No día de onte, a delegada territorial da Xunta de Galicia en A Coruña, Belén Docampo, xunto a directora xeral de Patrimonio Natural, Marisol Díaz, e a directora territorial da Consellería de Medio Ambiente e Cambio climático, Pilar Arias, visitaron o Concello de Carral, acompañadas polo alcalde, Javier Gestal, onde supervisaron a actuación realizada nos distintos puntos polos cales discorre a Ruta da Auga.

O goberno local obtivo esta axuda do Fondo Europeo Agrícola de Desenvolvemento Rural (Feader) destinada aos estudos e investimentos vinculadas á conservación e rehabilitación do patrimonio natural e cultural, así como á sensibilización ecolóxica na Rede de Reservas de Biosfera de Galicia.

Esta actuación, baixo o marco do Plan Estratéxico da PAC 2023-2027 de Galicia, ten o obxectivo de sinalizar este roteiro, de 9,3 km de lonxitude, para dar valor á conservación e recuperación das zonas naturais do municipio, que nesta ocasión afectan as parroquias de San Vicente e Cañás, na contorna do río Barcés.

Entre as funcións ambientais desta actuación destacan a sensibilización do espazo natural das persoas visitantes, o fomento do lecer responsable coa natureza, a axuda ao mantemento e conservación das especies e os seus hábitats ou axudar a coñecer os valores naturais e culturais máis relevantes do río Barcés no Concello de Carral.

A instalación destes elementos realizarase en dous tramos, un nesta anualidade 2024 na que se instalarán catro mesas informativas con códigos QR e outra durante o próximo ano, con diversas pezas informativas.

A Consellería de Medio Rural publica no DOG nº 199 do martes 15 de outubro de 2024 a orde ao abeiro da cal:

As persoas particulares, comercios e explotación afectadas pola praga da Tecia que tiveran plantacións de patacas arrincadas, semente e/ou pataca de consumo poderán solicitar indemnizacións para compensar as perdas ocasionadas.

O prazo de solicitudes estará aberto ata o vindeiro 15 de novembro de 2024.

As persoas interesadas poderán obter máis información no servizo de medio ambiente e medio rural do concello ou no teléfono 881913533.

Consulta a orde do DOG aquí.

O teatro cobrará protagonismo na recentemente estreada nova estación. Da man dunha nova edición do Ciclo de Teatro de Outono, o local Xente Nova de Tabeaio acollerá a representación de 12 funcións. Estas levaranse a cabo ao longo dos meses de outubro e novembro, ofrecendo propostas para os veciños e veciñas de todas as idades. A primeira levarase a cabo este venres, 4 de outubro, ás 20.30 horas.

A compañía Constraproducións será a encargada de inaugurar o programa con Apaga o candil (venres, 4 de outubro, ás 20.30 horas). A obra conta a historia do encontro entre o d’O Xestal e outro home miúdo e melancólico, a morte. Nun primeiro momento, o protagonista resístese a seguila pero, finalmente, remata por establecerse unha dinámica e amena tirapuxa entre ambos os personaxes.

Unha semana despois, Teatro do Miolo tomará o relevo con Saíndo do cerco (venres, 11 de outubro, ás 20.30 horas). Nela cóntase a historia de Suso, o novo residente dun centro asistencial de maiores que cre que a estas alturas, xa non merece a pena vivir. Todo cambia cando coñece a Amalia, que lle axudará a atopar de novo o sentido da vida.

Ao día seguinte (sábado, 12 de outubro 19.00 horas), e como parte do Festival de Galicreques, Titerefué e Titiritainas Teatro de Títeres chegará a Tabeaio con Diente de leche. Está dirixida a nenos e nenas maiores de 4 anos que descubrirán a misión do Rato Pérez: recoller os dentes de leite que as nenas e nenos deixan baixo das almofadas para convertelos en estrelas.

O auto do castromil será a seguinte representación o venres, 18 de outubro, ás 20.30 horas. Neste traballo de Producións Teatrais Excéntricas, a historia acontece nunha viaxe onírica abordo dun coche de liña. Mentres os viaxeiros dormen e o condutor fai o seu traballo, as maletas amotínanse e cobran vida para repasar unha curiosa historia de Galicia.

O venres, 25 de outubro, ás 20.30 horas Malasombra levará aos escenarios Testosterona, onde o director dun importante medio de comunicación debe deixar o seu posto en mans dalgún dos seus subdirectores: unha muller ou dous homes. A obra reflexiona sobre as razóns que influirán nesa decisión.

Emotivas, de Titiritres, será a seguinte proposta do Ciclo de Teatro de Outono, encadrada tamén no Festival de Galicreques (sábado, 26 de outubro, ás 19.00 horas). Na obra, Melancolía, Irritación e Seguridade descubrirannos o que son as emocións, como nos fan sentir e o divertidas e complexas que son.

Programación de novembro

O Concello inaugurará o mes con Iphixenia na porta do súper, de Compañía Humana (venres, 1 de novembro, ás 20.30 horas). Nela cóntase a historia de Iphixenia, unha nini de barrio que pasa os días nun bucle de alcol e apatía. Porén, esta dinámica cambia cando coñece a un rapaz distinto dos demais e que lle fai sentir que non está soa.

Made in Galicia, de Sarabela Teatro, aterrará en Tabeaio o venres, 8 de novembro, ás 20.30 horas. Trátase dunha comedia sobre o uso do galego que mestura a divulgación, a ironía e a realidade dun xeito perfecto.

Teatro Arroutada de Carral volverá actuar no Ciclo de Teatro o venres, 15 de novembro, ás 20.30 horas. Nesta ocasión, con Chicago, na que se conta a historia de Roxie Hart, unha muller que soña con subir ao escenario do Club Onyx pero que remata no cárcere tras ser acusada de asasinar ao seu amante. Alí coñece á súa admirada Velma Kelly, unha estrela do jazz condenada tamén por matar ao marido e á irmá. As vidas de ambas as dúas mulleres acaban entrelazándose.

A Tropa do Rueiro de Tabeaio (teatro amador) tomará a remuda o 16 de novembro, ás 20.30 horas, con La profecía. Precisamente, a historia transcorre nunha vila onde hai unha profecía: o home máis rico morrerá á medianoite. Casualmente, ese é o alcalde, que recorrerá aos seus concelleiros para que lle axuden a atopar unha solución ao problema.

Roi Borballas chegará ao municipio con Solo, onde o artista reflexionará sobre os pensamentos e sensacións dun actor sen o seu público, dun pallaso cando ninguén o observa. Será o venres, 22 de novembro, ás 20.30 horas.

Crisálida, de Caramuxo Teatro, pechará a nova edición o venres, 29 de novembro, ás 20.30 horas. A función está baseada en feitos reais, descubrindo a historia dunha mercería que leva ese nome e que ten xa máis de 80 anos de existencia.

A entrada será libre ata completar aforo. En todo caso, unha vez que estea iniciada a función, non se permitirá o acceso á sala. 

Desde o Concello informamos que se dispón de tres prazas no programa de emprego para persoas mozas inscritas no ficheiro do Sistema Nacional de Garantía Xuvenil ‘Coidados sociosanitarios’. As persoas interesadas deberán chamar, con carácter urxente, ao edificio social Toñito Espiñeira a través do teléfono 981 61 35 20.