•   O prazo de solicitude estará durante 10 días hábiles contados a partir de hoxe, martes 13 de setembro.

Carral, 13 de setembro de 2022. O Concello acaba de abrir o prazo de solicitude dunha nova liña de axudas dirixida ás comisións de festas. O obxectivo desta subvención, de 9.000 euros, é contribuír cos organizadores das celebracións patronais que, ao longo do ano, puideron retomar a súa actividade tras dous anos de parón pola covid-19.

O Concello lanza a medida tras formular a solicitude á Deputación e, no lugar de investilo, decidiuse colaborar coas múltiples comisións do termo municipal. Os fondos municipais proceden do programa PEL-Concellos, axudas ao sector das orquestras e verbenas e repartiranse de xeito equitativo entre as entidades que cumpran os requisitos fixados nas bases.

As empresas propietarias de orquestras que vaian ser contratadas deberán cumprir, ademais, cos seguintes requisitos:

• Ter o seu domicilio fiscal e social en Galicia.
• Contar cun mínimo de dous anos de experiencia continua na actividade a partir da data de publicación da convocatoria no Boletín Oficial da Provincia.
• Declarar, responsablemente, que teñen unha composición mínima de seis integrantes. Da cifra, polo menos catro deben tocar algún instrumento musical na súa actuación.
• Declarar, responsablemente, que o 80% da súa actividade se centra na organización de espectáculos e actuación musicais en directo.

As comisións interesadas deberán pedir estas axudas nun prazo de 10 días hábiles contados desde hoxe, martes 13 de setembro. As que resulten beneficiarias poderán sufragar eventos levados a cabo entre o 1 de xaneiro e o 31 de decembro de 2022, non podendo imputarse cargos realizados con posterioridade.

Tras dous anos de parón pola covid-19, Carral recuperará este mércores, 7 de setembro, a súa xa tradicional Festa da Empanada. Nesta corenta e sete edición, as previsións do Concello e dos panadeiros son alcanzar e mesmo superar as cifras de venda do 2019, cando se despacharon 12.000 racións desta elaboración. Así o indicaron o alcalde, Javier Gestal, e os representantes das panadarías participantes este ano: Panadería Manuel Rodríguez, Panadería Pedro Fernández, Panadería Cañás e Panadería Da Cunha.

O evento gastronómico, que comezará o mércores a partir das 18.30 horas, supoñerá o pistoletazo de saída das festas en honra á virxe do Socorro.

Durante a presentación do evento, o rexedor celebrou “o regreso” da Festa da Empanada, que describiu como “unha cita xa consolidada tanto para os carraleses e carralesas como dentro da programación estival na comarca”. Gestal incidiu en que a celebración non podería levar a cabo “sen o enorme esforzo que realizan as panadarías, que teñen que dobrar o traballo para chegar ás cifras de venda”.

Nesta edición, a ración de empanada custará 4 euros. No caso das variedades de polbo e zamburiñas, o prezo será de 6 euros. O prezo incluirá viño por cortesía dos artesáns. As panaderías terán tamén á venda elaboracións doces.

Ambientación musical

Boa comida, pero tamén boa música. Están previstas varias actuacións de música e baile a cargo das seguintes agrupacións: Grupo de Baile O Rueiro de Tabeaio, Os Viqueiras de Ordes, o Grupo Tradicional Arnela e o Grupo de Gaitas Catalmibre. Pola noite, o inicio das festas do Socorro estará amenizado pola orquestra París de Noia e Los Coleguitas.

Carral será a sede da primeira Copa Galicia XCM, unha proba que dará continuidade á V BTT de Carral, xa consolidada no calendario deportivo do municipio. O alcalde, Javier Gestal, o concelleiro de Deportes, Francisco Bello, o presidente da Federación Galega de Ciclismo, Juan Carlos Muñiz, e Enrique, David e Adrián, do Club BTT Carral, presentaron onte o certame. Durante a súa intervención, o rexedor sinalou o “orgullo que supón para un municipio de Carral converterse no lugar de celebración dunha proba deste nivel”. A proba, que se celebrará o 21 de agosto (de 9.00 a 14.00 horas), discorrerá, principalmente, polo concello e terá 70 km de percorrido.

A I Copa Galicia XCM, organizada pola Federación en colaboración co Club BTT Carral e o Concello, buscará cumprir os seguintes obxectivos: promover a práctica deportiva entre a veciñanza, dar a coñecer a vila e as paraxes naturais e históricas do municipio e, por último, fomentar o emprego da bicicleta nos desprazamentos.

O certame ofrecerá dous percorridos: unha maratón de 70 km e unha ruta curta de 45 km. Poderán anotarse ata un máximo de 400 persoas que deberán ser maiores de 16 anos para tomar parte no circuíto.

Ao remate da xornada, farase unha entrega de trofeos aos tres mellores equipos. A clasificación levarase a cabo tendo en conta a suma dos tempos dos tres primeiros corredores de cada grupo que realizaran o percorrido completo da ruta longa en menos tempo.

O prazo de inscrición xa está aberto e pecharase o mércores, 17 de agosto. As persoas interesadas poderán anotarse a través da plataforma da Federación Galega de Ciclismo.