O Concello de Carral mantén a súa aposta pola cultura segura. Así se reafirmou hoxe, venres 16 de outubro, coa presentación oficial do Ciclo de Teatro de Outono. A iniciativa arrincará, sábado día 17 de outubro, e prolongarase ata o mes de decembro, ofrecendo un total de oito funcións teatrais.

Ao acto de presentación acudiron o alcalde de Carral, Javier Gestal, o concelleiro de Cultura, Francisco Bello, o deputado de Cultura da Deputación da Coruña, Xurxo Couto Rodríguez, e varios membros do goberno local. Así mesmo, o evento contou coa presenza de representantes dalgunhas das compañías que participarán neste ciclo: Pérez&Fernández, Producións Teatrais Excéntricas, Teatro da Ramboia, Talía Teatro e Malasombra Producións.

Durante a súa intervención, o rexedor agradeceu a colaboración da Deputación da Coruña a través da súa Rede Cultural, e aproveitou para reafirmar o compromiso do Concello co desenvolvemento de actividades culturais. Pola súa parte, os membros das compañías teatrais agradeceron ao Concello a súa aposta por este sector, un dos máis afectados pola pandemia da COVID-19.

Un programa para todos os públicos

Todos os espectáculos do ciclo levaranse a cabo no local Xente Nova de Tabeaio ás 20.30 horas, e realizaranse atendendo a un estrito protocolo para evitar contaxios pola COVID-19.

O primeiro terá lugar mañá, sábado 17 de outubro. Será entón cando a compañía Talía Teatro aterre con Vida de cans. Trátase dunha comedia paródica e metafórica na que os actores se converten en tres cans. Durante a función, os animais terán que afrontar un conflito diferente en función da súa personalidade.

Malasombra Producións tomará o relevo con Bernarda o sábado, 24 de outubro. A función está protagonizada por Bernarda, unha muller dura e loitadora cuxa personalidade se forxou a raíz da súa infancia na posguerra. Ao morrer o seu marido, a muller ten que asumir o papel de pai e de nai, educando ás súas fillas o mellor que sabe.

O meu mundo non é deste reino, de Teatro da Ramboia, será a vindeira proposta do Ciclo de Teatro de Outono de Carral -31 de outubro-. Neste caso, trátase dunha adaptación da Farsa de Bululú de Manuel María na que se presenta unha parodia da ditadura franquista.

O ciclo continuará o 14 de novembro coa interpretación de Halsel, da compañía cullerdense O Ruiseñor. A historia preséntase como unha metáfora ambientada no inicio da Guerra Civil española na que se combina a beleza e a dureza, converténdoa nunha función única.

O Ciclo de Teatro de Outono contará, o 21 de novembro, coa interpretación de Os nenos da variola, de Pérez & Fernández. A obra está baseada na Real Expedición Filantrópica da Vacina que partiu desde o porto da Coruña o 30 de novembro de 1803. Ese día, 22 orfos e orfas conformaron unha cadea humana “brazo a brazo” para facer chegar a vacina aos territorios de ultramar.

Culturactiva Producións chegará ao municipio co seu espectáculo cómico Senior, no que os actores Luis Iglesia e Marcos Orsi explicarán ao público como é a crise dos 50. Unha reflexión en clave de humor sobre a chegada ás portas da terceira idade.

Decembro contará coa representación de Lolo e mamá, por parte De Ste Xeito Producións. Trátase dunha danza teatral na que o público descubrirá, a través do humor, que as cousas case nunca son o que semellan.

O Ciclo cerrarase con Cartoons, unha proposta de Producións Teatrais Excéntricas. A función narra a historia de persoas que o perderon todo e que teñen que aprender a facelo de novo. Todo parece un drama, peor en realidade non o é.

Os aforos de todas as funcións son limitados, polo que as persoas interesadas deberán reservar os seus convites chamando ao teléfono 981 67 25 80.

O Concello de Carral é un dos concellos que todos os anos participa no Encontro Internacional de Música de Pulso e Púa no Camiño 2020. Nesta edición, por mor das limitacións provocadas polo Covid19, o festival emitirá en directo (abaixo nesta nova) unha gala cos detalles indicados na imaxe.

A mellora das infraestruturas e os servizos para os veciños e veciñas é unha máxima para o goberno local. Como parte deste compromiso, o Concello acaba de iniciar as obras de rehabilitación enerxética dos locais das Travesas e San Vicente de Vigo. Estas actuacións teñen un custo de máis de 100.000 euros e fináncianse a cargo de dúas subvencións do IDAE -Instituto para a Diversificación e o Aforro da Enerxía-. Estes traballos consistirán na renovación das fachadas, as cubertas e as carpinterías exteriores para illar termicamente ambos os inmobles.

O obxectivo destas intervencións, tal e como sinalan desde o equipo de goberno, “é que unha vez rematadas estas actuacións estes edificios se convertan en espazos enerxeticamente eficientes”.

No de San Vicente de Vigo aplicarase un sistema de illamento térmico exterior de la de roca de 8 cm e substituirase a cobertura de fibrocemento da planta alta e do almacén por unha cobertura de tella curva. Ademais, substituiranse tanto os falsos teitos como as carpinterías exteriores da planta baixa. As novas carpinterías serán de PVC e contarán con acristalamento dobre.

No caso das Travesas, replicaranse as actuacións para mellorar o illamento térmico exterior, colocaranse elementos de protección de madeira e unha cuberta na parte superior mediante falso teito.

En palabras do executivo, “estes dous proxectos servirán para mellorar estas instalacións, garantindo un maior confort térmico e alcanzando, ademais, un importante aforro non consumo de enerxía”.

Volven as tardes de cine ao Concello de Carral. A Concellería de Cultura arrincará este venres, 2 de outubro, un novo ciclo que inclúe propostas fílmicas para todas as idades. O programa levarase a cabo entre os meses de outubro e decembro, e todas as propostas terán lugar os venres, ás 20.30 horas, na Casa da Cultura.

O Concello ofrecerá este venres a primeira película, Todos lo saben. A longametraxe conta a historia de Laura, que viaxa coa súa familia desde Bos Aires ata España para asistir á voda da súa irmá.

A iniciativa continuará coa proxección de Lady Bird, que chegará á Casa da Cultura o 9 de outubro. Neste caso, Christine –Lady Bird-, unha adolescente que está no seu último ano de instituto, é a protagonista da historia.

Alita: angel de combate chegará a Carral o 16 de outubro. O filme está protagonizado por Rosa, que non só non lembra quen é, senón que un día espera nun mundo que non coñece.

Os veciños e veciñas poderán gozar de Malos tiempos en el Royale o 23 de outubro. O filme trata sobre a reunión entre sete descoñecidos no hotel El Royale, un sitio ruinoso cun escuro pasado.

O 30 de outubro será a quenda de Eroski Paraíso, na que Álex quere filmar un documental sobre seus pais, que se coñeceron no 1989, na sala de festas Paraíso (Muros).

El día que vendrá formará parte tamén do ciclo de cine (6 de novembro). A película está ambientada en Alemaña, ano 1946. Rachel Morgan aterra nas ruínas de Hamburgo para reunirse co seu marido, Lewis, un coronel británico que recibiu a misión de reconstruír a cidade destruída.

Novembro continuará coa proxección do filme Johnny English: de nuevo en acción. Cando un ciberataque revela a identidade de todos os axentes secretos de Reino Unido, Johnny English convértese na única esperanza do servizo secreto.

El arte de vivir bajo la lluvia chegará o 20 de novembro, relatando a historia dun can chamado Enzo que rememora as leccións aprendidas de Denny, un piloto de carreiras.

A seguinte película do programa será ¿Podrás perdonarme algún día?, proxectándose o 27 de novembro. Esta segue historia de Lee Israel, unha respectada biógrafa en decadencia que comeza a falsificar cartas de escritores e celebridades falecidas co fin de pagar o aluguer.

O ciclo continuará o 4 de decembro coa proxección de Ad Astra. Esta película conta a historia do astronauta Roy McBride, quen viaxa aos límites exteriores do sistema solar para atopar ao seu pai perdido e desentrañar un misterio que ameaza á Terra.

O ciclo de cine pecharase o 11 de decembro con Misión: imposible-fallout. Trátase da sexta entrega da saga, que presenta a Ethan Hunt e ao seu equipo IMF nunha loita a contrarreloxoso despois de que unha misión saia mal.

As localidades son limitadas, polo que as persoas interesadas deberán reservar os seus convites 48 horas antes de cada actividade. Atendendo á situación sanitaria provocada pola COVID-19, o uso da máscara e o mantemento a distancia de seguridade serán obrigatorios.