CARRAL ORGANIZA UN NOVO CICLO DE CINE NA CASA DA CULTURA CON PROXECCIÓNS DE PELÍCULAS PREMIADAS E DOCUMENTAIS
Tras o éxito doutras edicións, o Concello de Carral organizará, durante o mes de marzo, un novo ciclo de cine na Casa da Cultura. A programación incluirá a proxección dalgunhas películas premiadas e aplaudidas pola crítica e documentais. A proposta arrincará este venres, día 6, e prolongarase ata o venres, 20 de marzo.
Gorrión rojo, do director Francis Lawrence, estreará o ciclo de cine. Dominika Egorova, protagonista do filme, é recrutada contra a súa vontade para ser un gorrión, unha muller que traballa ao servizo de seguridade ruso. O seu primeiro obxectivo é Nate Nash, un funcionario da CIA que dirixe a infiltración máis confidencial da axencia na intelixencia rusa. Os dous mozos caen nunha espiral de atracción que ameaza as súas carreiras, lealtades e a seguridade de ambos os dous países. Esta primeira proposta proxectarase este venres, 6 de marzo, ás 20.30 horas.
A película española Todos lo saben poderá verse na Casa da Cultura tan só unha semana despois, o venres 13 de marzo ás 20.30 horas. O argumento xira arredor de Laura, que viaxa coa súa familia desde Buenos Aires ata o seu pobo natal, en España, para asistir á voda da súa irmá. O que ía ser unha breve visita familia verase trastocado por uns acontecementos imprevistos que sacudirán as vidas das persoas implicadas.
O 3º día do ciclo será a quenda do documental Vida Ártabra, de Iago Prada. Esta obra, estreada en decembro do 2019, resume dúas décadas de historia arredor do conflicto da Vía Ártabra en tan só 50 minutos. Despois da proxección, que terá lugar o mércores, 18 de marzo ás 20.30 horas, haberá un coloquio co director.
Lady Bird será a película que pechará o ciclo de cine. A súa proxección está prevista para o venres, 20 de marzo, ás 20.30 horas. O filme relata a historia de Christine, que se fai chamar a si mesma como Lady Bird. Christine é unha adolescente de Sacramento que está cursando o seu último ano de instituto. A moza, con inclinacións artísticas, trata de atopar o seu camiño e definirse fóra da sombra protectora da súa nai.
A entrada para ver calquera destas películas é gratuíta pero as prazas son limitadas.
