CARRAL ABRE O PRAZO DE INSCRICIÓN PARA AS ESCOLAS MUNICIPAIS DO CURSO 2023-2024

O Concello de Carral presenta a súa programación de escolas municipais que inclúe, un ano máis, diferentes actividades para todos os gustos e idades.

O período de inscricións abriuse hoxe, mércores, ás 09:00 horas e estará activo ata o 20 de setembro. Poderá pecharse antes se se completan todas as prazas da modalidade.

As prazas son limitadas e as solicitudes deberán presentarse preferiblemente a través do correo electrónico casadacultura@carral.es e tamén de forma presencial na Casa da Cultura de Carral.

As formacións darán comezo a primeira semana de outubro, sendo responsabilidade do alumnado informarse nas dependencias municipais das datas, horas e lugares concretos das súas actividades.

A cota xeral será de 14 euros mensuais por persoa e actividade ou de 15 euros para aquelas que inclúen tres horas semanais. O prezo da Escola de Música é de 40 euros ao mes.

Haberá bonificacións para as familias numerosas, para persoas da terceira idade ou con discapacidade e para as voluntarias de Protección Civil. Todos elas terán un desconto de tres euros ao mes por actividade.

Deportes
Atletismo, ioga, patinaxe, rítmica e judo son as modalidades ofrecidas para os máis pequenos e pequenas no pavillón do colexio. Por outra banda, deportes como equitación, baloncesto, pádel, tiro con arco e tiro olímpico serán as opcións para o público xeral.

Os adultos terán tamén á súa disposición clases de zoa e ioga. Ademais, durante este curso ofreceranse, a través do departamento de Deportes, cursos de iniciación a diferentes modalidades deportivas.

Cultura
O departamento de Cultura ofrecerá diversas actividades destacando unha formación en teares e tapices que se desenvolverá os xoves, de 17:00 a 20:00 horas, no centro de formación Antón Fraguas.

Educación
O CEIP Vicente Otero Valcárcel volverá contar con servizo de madrugadores, de 7:30 a 9:20 horas, e de conciliación, de luns a venres de 15:20 a 16:20 horas.

BOLETÍN DE INSCRICIÓN (non se aceptarán inscricións anteriores ás 9:00 do mércores 6 de setembro)

TRÍPTICO DE ACTIVIDADES

/by

CARRAL ENCARA A XLVIII FESTA DA EMPANADA COA VISTA POSTA EN VENDER MÁIS DE 12.000 RACIÓNS

Carral volverá presumir dun dos seus produtos máis afamados, a empanada. O Concello encara a XLVIII edición da súa Festa da Empanada coa vista posta en superar a cifra de vendas de 2022, cando se despacharon 12.000 racións desta elaboración. Así o confirmou o alcalde, Javier Gestal, e os representantes dos obradoiros participantes este ano: Panadería Mercedes, Panadería Pedro Fernández, Panadería Cañás e Panadería Da Cunha.


O evento gastronómico celebrarase o xoves, 7 de setembro, e incluirá venda e degustación deste produto, actuacións musicais e un sorteo de agasallos.


Durante a presentación do evento, o rexedor sinalou que esta cita “ten un gran arraigo, non só no municipio, senón que tamén se presenta como un evento gastronómico de referencia na comarca”. Ademais, o alcalde destacou que a celebración non podería levarse a cabo “sen o enorme esforzo que realizan as panadarías, que teñen que dobrar o traballo para chegar ás cifras de venda”.


Nesta edición, a ración de empanada custará 5 euros. No caso das variedades de polbo e zamburiñas, o prezo será de 7 euros. O prezo incluirá viño por cortesía dos obradoiros. As panaderías terán tamén á venda elaboracións doces.

Ambientación musical
Boa comida, pero tamén boa música. Están previstas varias actuacións de música e baile a cargo das seguintes agrupacións: Grupo de Baile O Rueiro de Tabeaio, do Grupo Folclórico Faiscas da Pontraga e do Grupo de Música Tradicional Arnela. A festa seguirá en Carral da man das festas do Socorro. En concreto, a noite do 7 de setembro están previstas as actuacións das orquestras Os Satélites e París de Noia.

/by
,

CONVOCATORIA PARA A OBTENCIÓN DOS CERTIFICADOS DE LINGUA GALEGA

Publicada no DOG, a día 4 de setembro, a convocatoria para a obtención dos certificados de lingua galega, niveis Celga 2, 3 e 4. 

O prazo para matricularse comprende do 5 ao 25 de setembro. As probas terán lugar na segunda quincena de novembro ou na primeira de decembro de 2023 en Santiago de Compostela e en Ponferrada.

Máis información no servizo de Normalización Lingüística do Concello e na páxina https://www.lingua.gal/portada. Nesta páxina tamén están dispoñibles cursos de autoformación para preparar as probas.

Consulta a información aquí.

/by

CARRAL PREPÁRASE PARA UNHA FIN DE SEMANA MOI PERSOAL CO CICLO ‘MÚSICAS ÍNTIMAS’

A Concellaría de Cultura do Concello de Carral organiza para esta fin de semana o ciclo ‘Música Íntimas’, un proxecto que se levará a cabo no Edificio Social Toñito Espiñeira e que se enmarca na Rede Cultural da Deputación da Coruña e en ‘Cultura no Camiño’ de AGADIC.

En total celebraranse dúas actuacións. A primeira delas é ‘Degustación musical’, un espectáculo de Bellón Maceiras Dúo integrado por Dani Bellón e Diego Maceiras. Os artistas explorarán os timbres e posibilidades dos instrumentos de varios lugares do mundo como Galicia, Bangladesh, Xapón ou América do Sur.

Así, o público viaxará por unha ruta de composicións propias, novos arranxos para pezas tradicionais ou tamén algúns dos seus clásicos dentro dos seus 17 anos de historia.

O domingo será a quenda de Uxía e Germán Díaz que, nesta ocasión, contarán coa colaboración do guitarrista Sergio Tannus para ofrecer un show que pretende mostrar a beleza da tradición musical dos diferentes percorridos que forman o Camiño de Santiago.

Ambas as funcións serán ás 21:00 horas. A entrada é de balde ata completar aforo.

/by

CARRAL AVANZA NA MODIFICACIÓN DO PLAN NAS TRAVESAS COA APERTURA DO PRAZO DE INFORMACIÓN PÚBLICA

O Concello abriu o pasado 11 de agosto o período de información pública da modificación puntual das normas subsidiarias do plan nun sector do lugar de As Travesas. A aprobación inicial produciuse no pleno de marzo e, agora, os veciños e veciñas dispoñerán de dous meses para formular as súas alegacións.


Esta modificación traerá consigo varios beneficios para o Concello. Por unha banda, a consolidación do tecido empresarial existente favorecendo a creación de emprego e a fixación de poboación activa na contorna rural do Concello. Por outro, a mellora de dotacións públicas, pois a modificación inclúe a implantación de zonas verdes (14.650,60m2) e equipamentos (691,46m2), así como infraestruturas de comunicacións que mellorarán a mobilidade e a seguridade viaria ao redor da estrada autonómica AC-542 por onde discorre o Camiño Inglés. Tamén se prevén infraestruturas de servizos que, ademais de resolver as necesidades da actuación prevista, posibilitarán a extensión da rede de saneamento ata o núcleo rural de As Travesas.


O ámbito da modificación puntual ten unha superficie total de 104.984,42m2. O sector de chan urbanizable ten unha superficie de 92.449,81m2, cun índice de edificabilidade de 0,30m2/m2, que supoñen un total de 27.734,94m2 de superficie edificable máxima.

/by

‘AUGA QUE HAS DE BEBER, NON A DEIXES PERDER’, LEMA CENTRAL DA CAMPAÑA DE CARRAL ANTE A PREALERTA POR ESCASEZA

‘Auga que has de beber, non a deixes perder’. Ese é o lema central da nova campaña que o Concello pon en marcha ante a prealerta por escaseza moderada. O alcalde de Carral, Javier Gestal, sinala que tras o anuncio da Xunta faise máis necesario “concienciar á cidadanía sobre o coidado dun recurso tan prezado como é a auga”.

Ante esta situación, o Concello reducirá os baldeos e limitará a rega de zonas públicas ao estritamente necesario. A maiores, está levando a cabo varias accións informativas. Por unha banda, elaborou un bando no que se brindan recomendacións para os veciños e veciñas. Entre elas, aconséllase a revisión e reparación de billas ou tubaxes danadas para evitar perdas de auga. A maiores, suxírese priorizar os usos domésticos da auga: evitar o lavado de coches ou encher as piscinas e regar os xardíns ás últimas horas do día.

En paralelo, o Concello iniciará unha campaña para sensibilizar e concienciar do uso responsable da auga a través das canles de comunicación municipais. Con esta iniciativa, proporcionará aos usuarios e usuarias datos de interese sobre a auga, así como recomendacións para reducir o seu malgasto. 

/by

BANDO POLA PREALERTA POR ESCASEZA MODERADA DE AUGA

O Concello de Carral elaborou un bando debido á declaración da prealerta por escaseza moderada de auga en Galicia. No documento recóllense algunhas recomendacións e consellos atendendo ás indicacións trasladadas pola Xunta de Galicia.

En paralelo, o Concello iniciará unha campaña para sensibilizar e concienciar do uso responsable da auga, proporcionando aos usuarios e usuarias información de interese e consellos para evitar o malgasto deste recurso.

Bando Concello de Carral prealerta por escaseza moderada de augaDescarga
/by

AUXILIAR ADMINISTRATIVO/A PARA SERVIZOS SOCIAIS: ÚLTIMA PROBA DO PROCESO SELECTIVO

Faise público para xeral coñecemento a listaxe de persoas que superaron o exame tipo test realizado no proceso selectivo para a contratación dun/ha auxiliar administrativo/a para o departamento de Servizos Sociais e fíxase o día, a hora e o lugar da última proba recollida nas bases que rexen a presente convocatoria.

Consulta aquí o documento.

/by

CARRAL ESPERA REUNIR A CENTOS DE DEPORTISTAS NA CELEBRACIÓN DA II COPA GALICIA XCM

Carral xa ten data para celebrar a II Copa Galicia XCM: será o domingo, 6 de agosto. A proba, que busca dar continuidade á VI BTT de Carral, viviu no ano 2022 a súa primeira edición asinando un éxito en cifras de participación, con máis de 400 inscritos. O alcalde, Javier Gestal, o concelleiro de Deportes, Francisco Bello, e Enrique e David Maroño, do Club BTT Carral, presentaron, esta semana, o certame.

A II Copa Galicia XCM, organizada polo Concello de Carral e o Club BTT, busca cumprir os seguintes obxectivos: promover a práctica deportiva entre a veciñanza, dar a coñecer a vila e as paraxes naturais e históricas do municipio e, por último, fomentar o emprego da bicicleta nos desprazamentos.  

As inscricións poden realizarse a través da páxina web da Federación Galega de Ciclismo. As persoas interesadas deberán elixir entre tres posibles percorridos. Por unha banda, poderán escoller a ruta longa, de 60 km. Pola outra, terán a posibilidade de realizar unha ruta curta de 45 quilómetros e, por último, haberá tamén unha terceira alternativa de paseo de 25 km.  

Ao remate da xornada, farase unha entrega de trofeos aos tres mellores equipos. A clasificación levarase a cabo tendo en conta a suma dos tempos dos tres primeiros corredores de cada grupo que realizaran o percorrido completo da ruta longa en menos tempo.

/by

O GOBERNO EXPÓN UNHA MODIFICACIÓN DE CRÉDITO PARA AXUSTAR PARTIDAS ECONÓMICAS TRAS O FIN DA PANDEMIA

O goberno local elevará ao pleno de hoxe unha modificación de crédito para axustar o orzamento ás necesidades do Concello tras o fin da emerxencia sanitaria. Desde o equipo de goberno lembran que, na actualidade, estase a traballar co orzamento prorrogado do 2021, “cando nos atopabamos en plena pandemia. Nese momento, apostouse por incrementar, de xeito considerable, as partidas de servizos sociais e as de axudas ao tecido económico de Carral”. Con todo, estas consignacións económicas están por encima “do que se precisa nestes momentos polo que, de acordo coas recomendación da Intervención municipal, planeamos varias modificacións”.

En concreto, a modificación que se elevará no pleno supoñerá transferir 411.380,68 euros a partidas “esenciais”. A contía servirá, por exemplo, para favorecer a instalación de cámaras de seguridade que reforcen a seguridade cidadá no municipio (12.000 euros), para establecer convenios de colaboración con asociacións culturais, ambientais e deportivas, así como para afrontar importantes melloras en materia de obras e infraestruturas. Entre elas, a transferencia de capital permitirá realizar unha importante obra para resolver un problema na rede de saneamento xunto con Emalcsa.

Parte do montante empregarase, así mesmo, para a organización de actividades deportivas, culturais, campamentos e para programas de dinamización de feiras, entre outras.

Esta cantidade fora suplementada, no 2021, polo goberno local para facer fronte á emerxencia sanitaria da covid-19. Con todo, tal e como conclúen desde Intervención, “hai partidas orzamentarias que no exercicio de 2023 non son necesarias en parte ou na súa totalidade”. Entre elas, o goberno propón suprimir a consignación para o pago de débeda pública (que ascendía a preto de 200.000 euros e que foi liquidada). A maiores, axustaranse os apartados de axuda no fogar e de emerxencia social para adaptalos ao gasto real. Por último, suprímese a partida de 37.743,75 euros prevista, en 2021, para as axudas do programa PEL-Reactiva da Deputación da Coruña.

Estase a traballar na confección dos orzamentos do 2024 co obxectivo de que o documento económico estea aprobado de forma definitiva xa no mes de xaneiro.

/by