Carral reivindicouse, unha vez máis, como capital da empanada. Trátase, xunto co pan, dun dos produtos estrela do municipio. Tal é a súa importancia, que esta é a protagonista dunha das citas gastronómicas de Carral desde hai xa case cincuenta anos. O Concello deu hoxe o pistoletazo de saída da corenta e nove Festa da Empanada. No acto estiveron presentes o alcalde, Javier Gestal, os concelleiros e concelleiras do equipo de goberno, e representantes das panadarías participantes na edición: Panadería Mercedes, Panadería Pedro Fernández, Panadería Cañás e Panadería Da Cunha.  

O evento gastronómico, un dos de maior tradición na comarca, terá lugar este xoves, 5 de setembro, a partir das 17:30 horas, e incluirá a venda e degustación deste produto e actuacións musicais.

Durante a presentación da cita, o rexedor sinalou que este evento “ten un gran arraigo, non só no municipio, senón que tamén se presenta como un evento gastronómico de referencia na comarca”. Gestal subliñou que a celebración non podería realizarse “sen o esforzo que realizan as panadarías, que teñen que dobrar o traballo para chegar ás cifras de venda”.

Nesta edición, as racións de empanada de bonito, bacallau e polo terán un prezo de 5 euros. No caso das variedades de zamburiñas, polbo e bacallau con pasas o prezo será de 7 euros. 

Ambientación musical

A cita gastronómica ofrecerá boa comida, pero tamén boa música. Así, están previstas varias actuacións de música e baile a cargo das seguintes agrupacións: grupo de música tradicional ‘Arnela’ e ‘Embruxo Gaiteiros’.

A música continuará á noite, a partir das 22:00 horas, da man das orquestras París de Noia e Zona Zero nas Festas do Socorro de Carral.

O xoves, 5 de setembro, Carral celebrará a XLIX edición da súa Festa da empanada.

A exaltación e degustación da empanada dará comezo ás 17:30 horas, coa participación das panaderías Mercedes, Pedro Fernández, Cañás e Da cunha.

Ademais, na cita non faltarán as actuacións do grupo de música tradicional “Arnela” e Embruxo de Gaiteiros.

Conectar ao público cos artistas a través dun espectáculo de pequeno formato. Ese é un dos obxectivos que a Concellería de Cultura busca cumprir co ciclo Músicas Íntimas de Carral. Na novena edición, que se celebrará esta fin de semana, o programa incluirá dous concertos a cargo de Iria Estévez e Leticia Rey.

Iria Estévez será a encargada de inaugurar o programa o sábado, 17 de agosto, ás 21.00 horas. Chegará ao municipio cun proxecto centrado na lusofonía, afondando en rexistros como o fado, a cantiga galega e a morna, entre outros. Iso si, a artista abrirá ás portas doutras músicas procedentes de lugares como Brasil, Cuba e México. Xunto con Gonzo Piña, Estévez leva varios anos actuando en festivais, actos culturais e salas de toda a xeografía peninsular.

O domingo, 18 de agosto, tomará a remuda Leticia Rey (21.00 horas). Durante o recital, a súa voz estará acompañada por Iago Mouriño ao teclado. Leticia Rey é a gañadora do Premio de Estudios Mans da Fundación Paideia e conta cunha das voces máis fermosas e persoais do panorama musical galego. A súa voz móvese entre a bossa nova, o bolero, o jazz vocal e o soul, incorporando tamén elementos do folk galego.

As actuacións levaranse a cabo na Casa da Cultura. A entrada é gratuíta pero o aforo é limitado, cunha capacidade máxima para 50 persoas. A apertura de portas será ás 20.45 horas.  

Este xoves dará comezo o VIII Torneo de Pádel de Carral que se prolongará ata o próximo 15 de setembro.

En total foron 46 xogadores (23 parellas) os rexistrados nesta competición con formato de parellas e mixto. As parellas organízanse en función do seu nivel de xogo. Así no nivel A (medio-alto) inscribíronse 11 parellas, mentres no nivel B (medio-baixo) foron un total de 12 as parellas rexistradas.

A competición dará comezo o próximo xoves 8 de agosto e prolongarase ata o 15 de setembro. Durante as primeiras semanas (ata o 4 de setembro) disputarase unha primeira fase de liguiña por grupos, dos que se clasificarán os dous mellores para a fase eliminatoria (semifinais e final), que terá lugar entre o 9 e o 15 de setembro.

Os partidos, un total de 51, disputaranse en horario de serán, a partir das 19.30 h, podendo modificarse os horarios sempre co acordo entre as parellas enfrontadas. O obxectivo desta competición é o fomento do deporte entre a poboación adulta, así como posibilitar a práctica de novas modalidades deportivas aos habitantes carraleses. Por iso, a participación no torneo terá un carácter gratuíto.

No 2023, ao Concello de Carral foille concedida unha subvención da Consellería de Medio Ambiente e Cambio Climático da Xunta de Galicia dentro da liña de axudas a entidades locais de Galicia. A axuda estaba dirixida ao desenvolvemento do proxecto PIMA Cambio Climático para a realización de accións de mitigación e adaptación ao cambio climático.

A actuación que solicitou o Concello incluíu tanto a reforma dun espazo público orientada á naturalización e á atenuación do efecto illa de calor, como a unha campaña de sensibilización centrada en achegar á veciñanza do municipio a importancia da loita contra o cambio climático e as súas consecuencias.

A actuación de reforma dun espazo público orientada á naturalización rematou en xullo e consistiu nos traballos previos de adecuación de parte da rúa Manuel Jesús Méndez Búa para a escavación dos alcorques e a posterior plantación de 12 pradairos de Freeman. Esta actuación está considerada como unha das medidas de adaptación aos efectos do cambio climático máis interesantes na contorna urbana e, grazas a ela, pódese reducir o efecto de illa de calor das zonas urbanas, reducindo a temperatura da rúa mediante o sombreado das árbores. E polo tanto resultará nun espazo de cómodo paseo e estancia para a veciñanza, e que atenuará o risco de calor extremo e tamén incidirá na mellora da calidade do aire.

Tamén servirá para a naturalización da rúa, coa plantación de especies arbóreas que contribuirán ao desenvolvemento das especies de fauna e flora local. Esta medida axuda, polo tanto, á conservación e mantemento da biodiversidade na zona urbana. A iniciativa cumpre, en definitiva, co que sinala a Organización Mundial da Saúde (OMS): “unha cidade cunha infraestrutura verde ben planificada e ben administrada vólvese máis sustentable, mellora a calidade de vida, adáptase mellor ao cambio climático, reduce o risco de desastres e conserva os ecosistemas”.

Actuacións de sensibilización da cidadanía sobre o Cambio Climático

Co fin de fomentar a sensibilización da cidadanía sobre as causas e consecuencias do cambio climático realizáronse varias actuacións de concienciación sobre a importancia do papel de todos na loita contra o cambio climático. Unha parte destas actividades de sensibilización estiveron dirixidas ao alumnado de 1º de ESO do IES de Carral e as outras desenvolvéronse mediante unha convocatoria aberta dirixida a toda a poboación do municipio.

As actividades de sensibilización no IES de Carral consistiron nunha pequena charla sobre o Cambio Climático a partir da realización dun test sobre pegada ecolóxica que fixo cada participante e a partir do cal se abordaron de forma participativa e dinámica aqueles aspectos que máis interese espertaban no alumnado.

A continuación participaron no obradoiro de construción de refuxios de fauna (hoteis de insectos, caixas-niño para aves insectívoras e caixas-refuxio para morcegos) que axudan ao mantemento e conservación da nosa biodiversidade naquelas zonas máis urbanizadas.

Para finalizar, cada grupo participante realizou unha ruta ambiental camiñando ata a área recreativa da Brexa onde foron descubrindo numerosos aspectos do medio natural e da importancia da conservación das árbores e o bosque de ribeira para axudar á conservación dos nosos ríos. E remataron instalando os refuxios para morcegos e as caixas-niño para aves insectívoras en varias árbores da área recreativa, implicando así directamente ao alumnado na creación dun espazo de biodiversidade.

Xornada de sensibilización aberta ao público xeral

Estas xornadas de sensibilización no novo espazo urbano de naturalización de rúa, en convocatoria de toda a veciñanza do municipio e centrada na concienciación sobre a loita contra o cambio climático e o importante papel de toda a sociedade tanto nas grandes como nas pequenas accións que son necesarias neste eido.

Esta xornada foi encamiñada a facilitar as boas prácticas ou o bo uso da enerxía, auga e residuos nos nosos fogares, transporte… traballando actitudes e hábitos baseados na cultura da sustentabilidade. Na mesma se expuxeron varios carteis informativos e se exhibiron diversos elementos sobre enerxías renovables (xoguetes solares, forno solar..) sobre aforro da auga (aireadores, redutores de caudal….) ou a mostra dun compostoiro para reciclar os residuos orgánicos como forma de reducir o impacto climático do tratamento dos residuos domésticos.

Un panel informará sobre o Cambio climático e os beneficios das árbores en zonas urbanas

Ademais esta actuación incluíu a realización dun panel informativo con contidos orientados á conservación da fauna e flora autóctonas e á loita contra o cambio climático e que se centra especialmente en dar a coñecer a importancia das árbores nas zonas urbanas para reducir o efecto illa de calor entre outras moitos beneficios para o medio ambiente e a nosa saúde.