aclaración poden dirixirse á Axente de Emprego e Desenvolvemento Local no teléfono 981613520.

 

Xte_BASES OE RES BIOSFERA 2022

Xte_BASES OE RES BIOSFERA 2022

/by

Bono consolida economía social

O 30 de setembro remata o prazo para solicitar o prazo pata solicitar o “Bono consolida economía social”. Código procedemento TR802L  https://www.xunta.gal/dog/Publicados/2022/20220629/AnuncioG0656-150622-0003_es.html

  • Teñen o obxectivo de apoiar a consolidación de entidades de economía social e reforzar a súa presenza no tecido económico de Galicia, con especial incidencia na transformación dixital e na mellora da eficiencia enerxética, incrementando a súa competitividade.
  • A quen se destina?: Sociedades cooperativas, sociedades laborais, empresas de inserción e centros especiais de emprego.
  • Que gastos son subvencionables?
    • Equipos informáticos.
    • Adquisición e desenvolvemento de software e páxinas web.
    • Marketing, comunicación e relanzamento comercial.
    • Mellora da eficiencia enerxética.
    • Adquisición de equipos.
    • Reforma do local de negocio.
    • Mobiliario
    • Obtención de certificacións de calidade.
    • Creación e desenvolvemento de imaxe corporativa da entidade.
    • Plan de protección de datos.
  • Cal é a contía da axuda?: Ata un 80% do custo total dos gastos subvencionables.
/by

CARRAL RECUPERA A SÚA FESTA DA EMPANADA TRAS DOUS ANOS DE PARÓN COA PREVISIÓN DE VENDER 12.000 RACIÓNS

Tras dous anos de parón pola covid-19, Carral recuperará este mércores, 7 de setembro, a súa xa tradicional Festa da Empanada. Nesta corenta e sete edición, as previsións do Concello e dos panadeiros son alcanzar e mesmo superar as cifras de venda do 2019, cando se despacharon 12.000 racións desta elaboración. Así o indicaron o alcalde, Javier Gestal, e os representantes das panadarías participantes este ano: Panadería Manuel Rodríguez, Panadería Pedro Fernández, Panadería Cañás e Panadería Da Cunha.

O evento gastronómico, que comezará o mércores a partir das 18.30 horas, supoñerá o pistoletazo de saída das festas en honra á virxe do Socorro.

Durante a presentación do evento, o rexedor celebrou “o regreso” da Festa da Empanada, que describiu como “unha cita xa consolidada tanto para os carraleses e carralesas como dentro da programación estival na comarca”. Gestal incidiu en que a celebración non podería levar a cabo “sen o enorme esforzo que realizan as panadarías, que teñen que dobrar o traballo para chegar ás cifras de venda”.

Nesta edición, a ración de empanada custará 4 euros. No caso das variedades de polbo e zamburiñas, o prezo será de 6 euros. O prezo incluirá viño por cortesía dos artesáns. As panaderías terán tamén á venda elaboracións doces.

Ambientación musical

Boa comida, pero tamén boa música. Están previstas varias actuacións de música e baile a cargo das seguintes agrupacións: Grupo de Baile O Rueiro de Tabeaio, Os Viqueiras de Ordes, o Grupo Tradicional Arnela e o Grupo de Gaitas Catalmibre. Pola noite, o inicio das festas do Socorro estará amenizado pola orquestra París de Noia e Los Coleguitas.

/by