Tag Archive for: concello de carral

CARRAL, ABEGONDO E BERGONDO POÑEN EN MARCHA UN SERVIZO CONXUNTO DE ATENCIÓN TEMPERÁ

Servizo de Atención Temperá (Concellos de Carral, Abegondo e Bergondo)

O Concello de Carral e os de Abegondo e Bergondo ofrecen, conxuntamente, unha nova prestación de benestar social que está a mellorar a calidade de vida dos veciños e veciñas: un servizo de atención temperá que xa está en marcha grazas a unha subvención obtida pola Xunta de Galicia.

Este novo servizo está dirixido a nenos e nenas de entre 0 e 6 anos de idade, e con el, búscase atender posibles trastornos de desenvolvemento e detectar casos de pequenos e pequenas con risco de padecelos. Así, o obxectivo é traballar no desenvolvemento da autonomía personal e da inclusión social dos cativos e cativas.

Aspace é a entidade adxudicataria do servizo. Para levar a cabo o seu labor, contan cun psicólogo e psicopedagogo, cun mestre en educación especial e estimulador, e cun logopeda. A atención é rotatoria nos tres municipios.

O período que abarca a subvención, de 14.996,25 euros, comprende os meses de setembro e outubro, podendo os Concellos valorar a súa continuidade. Nestes dous meses, ao tratarse dunha unidade de nova creación, o servizo centrarase na valoración inicial dos usuarios.

Servizo de Atención Temperá (Concellos de Carral, Abegondo e Bergondo)

Servizo de Atención Temperá (Concellos de Carral, Abegondo e Bergondo)

/by

CARRAL INICIA OS TRABALLOS PARA CUBRIR AS PISTAS DE PÁDEL DO COMPLEXO DEPORTIVO

FOTO CARRAL-Carral inicia los trabajos para cubrir las pistas de pádel del Complexo Deportivo 2

O Concello de Carral acaba de iniciar os traballos para cubrir as pistas de pádel do Complexo Deportivo. As actuacións arrincaron esta semana e, con elas, o Concello busca que os veciños e veciñas do municipio poidan darlle un maior uso a estas instalacións. As obras están cofinanciadas con fondos municipais e do Grupo de Desenvolvemento Rural Mariñas-Betanzos con cargo aos fondos europeos dos programas Leader e Feder. O orzamento total do proxecto ascende a preto de 52.000 euros.

O proxecto contempla a realización dunha cubrición das dúas pistas consistente nunha cuberta de chapa grecada con curva autoportante e sustentada por alicerces metálicas e vigas en todo o perímetro. Desta forma, o corredor que separa ambas as pistas quedará tamén resgardado. Con todo, e para incrementar a funcionalidade da dependencia, o novo equipo de goberno incluíu, ademais, a instalación de iluminación nas pistas, que incrementará en preto de 2.000 euros o importe do proxecto. Con este engadido, o espazo poderá utilizarse, non só con condicións meteorolóxicas adversas, senón tamén durante un maior número de horas ao día.

Ademais de incrementar o uso nestas instalacións, o proxecto servirá para mellorar as condicións de durabilidade deste espazo deportivo.

Actualmente, os traballos están a ocupar as dúas pistas de pádel, polo que permanecerán temporalmente pechadas ata, aproximadamente, o 15 de outubro, data na que se prevé que finalicen as obras.

/by

AS PISTAS DE PÁDEL ESTARÁN TEMPORALMENTE PECHADAS POLOS TRABALLOS DE CUBRICIÓN

O Concello inicia os traballos para cubrir as pistas de pádel

O novo equipo de goberno do Concello de Carral acaba de iniciar as obras para cubrir as pistas de pádel. Para realizar estes traballos é preciso ocupar as dúas pistas. Por mor deses labores, que durarán aproximadamente ata o 15 de outubro, estas instalacións estarán temporalmente pechadas. Desculpade as posibles molestias ocasionadas.

/by

XURXO ALONSA RECIBIRÁ ESTE VENRES O PREMIO CONCELLO DE CARRAL DE POESÍA

Cartel Acto poesía 2019.A Casa da Cultura de Carral acollerá este venres, ás 20:00 h, o acto do 22º Certame de Poesía Concello de Carral, no que se lle entregará o premio a Xurxo Alonso por gañar esta edición co seu libro En luz escrita, e no que tamén se presentará a publicación do libro gañador do ano pasado, As bicis de Xabier Cid.

O acto estará presidido polo alcalde en funcións José Luis Fernández Mouriño, e contará tamén coa participación do director xeral de Políticas Culturais, Anxo Lorenzo, do escritor e editor Miguel Anxo Fernán Vello, e de Inma Otero, membro do xurado da presente edición.

Teatro do Atlántico pechará o acto co espectáculo poético musical De abrentes e ocasos, facendo un percorrido por poemas dalgúns dos nosos autores e autoras galegas máis significativas, coa música en directo ao piano de Nani García.

Como en edicións anteriores deste premio, o Concello de Carral, grazas á colaboración da Xunta de Galicia, agasalla aos asistentes o libro que se presenta. Nesta ocasión Xabier Cid poderá dedicarllo aos participantes no acto.De abrentes e ocasos

Nesta semana tamén se están facendo os actos de entrega dos premios dos concurso escolar e xuvenil de poesía, no que se presentaron un total de 28 obras. Os actos estanse a facer nos centros de ensino, no que se premian os tres mellores poemas de cada categoría e no que se fai entrega a todos os participantes de agasallos consistentes en libros e discos cedidos pola Consellería de Cultura da Xunta de Galicia, a Deputación da Coruña e do propio Concello de Carral.

/by

XURXO ALONSO GAÑA O XXII CERTAME DE POESÍA “CONCELLO DE CARRAL”

Xurxo Alonso, coa súa obra En luz escrita resultou gañador do Concurso de Poesía “Concello de Carral” do presente ano.

Xurxo AlonsoO xurado salienta neste poemario a súa sólida arquitectura, a forza intensional do conxunto e a admirable estratificación conceptual do discurso, inzado de citas, homenaxes e intertextualidades que entroncan este texto coa mellor tradición galega e foránea. Tamén si, o xurado destacou a singular voz poética que espella nun léxico celmoso, o perfilado de visopoemas que recrean unha moi particular e xenuína atmosfera luminosa e a concepción xeral do poemario como un mecano de magnífica orquestración sinfónica.

No ano 2004, Xurxo Alonso xa gañara este premio co libro Breviario de Aldemunde.

O xurado do concurso estivo formado por Inma Otero, Armando Requeixo e Xabier Cid, coa presidencia da Concelleira de Cultura, Margarita Ramilo Varela, e asistidos en calidade de secretario, polo técnico municipal de Cultura e coordinador do premio, Carlos Lorenzo Pérez. Ao certame presentáronse un total de 44 poemarios.

O premio de Carral está dotado con 2500 euros e a publicación da obra na colección de poesía de Edicións Espiral Maior.

Xurxo Alonso (Bos Aires, 1956) é pintor ademais de poeta. Licenciado en Bioloxía pola Universidade de Santiago de Compostela, formouse na súa faceta plástica nos obradoiros de importantes artistas como Josep Guinovart, Manuel Alcorlo, Bonifacio Alonso e Bruce McLean. No eido poético, Alonso ten obtido boa parte dos galardós máis importantes de Galicia: Francisco Añón (1998), Xoán de Requeixo (1999), Avelina Valladares (2000 e 2018), Feliciano Rolán (2001), Johán Carballeira (2001), Fermín Bouza Brey (2003), Concello de Marín (2007), Concello de Ourense (2016) e Díaz Castro (2018). O seu libro máis recente é No interior do vento, publicado por Edicións Fervenzas e que resultou gañador do Premio Avelina Valladares.

O acto de entrega do premio “Concello de Carral” terá lugar o 31 de maio, na Casa da Cultura de Carral, dentro da programación de Letras Galegas 2019. O mesmo acto servirá para a presentación do poemario que gañou na pasada edición, As bicis de Xabier Cid. Como remate a esta homenaxe á poesía, a compañía Teatro do Atlántico presentará o seu espectáculo poético De abrentes e ocasos.

Como ven sendo habitual nas últimas edicións, a Xunta de Galicia colabora co Concello de Carral,  a través da Secretaría Xeral de Política Lingüística e da Dirección Xeral de Políticas Culturais para a publicación da obra premiada.

/by

ALUMNOS DO IES DE CARRAL RECIBEN PREMIOS POLOS SEUS CARTEIS DEDICADOS ÁS MULLERES DA HISTORIA

Alumnos do IES reciben premios polos seus carteis dedicados ás mulleres a historia

O Edificio Social Toñito Espiñeira acolleu a entrega de premios e diplomas do concurso de cartelería no que participou o alumnado do IES de Carral. Os e as participantes neste certame, organizado polo instituto coa colaboración do Concello de Carral, elaboraron carteis coas figuras femininas que consideraron máis importantes, non só ao longo da historia, senón tamén na actualidade. A creación das obras estivo enmarcada nun proxecto que pretendía poñer en relevo a ausencia das mulleres nos libros de texto nos institutos.

No concurso participaron os alumnos e alumnas de todos os cursos da ESO, que recibiron un diploma. A gañadora de 1º da ESO foi María Torreiro, co seu debuxo da artista Frida Kahlo. O premio en 2º curso levoullo Amase Fernández, coa imaxe de Hedy Lamarr, actriz e inventora austriaca. En 3º a gañadora foi Carolina Brea, que levou o galardón poñendo como protagonista a Valentina Tereshkova, astronauta e política rusa. Por último, o triunfo en 4º foi para Martina Torreiro e o seu cartel de Sojourner Truth, activista que loitou polos dereitos da muller.

“É un orgullo ter rapaces e rapazas con este tipo de iniciativas. Debemos seguir traballando para acadar unha igualdade real entre homes e mulleres”, declarou o alcalde de Carral, José Luis Fernández Mouriño, presente no acto. Tamén acudiu ao evento a concelleira de Educación, Traballo e Benestar, Florinda Duarte, que explicou o difícil que foi para o xurado decidir quen eran os galardoados, “todos son realmente gañadores desde ou momento en que decidiron Concello de Carral facer este fermoso traballo”, expresou. Á entrega de premios asistiu tamén a directora do IES de Carral, Verónica Mosquera, xunto a algúns dos profesores do centro.

 

/by

CARRAL CONSEGUE OS TERREOS PARA CREAR UN NOVO ESPAZO MULTIUSOS NA RÚA MANUEL JESÚS MÉNDEZ BÚA

Carral consegue os terreos para crear un novo espazo multiusos na rúa Manuel Jesús Méndez Búa

O Concello de Carral contará cun novo espazo multiusos na rúa Manuel Jesús Méndez Búa. O alcalde de Carral, José Luis Fernández Mouriño, asinou un convenio cos propietarios da leira para a cesión destes terreos, que contan cunha extensión total de 4.879 metros cadrados.

A parcela está situada no núcleo urbano de Carral, á beira do edificio social Toñito Espiñeira e a escasos metros da Casa Consistorial e do Campo da Feira de Carral. Este terreo servirá para crear un novo espazo multiusos no que se habilitará, inicialmente, unha zona de aparcadoiro con capacidade para 200 coches.

Con todo, o goberno local expón tamén que o espazo sirva para celebrar eventos e mesmo para acoller a feira do municipio dos días 4, 13 e do último domingo de cada mes. O rexedor carralés indicou que se trata “dun importante logro que permite sumar un novo espazo para ou uso e goce de todos vos veciños e veciñas”.

/by

SESENTA ALUMNOS DO VICENTE OTERO VALCÁRCEL CONVERTÉRONSE EN CONCELLEIROS POR UN DÍA

Sesenta alumnos do Vicente Otero Valcárcel convértense en concelleiros por un día

Máis se sesenta alumnos de 5º de primaria do Vicente Otero Valcárcel convertéronse, o xoves 11 de abril, en auténticos concelleiros e alcaldes por un día. Os pequenos, divididos en grupos, formaron tres partidos políticos -Partido Local de Carral, Partido Igualitario e Partido Liberadores-.

Sesenta alumnos do Vicente Otero Valcárcel convértense en concelleiros por un día

Os pequenos formaron tres partidos políticos

 

Por cada formación había un candidato á alcaldía que se encargou de presentar ante o resto dos seus compañeiros as súas propostas de goberno. Durante a actividade, os mozos políticos votaron cal era o mellor candidato para asumir a alcaldía de Carral. Finalmente, tras a votación dos asistentes, saíu elixido un pequeno rexedor con grandes propostas para o concello. O alcalde do Concello, José Luis Fernández Mouriño, felicitou ao novo rexedor por conseguir a vitoria.

Sesenta alumnos do Vicente Otero Valcárcel convértense en concelleiros por un día

O alcalde felicitou ao pequeno rexedor pola vitoria

Unha vez finalizado o pleno, os nenos e nenas, acompañados pola concelleira de Educación, Traballo e Benestar, Florinda Duarte, e por persoal do departamento de Educación, percorreron a Casa Consistorial coñecendo as diferentes áreas.

 

/by

PAPEQUES REMATA ESTA SEMANA CUN ESPECTÁCULO MUSICAL E OUTRO PARA BEBÉS

alfonbraMaxicaO programa Papeques 2019 conclúe esta semana con dúas funcións que terán lugar na sala do edificio social Toñito Espiñeira de Carral.

Camiños é un espectáculo musical e un libro-disco a cargo de Magín Blanco, un dos mellores músicos e compositores de Galicia dedicados ao publico infantil e xuvenil. Camiños é unha metáfora da vida onde conflúen música, teatro, poesía e contos, para estimular e enriquecer a imaxinación e a creatividade dos nenos. Este espectáculo terá lugar o xoves 11 de abril, ás 18:00 h. e está dirixido a público infantil e familiar.

Títeres Babaluva presentará para bebés (de 0 a 3 anos) A alfombra máxica, un lugar de libre experimentación, unha alfombra táctil, sonora e olfactiva onde a artista plástica convida aos máis pequenos e pequenas a mergullarse nunha viaxe sensorial. Xuntos descobren o pracer de apalpar, manipular, escoitar, ver, saborear… As prazas para asistir a este espectáculo sensorial son limitadas, polo que é necesario recoller previamente as entradas na Casa da Cultura. A alfombra máxica presentarase o venres 12 de abril ás 18:00 h.

Con estas dúas funcións finaliza a segunda edición deste ciclo de cine e espectáculos infantís, que ata o momento conseguiu un total éxito de público.

/by