O alcalde de Carral presentou esta mañá as bases da vixésima primeira edición do premio poético “Concello de Carral”.
José Luis Fernández Mouriño, acompañado do secretario xeral de Política Lingüística, Valentín García Gómez, presentou na Casa da Cultura unha nova edición do certame poético, que continúa co obxectivo de contribuír ao descubrimento e consolidación dos autores en lingua galega.
Na súa intervención o alcalde destacou o prestixio que vai gañando este certame e o recoñecemento que ten no ámbito literario e cultural galego. A finais do pasado ano, a Asociación Galega de Profesionais da Xestión Cultural escolleu este premio como un dos mellores proxectos exemplo de boas prácticas de xestión cultural. Fernández Mouriño lembrou tamén como se celebraron os 20 anos do premio, coa realización dun documental presente en internet, unha exposición que repasaba os autores, autoras e libros premiados nestas dúas décadas, así como as actividades iniciadas nos centros educativos de Carral relacionadas coa poesía.
O alcalde salientou a colaboración que ofrece a Consellería de Cultura e Educación, a través das súas secretarías xerais de Cultura e de Política Lingüística, que serve para que a Editorial Espiral Maior publique na súa colección de poesía o libro Das árbores tropicais e do amor de Xosé Luís Mosquera Camba que obtivo o premio na pasada edición. O libro presentarase no acto de entrega do premio deste ano, previsto para o 25 de maio.
Ademais do premio e da publicación do libro, o Concello de Carral segue coas actividades escolares relacionadas coa poesía, consistentes en obradoiros de escrita poética e en concursos de poemas.
Pola súa banda Valentín García incidiu que o apoio que a Xunta de Galicia lle dá a este premio resulta xa inexcusable, dado o valor que xa ten dentro do ámbito da cultura en Galicia e pola defensa que supón para a lingua e a creación literaria. Salientou a importante nómina de autores e autoras premiadas que xa están na primeira liña da literatura galega. Para algúns deles foi o trampolín na súa carreira literaria e para outros supuxo un mérito máis co que consolidar a súa traxectoria.
Esta nova edición do certame contempla un prazo para presentar exemplares aberto ata o 7 de abril. Poderán presentar obras os autores e autoras maiores de idade, con poemarios cun mínimo de 500 versos escritos en lingua galega.
O premio entregarase o 25 de maio, dentro dos actos das Letras Galegas en Carral, no que ademais se prevé a presentación do libro gañador da vixésima edición do concurso, titulado Das árbores tropicais e do amor de Xosé Luís Mosquera Camba
Para ampliar información, os interesados poden dirixirse á Casa da Cultura de Carral, no teléfono 981 672580 ou a través da web carral.es.
Bases XXI Concurso de Poesía Concello de Carral
A Concellería de Cultura ten xa o balanzo da súa actividade durante o ano 2017. Realizou un total de 71 actividades no que participaron 11772 persoas.
As exposicións supoñen un 68% do total de público dos diferentes eventos. É a mostra do programa Fotos para as mil historias de Carral a que logrou sumar un maior número de espectadores, xa que nos 5 meses que estivo presente no Campo da Feira acumulou un total estimado de 7000 persoas que ollaron as fotos antigas de Carral. Ao coincidir neste período coas festas do Socorro, conseguiuse un gran índice de persoas que puideron gozar desta oferta cultural.
Pola súa banda as artes escénicas nas que se reúne o teatro, a danza, os monicreques e os monólogos, sumaron case 1100 espectadores nun total de 16 espectáculos. A oferta de cine conseguiu 850 espectadores en 24 proxeccións. Nas sesións de contacontos da campaña de animación á lectura da Biblioteca municipal participaron 750 persoas. Nos obradoiros e escolas culturais tomaron parte 240 persoas de todas as idades; e na oferta musical acadouse un total de público de 700 persoas, sendo o de maior concorrencia o concerto de Recambios Tucho e Cru no Campo da Feira.
O 2017 foi un ano de consolidación de diversos programas culturais municipais. É o caso do ciclo de Músicas Íntimas o que se leva a cabo na piscina municipal e que este ano ofreceu os concertos de De Vacas e Gonçalo Guerreiro. Ou o do concerto de rock que se programa na véspera das festas patronais do Socorro ou dos obradoiros e concursos de escrita nos centros de ensino. Tamén foi o ano da conmemoración do vixésimo aniversario do premio de poesía Concello de Carral, celebrado cunha exposición no exterior da Casa da Cultura e a publicación en internet dun documental sobre este concurso literario.
No ano que rematou tamén se escolleron por parte da Asociación Galega de Profesionais da Xestión Cultural dous dos programas municipais de Carral como modelos de boas prácticas da xestión cultural. Son o certame de poesía Concello de Carral e Fotos para as mil historias de Carral. Esta elección e os resultados obtidos no 2017 enchen de orgullo ao equipo municipal de Cultura e suponlle folgos engadidos para seguir mellorando no seu traballo e na consecución dos seus obxectivos.
O museo do castro das Travesas vai levar a cabo unha serie de visitas guiadas entre os días 26 e 29 de decembro, co obxecto de ofrecer á poboación local e visitantes a posibilidade de coñecer as características e pezas extraídas deste castro carralés.
As visitas comezarán ás 11:30 h. e terán unha duración dunha hora. Correrán a cargo da técnica responsable da sala, que está a prestar os seus servizos durante estes meses grazas a unha subvención da Deputación da Coruña.
Nos comentarios da visita guiada, os participantes poderán coñecer aspectos históricos do mundo castrexo, das singularidades do castro das Travesas e ver algúns interesantes obxectos extraídos nas dúas escavacións que se fixeron neste xacemento arqueolóxico.
As visitas serán de balde e non é necesario reservar praza. O museo está na Casa da Cultura.
Películas para todos os públicos proxectaranse na Casa da Cultura nun novo ciclo de cine, que nesta ocasión presenta oito producións. O programa é o seguinte:
Martes 26 de decembro:
17:00 h: VAIANA
20: 30 h: LA LA LAND, LA CIUDAD DE LAS ESTRELLAS
Xoves 28 de decembro:
17:00 h: ¡CANTA!
20:30 h: ROGUE ONE. UNA HISTORIA DE STAR WARS
Martes 2 de xaneiro:
17:00 h: MASCOTAS
20:30 h: LA GRAN APUESTA
Xoves 4 de xaneiro:
17:00 h: ICE AGE 5. EL GRAN CATACLISMO
20:30 h: INDEPENDENCE DAY. CONTRAATAQUE
A entrada é de balde e as localidades limitadas. As persoas interesadas deberán retirar previamente as entradas na Casa da Cultura.
Alumnado do Instituto de Secundaria de Carral visitaron a Casa da Cultura onde puideron ver o documental Artistiña sobre a vida dos novos creadores das artes plásticas, e puideron coñecer da man do produtor e director Manolo Gómez cales son os procesos do cine de animación.
Foron dúas actividades que deron a coñecer as interioridades destes dous ámbitos da creación cultural, animando aos xoves a participar deles. Forman parte dunha programación da Concellería de Cultura que pretende ofrecer unha visión diferente dos detalles das múltiples expresións culturais.
Máis de medio centenar de arqueiros acudirán este sábado unha nova edición deste clásico torneo do Nadal. Read more