O CONCELLO REACTIVA O PRAZO PARA SOLICITAR AXUDAS PARA O ESTUDO PARA O CURSO 2019/2020

Os veciños e veciñas poderán tramitar desde o vindeiro luns, 8 de xuño, a súa solicitude de bolsas educativas municipais. O prazo, que o Concello acaba de reactivar, estará aberto ata o 30 de xuño. Por medio medio desta medida, o goberno local destinará 10.000 euros dirixidos a alumnos e alumnas de diferentes etapas educativas matriculados durante o curso 2019/2020.

O obxectivo desta liña de axudas é colaborar coas familias do municipio, axudándolles a afrontar os gastos derivados dos estudos de 2º ciclo de educación infantil, de educación postobligatoria -ciclos formativos, bacharelato ou similares- e de estudos universitarios oficiais. Como explica o goberno local, “na situación de emerxencia sanitaria provocada polo COVID-19 é máis importante que nunca axudar aos veciños e veciñas de Carral, sobre todo cando trátase de achegas en materia educativa”.

No caso de infantil, destinarase unha contía de 3.600 euros. A contía das axudas que se establecen será dun mínimo de 30 euros por persoa e de ata un máximo de 70 euros por beneficiario.

Para a formación postobligatoria e formación profesional básica a partida será de 3.000 euros. Establécese un mínimo de 40 euros por persoa beneficiaria e un máximo de 150 euros.

Por último, a liña dedicada a estudos universitarios ascenderá a 3.400 euros. Cada usuario poderá recibir un mínimo de 50 euros e un máximo de 200 euros.

As persoas interesadas en recibir máis información deberán contactar co departamento de Educación no teléfono 678 33 88 72.

/by

O GOBERNO LOCAL ADOPTOU, NOS ÚLTIMOS MESES, MEDIO CENTENAR DE MEDIDAS PARA PALIAR OS EFECTOS DO COVID-19 EN CARRAL

O Concello de Carral celebrou onte, luns 1 de xuño, unha sesión do seu pleno extraordinario. Durante a mesma, o goberno local resumiu o medio centenar de medidas postas en marcha nos últimos meses para minimizar o impacto do COVID-19 no municipio. Tal e como sinala o equipo de goberno, “nestas semanas tivemos que estar, máis que nunca, ao servizo de todos vos veciños e veciñas do municipio”. Baixo esta premisa, o Concello arrincou iniciativas e plans nas seguintes áreas: Servizos Sociais; Igualdade; Educación; Comercio; Obras, Servizos e Protección Civil; Urbanismo; Facenda e Réxime Interno; Cultura, Deportes e Xuventude e Traballo e Voluntariado.

No caso de Servizos Sociais, o goberno destacou o aumento da partida orzamentaria dedicada ás axudas de emerxencia social –esta contía experimentou un crecemento dun 340%-. Con todo, esta non foi, nin moito menos, a única disposición adoptada polo departamento. Así, desde o inicio da crise sanitaria, a área reforzou o seu servizo de asistencia telefónica, que comezou a funcionar en horario de mañá e de tarde. Ademais, co fin de atender a un dos grupos máis vulnerables fronte ao coronavirus, membros do goberno local realizaron visitas ás persoas maiores. Durante as mesmas, entregóuselles material de protección informándolles tamén sobre algunhas prestacións postas en marcha durante a corentena – entre elas, o de repartición da compra e medicinas a domicilio. A axilización na entrega de alimentos aos usuarios e usuarias do Programa de Axuda Alimentaria e a entrega de produtos do Banco de Alimentos Municipal foron outras das accións realizadas nos últimos meses. O goberno local destaca as múltiples doazóns recibidas durante todo o estado de alarma por parte de veciños e veciñas e de empresas.

A área de Igualdade duplicou tamén esforzos e ampliou o seu horario de atención telefónica –que funciona tamén polas tardes-. A difusión de servizos de asistencia psicolóxica e de campañas como Máscara 19 a través das canles de comunicación do Concello centraron parte dos esforzos do equipo de goberno.

Servizo de impresión e entrega a domicilio

Dentro da área de Educación, o servizo de impresión e entrega a domicilio foi unha das medidas estrela, así como a repartición de dispositivos electrónicos que facilitasen o acceso a internet dos escolares. En ambos os casos, o obxectivo foi axudar a que “os nenos e meniñas puideran continuar coa súa formación de xeito telemático desde as súas casas”. Aínda durante o confinamento, o programa Educando en valores seguiu funcionando, habilitándose para tal fin unha nova sección na web municipal.

Baixo a premisa de minimizar o impacto do virus na economía local, o Concello contactou, durante os últimos meses, cos comercios, empresas, persoas autónomas e cos responsables dos locais de hostalería. O goberno local non só entregou máscaras entre os establecementos abertos ao público, senón que tamén habilitou un servizo gratuíto de asesoramento. Agora, o Concello está a ultimar a creación dunha páxina web que dispoña dun directorio actualizado con todas as empresas e servizos do municipio.

Os traballos de desinfección foron outra das máximas prioridades do gobierno local desde o decreto do estado de alarma. Estas actuacións acometéronse nas zonas máis concorridas do termo municipal e nas marquesiñas do transporte público.

Desde a área de Urbanismo tratouse de impulsar ao máximo a execución de obras no municipio para fomentar a reactivación da economía.

Repartición de máscaras entre a poboación

A área de Facenda e Réxime Interno promoveu a implantación do teletraballo e repartiu, ademais, equipos de protección para todos os traballadores e traballadoras. Con todo, este material de protección repartiuse tamén entre os veciños e veciñas do municipio.

O Concello procedeu á instalación de biombos de metacrilato, dispensadores de xel e á sinalización da distancia de seguridade nos edificios municipais.

Un compromiso coa Cultura

O Concello manifestou, desde o inicio da crise, o seu compromiso coa Cultura. Tanto é así, que desde esta área está a traballarse para reorganizar e adaptar os eventos e actividades programados en lugar de cancelalos.

Por último, desde o departamento de Traballo e Voluntariado reactivarase o taller de Emprego e Competencias Clave.

/by
,

“DECRETO DA ALCALDÍA- Novo termo para admisión de orixinais para o XXIII Concurso de Poesía Concello de Carral

A Alcaldía do Concello de Carral, o día 01 de xuño de 2020, entre outros, ditou o seguinte decreto:

 

“DECRETO DA ALCALDÍA

ASUNTO: Novo termo para admisión de orixinais para o XXIII Concurso de Poesía Concello de Carral

EXPEDIENTE: 2020/G003/000234

 Logo de ver que no Boletín Oficial da Provincia da Coruña nº 51, do 16 de marzo de 2020, se publicou  a convocatoria do Concello de Carral para o XXIII Premio de Poesía Concello de Carral, en cuxas bases reguladoras se establecía coma termo de admisión de orixinais o 3 de abril de 2020

Logo de ver que a Disposición Adicional 3ª.1 do Real Decreto 463/2020, de 14 de marzo, polo que se declarou o estado de alarma para a xestión da situación de crise sanitaria ocasionada polo COVID-19 estableceuLogo de ver que  que “Se suspenden términos y se interrumpen los plazos para la tramitación de los procedimientos de las entidades del sector público. El cómputo de los plazos se reanudará en el momento en que pierda vigencia el presente real decreto o, en su caso, las prórrogas del mismo”.

Logo de ver que, en cumprimento do devandito precepto, o termo para a presentación de solicitudes en relación coas referida convocatoria quedou suspendido, sen que puidese transcorrer ningún día do prazo establecido,  e indicouse que se fixaría de novo en canto fose posible legalmente., e que de todo iso se daría conta polos mesmos medios de publicidade establecidos nas respectivas bases reguladoras.

Logo de ver que o artigo 9 do “Real Decreto 537/2020, de 22 de mayo, por el que se prorroga el estado de alarma declarado por el Real Decreto 463/2020, de 14 de marzo, por el que se declara el estado de alarma para la gestión de la situación de crisis sanitaria ocasionada por el COVID-19” establece que “Plazos administrativos suspendidos en virtud del Real Decreto 463/2020, de 14 de marzo. Con efectos desde el 1 de junio de 2020, el cómputo de los plazos administrativos que hubieran sido suspendidos se reanudará, o se reiniciará, si así se hubiera previsto en una norma con rango de ley aprobada durante la vigencia del estado de alarma y sus prórrogas.”

 En uso das atribucións que me confere o artigo 21.1 da Lei 7/1985, do 2 de abril, reguladora das bases do réxime local ,

RESOLVO

 1).- Advocar, ao non estar prevista a realización de ningunha sesión da Xunta de Goberno Local nas actuais circunstancias, as miñas atribucións delegadas nese órgano mediante o meu decreto 315/2019, do 18 de xullo correspondentes á aprobación, disposición do gasto e recoñecemento das obrigas, dentro dos límites da atribución orixinaria da Alcaldía, e á aprobación das bases de subvencións e axudas convocadas polo Concello e resolución da súa concesión.

2).-Fixar coma novo prazo para a admisión de orixinais para o XXIII Concurso de Poesía “Concello de Carral” dende o 02 de xuño de 2020 até o 23 de xuño de 2020 (ambos incluídos).

 3).- A data do acto de entrega do premio farase pública cando o xurado elixa o autor ou autora gañador/a, e en función das medidas das autoridades sanitarias competentes, obrigadas segundo a evolución da crise sanitaria do COVID-19.

4).- Publicar este decreto na páxina web do Concello (carral.es) e  no Boletín Oficial da Provincia da Coruña”

Contra o contido deste decreto, que pon fin á vía administrativa (art.114.1.c) da Lei 39/2015, do 1 de outubro, do procedemento administrativo común das Administracións Públicas), poderá interpoñer os seguintes recursos:

RECURSO POTESTATIVO DE REPOSICIÓN, perante o Señor Alcalde (art. 115 c) ROF), no prazo dun mes a partires do día seguinte ao que reciba esta notificación. (arts. 112, 123 e 124 da Lei 39/2015, do 1 de outubro, do procedemento administrativo común das Administracións Públicas).

RECURSO CONTENCIOSO-ADMINISTRATIVO, perante o órgano da Xurisdición Contencioso-Administrativa que indica a Lei 29/1988, de 13 de xullo e no prazo establecido nela.

CALQUERA OUTRO que vostede estime oportuno.

Carral, 01 de xuño de 2020

O ALCALDE

Francisco Javier Gestal Pose

 

DECRETO 231-2020 Novo termo para admisión de orixinais para o XXIII Concurso de Poesía Concello de Carral

 

/by

O CONCELLO DE CARRAL REMATA O PLAN DE PAVIMENTACIÓN E CREACIÓN DE BEIRARRÚAS EN RÍO DA MELRA, MANUEL FERROL E MÉNDEZ BÚA

Tres rúas do núcleo urbano de Carral –rúa Río da Melra, Manuel Ferrol e Méndez Búa– locen, desde esta semana, unha imaxe completamente renovada. Todo grazas ao proxecto que o Concello de Carral acaba de rematar e que implicou a pavimentación e a creación de beirarrúas nestas puntos. Con todo, antes de iniciar as obras, o goberno local tivo que modificar o proxecto orixinal, debido a que non resolvía “os problemas existentes nestas rúas”.

Como explican desde o equipo de goberno, “tal e como estaba pensado inicialmente, o proxecto non daba resposta ás necesidades dos veciños e veciñas  do municipio”. Así,o plan herdado non incluía ningunha intervención para solucionar, entre outros problemas, ás frecuentes inundacións na rúa Río da Melra. Este fenómeno producíase pola incidencia do río do mesmo nome, e afectaba a algunhas edificacións da zona. Esta rúa contaba cunha rede unitaria de augas fecais e pluviais que se separaron tras as actuacións executadas polo Concello. As intervencións en Río da  Melra serviron, así mesmo, para eliminala vaguada existente. O proxecto incluíu, ademais, a subministración, estendido e compactado de saburra natural, a formación da beirarrúa, a pavimentación da vía e o pintado da sinalización horizontal.

O antes e o despois na rúa Río da Melra tras as actuacións acometidas polo Concello de Carral

O antes e o despois na rúa Río da Melra tralas actuacións acometidas polo Concello de Carral

Este non foi o único cambio que sufriu o documento orixinal, que tampouco resolvía o problema de circulación en Manuel Ferrol, onde a rúa era demasiado estreita para o tránsito de dous coches. Agora, a rúa –que conecta coa N-550-  é de sentido único e dispón dun maior número de prazas de aparcamento. Así mesmo, tanto na rúa Manuel Ferrol como en Manuel Jesús Méndez Búa levouse a cabo a regulación do firme existente, a pavimentación do vial mediante mezcla asfáltica e o pintado da sinalización horizontal.

O antes e o despois na rúa Manuel Ferrol tras as actuacións acometidas polo Concello de Carral

O antes e o despois na rúa Manuel Ferrol tralas actuacións acometidas polo Concello de Carral

O proxecto financiouse a cargo do Plan de Obras e Servizos da Deputación Provincial da Coruña  POS +2018.

/by

INFORMACIÓN DE INTERESE SOBRE AS AXUDAS AO ALUGUEIRO

O DOG nº 22 do venres, 22 de maio, publicou unha resolución sobre as axudas para contribuír a minimizar o impacto económico e social do COVID-19 no alugueiro da vivenda habitual.

Esta subvención pódese solicitar desde o 25 de maio ata o 30 de setembro. Se precisades máis información podedes chamar ao teléfono 678 33 88 96.

Bases reguladoras das subvencións do programa de axudas para contribuír a minimizar o impacto económico e social nos alugueiros de vivendas

/by

CARRAL LANZA A CAMPAÑA PROTÉXETE DOS BULOS PARA INFORMAR AOS VECIÑOS SOBRE O COVID-19

O Concello de Carral leva semanas adoptando medidas que serven para frear o impacto do COVID-19 no municipio. Iso si, a pesar de que este plan de acción é “fundamental” nestes momentos, o goberno local considera igualmente esencial implantar iniciativas que sirvan para informar e concienciar aos veciños e veciñas sobre esta nova enfermidade. E é que, tal e como advirten desde o goberno, “nas últimas semanas circularon numerosos bulos a través de internet, en xeral, e por medio das redes sociais, en particular”. Co obxectivo de combater estas informacións falsas, o Concello acaba de lanzar a campaña Protéxete dos bulos.

Esta nova iniciativa busca un dobre obxectivo: por unha banda, desmentir algúns dos bulos relacionados co COVID-19 e, polo outro, incidir na importancia de contrastar a información e recorrer, en todo momento, a organismos oficiais.

A campaña acaba de poñerse en marcha na páxina municipal de Facebook do Concello de Carral, e prolongarase durante as próximas semanas. A través desta canle, publicaranse numerosas imaxes para desmentir algúns dos principais bulos relacionados co coronavirus. A información desta campaña actualizarase de forma diaria co obxectivo de adaptala aos últimos descubrimentos dos organismos sanitarios.

/by

RETÓMASE O PRAZO DE PRESENTACIÓN DE SOLICITUDES PARA AS PROBAS CELGA 2020

A Secretaría Xeral de Política Lingüística retoma o prazo de presentación de solicitudes para as probas do Celga 2020.

O prazo será de 14 días naturais que contarán desde hoxe, xoves 28 de maio, ata o 16 de xuño.

En cuanto ás datas das probas, estas adíanse ata novo aviso para setembro ou outubro, de acordo coa evolución da crise sanitaria provocada polo COVID-19.

Máis información na resolución publicada no Diario Oficial de Galicia.

/by

INFORMACIÓN DE INTERESE SOBRE A XESTIÓN DE BIOMASA

O Diario Oficial de Galicia publicou hoxe, venres 22 de maio, unha resolución que autoriza aos titulares de montes ou terreos forestais e de fincas en solo rústico que alberguen especies vexetais leñosas ou herbáceas ou aos que ostenten dereitos sobre os memos ao seguinte:

  • A levar a cabo actividades de xestión de biomasa, incluíndo rozas, traballos de mantemento e limpeza de restos en ditos terreos.
/by

CARRAL SACA A LICITACIÓN DOUS PROXECTOS PARA MELLORAR VÍAS POR IMPORTE DE PRETO DE 300.000 EUROS

A seguridade viaria segue sendo unha prioridade para o goberno local de Carral. Tanto así, que o Concello acaba de sacar a licitación dous proxectos de mellora de viais por preto de 300.000 euros. Estas obras financiaranse a cargo do POS+2019 da Deputación A Coruña, e supoñerán unha mellora na rede de camiños en varias parroquias do termo municipal. En concreto, o Concello sacou a contratación un plan de mellora de viais na parroquia de Veira e un segundo de acondicionamento de vías en camiños de Sumio, O Canedo e Tabeaio.

Por unha banda, na parroquia de Veira actuarase en dous camiños: no de Lago e no que conecta a Igrexa de Veira con Argonte. En ambos os casos, as intervencións consistirán na limpeza e perfilado de cunetas, ampliación dos viais, mellora da base mediante subministración e compactación de saburra artificial e acondicionamento da capa de rodadura con mestura asfáltica quente.

Polo outro, o Concello proxecta un segundo plan de actuación que se executará nos seguintes camiños: o que une Lamagal e Sandiás (parroquia de Sumio), o de Fornos (O Canedo) e nun terceiro situado no lugar de Cambela (Tabeaio). Neste caso, proxéctase a limpeza das cunetas, ampliación dos viais e a mellora tanto da base mediante subministración e compactación de saburra artificial como da capa de rodadura con mestura asfáltica en quente.

En ambos os casos, as empresas poderán presentar ofertas ata o 5 de xuño de 2020. Posteriormente, as obras deberán executarse no prazo de dous meses.

/by

O CONCELLO ESTABLECE UN PROTOCOLO DE SEGURIDADE NA SÚA 1º FEIRA MUNICIPAL DESDE O INICIO DO ESTADO DE ALARMA

O Concello de Carral retomou hoxe, mércores 13 de maio, as feiras municipais. Despois de dous meses de parón, o Campo da Feira acolleu hoxe a celebración do primeiro mercado despois do decreto de estado de alarma. A cita, que tivo lugar ao longo da mañá, transucrrió con absoluta normalidade. Con todo, para garantir a seguridade dos vendedores e vendedoras e a dos veciños e veciñas, o Concello estableceu un completo protocolo de seguridade.

O documento elaborado polo Concello esixía que houbese un 25% dos postos habituais ou autorizados. Por esa razón, o mercado de hoxe contou cun total de 12 postos de venda do sector agropecuario. Ademais, cada caseta gardaba unha distancia mínima de 6 metros con respecto a outros (así como unha separación lateral de 4 metros). O protocolo reflectía, así mesmo, o uso obrigatorio de luvas entre os vendedores e vendedoras.

Ao longo da mañá, a Policía Local e Protección Civil supervisaron o desenvolvemento da feira, asegurándose de que se cumprían, en todo momento, as medidas de seguridade fixadas polo Concello.

/by