A Asociación da Custodia do Territorio Brexa organizará unha xornada de limpeza no río Barcés o domingo, 27 de setembro. No caso de Carral, a actividade levarase a cabo nas parroquias de Barcia, Cañás e VIgo.
As persoas interesadas poderán:
O Concello de Carral está a executar a obra de “MELLORA DA SEGURANZA VIARIA EN ESTRADA MUNICIPAL NO TREITO DO LUGAR DO PENEDO AO LUGAR DE LAVANDEIRA”, cun orzamento de 37.342,68 €, e con financiamento parcial a través dunha axuda da Axencia Galega de Desenvolvemento Rural-Agader (Xunta de Galicia) por importe de 30.861,72 €.
A axuda foi outorgada ao abeiro da resolución do 19 de decembro de 2019 pola que se aproba o Plan marco
de mellora de camiños municipais de acceso a parcelas agrícolas 2020-2021, cofinanciado co Fondo Europeo Agrícola de Desenvolvemento Rural (Feader), ao abeiro do Programa de desenvolvemento rural (PDR) de Galicia 2014-2020.
A axuda está integrada nun 75% por financiamento da UNIÓN EUROPEA (Feader- Fondo Europeo Agrícola de Desenvolvemento Rural), por importe de 23.146,29 €.
A Xunta de Galicia achega un 17,5 % da axuda (5.400,80 €) e o Ministerio de Agricultura, Alimentación e Medio Ambiente o 7,5% restante (2.313,63 €).
A obra consiste na redución da altura das cunetas, coa construción de cunetas de formigón, e no pintado dos laterais para mellorar a visibilidade da estrada municipal obxecto do proxecto, no treito que vai do lugar do Penedo ao lugar de Lavandeira, na parroquia de Cañás.
Todo o cal faise público na páxina web do Concello de Carral, coma promotor da obra, en cumprimento do establecido no artigo 19.8 da devandita resolución da Agader do 19 de decembro de 2019.
A Casa da Cultura de Carral acolleu o sábado 12 de setembro o acto central do XXIII Premio de Poesía Concello de Carral. Por un lado, o acto serviu para conceder o galardón da presente edición, que recaeu nas mans de Manuel López Rodríguez pola súa obra Nas pulsacións. Polo outro, no evento levouse a cabo a presentación de En luz escrita de Xurxo Alonso, o poemario que gañou o premio o pasado ano, e que pasará a formar parte da colección de Edicións Espiral Maior.
Como en anos anteriores, o Concello contará coa colaboración económica da Xunta de Galicia para a edición da obra gañadora do certame de poesía.
Á entrega acudiron membros do goberno local do Concello de Carral, o director xeral de Políticas Culturais da Xunta de Galicia, Anxo Lorenzo, e o responsable de Edicións Espiral Maior, Fernán Vello.
Debido á situación sanitaria, o evento contou cun aforo reducido. A diferenza doutras edicións, e co fin de extremar as precaucións pola COVID-19, non se realizou ningún tipo de intervención artística. Ao remate, o público asistente recibiu exemplares de En luz escrita e tiveron ocasión de acadar a sinatura do seu autor, Xurxo Alonso.
Un discurso inspirado convertido en poemario
Manuel López Rodríguez gañou esta última edición por unha obra que, segundo o criterio do xurado, amosa un discurso sólido e inspirado, cunha gran riqueza léxica e con interesantes descubrimentos estilísticos.
O autor ten publicado un libro titulado Antítese nativa, así como múltiples poemas en revistas e volumes colectivos. Foi gañador dos premios Suso Vaamonde de poesía, Eduardo Pondal e López Ardeiro, entre outros.
O Concello de Carral segue traballando para reforzar a seguridade viaria en todo o termo municipal. Tras finiquitar varias intervencións en estradas das parroquias de Paleo, Quembre, Cañás e Barcia, o executivo está a executar xa unha nova actuación: o proxecto de mellora da seguridade na vía que une O Penedo e Lavandeira. As obras inclúen a mellora do firme, a construción de cunetas de seguridade, a instalación de bandas rugosas e o pintado da sinalización.
Este non é o único proxecto que o Concello ten en marcha. Así, o executivo está a actuar tamén na estrada que conecta Sergude e Cañás, onde se proxectará a construción de novas cunetas. A maiores, intervirase na ponte sobre o río Brexa (Sergude).
Novas cunetas en 4 parroquias
O Concello de Carral e a Deputación da Coruña concluíron, no mes de agosto, intervencións en varios puntos do termo municipal que implicaron a creación de cunetas en catro parroquias. En concreto, este plan, financiado con fondos municipais e provinciais, supuxo a ampliación do ancho de vía en estradas das parroquias de Paleo, Quembre, Barcia e Cañás.
Tal e como explican desde o goberno local, “o obxectivo é seguir traballando para mellorar a rede de estradas e camiños no termo municipal, garantindo unha maior seguridade para os vehículos e tamén para os veciños e veciñas que transitan por estas vías”. As actuacións xa rematadas supuxeron a creación de cunetas de seguridade nalgunhas das estradas destas parroquias. Estas intervencións serviron para ampliar o ancho da calzada, favorecendo a circulación dos coches e tamén a dos viandantes.
Estas obras realizáronse na DP-2104 –en San Pedro de Quembre e no lugar de Pousada en Barcia-; na DP-2105 á altura de Cabrois (Paleo) e, por último, no lugar de Soavila (parroquia de Santa Baía de Cañás).
O humor e a retranca faranse un oco na programación cultural do Concello de Carral a través do ciclo Venres de Monólogo, que arrincará esta mesma semana. Con respecto a outras edicións do evento, as actividades deste ano levaranse a cabo no local Xente Nova de Tabeaio e estarán suxeitas a un estrito protocolo de seguridade co fin de reducir o risco de contaxio pola COVID-19.
O monologuista Avelino González será o primeiro en aterrar no municipio. Farao con Contos de contrabando, unha historia que versa sobre como, en moitas ocasións, vivimos na marxe da lei. A actuación será o venres, 11 de setembro ás 21.00 horas.
Cándido Pazó collerá o relevo o vindeiro venres, 18 de setembro (21.00 horas), coa súa función Como dicía o outro. Nela, o humor, a emoción, a imaxinación e a memoria mestúranse ata enfiar un relato con historias, contos e lerias aptos para todos os públicos.
A última actuación do ciclo será Eu quero ser galega, de Stephy Llaryora. A humorista presentará a divertida historia dunha vasca que desexa converterse en galega, adaptándose a todas as dificultades do idioma, dos costumes e da morfoloxía de Galicia. O espectáculo será o venres, 25 de setembro ás 21.00 horas.
As persoas interesadas en asistir a algún dos monólogos deberán reservar o seu convite antes das 12.00 horas do propio día de cada monólogo. Para facelo deberán chamar á Casa da Cultura no teléfono 981 67 25 80.
Este ciclo conta coa colaboración da Rede Cultural da Deputación da Coruña.
Tal e como se anunciou no confinamento, o Concello de Carral continúa apostando por ofrecer actividades culturais a veciños e veciñas de todas as idades. Proba deste compromiso é o regreso do programa Papeques, que ofrecerá un total de oito actividades dirixidas aos nenos e nenas do municipio. Esta 3ª edición, que arrincará esta semana, comprenderá espectáculos e cine para público infantil e familiar.
O calendario de propostas comezará o xoves, 10 de setembro ás 18.00 horas, coa proxección da película Cavernícola na Casa da Cultura. O filme narra a historia de Dug quen, xunto co seu amigo Cerdog, unen á súa tribu en contra do arquienemigo Lord Nooth para salvar o seu fogar.
Papeques continuará o sábado, 12 de setembro ás 12.00 horas, no local Xente Nova de Tabeaio. Ese día terá lugar Ris Ras de Baobab Teatro, un espectáculo que fará viaxar aos cativos e cativas a través de música, xogos, enredos e historias tradicionais.
O programa seguirá o 17 de setembro ás 18.00 horas coa proxección da película Los pitufos: la aldea perdida. Na película, Pitufina e os seus irmáns practican sendeirismo polo descoñecido Bosque Encantado tratando de atopar un lendario pobo para os Pitufos.
Papeques ofrecerá, así mesmo, funcións musicais para os nenos e nenas. Dentro desta liña, a primeira acción chegará o sábado, 19 de setembro ás 19.00 horas, co concerto Uxía Lambona e a súa banda molona, da compañía de animación Troula. O espectáculo nace como un proxecto lúdico, musical e educativo que busca achegar aos máis pequenos e pequenas os temas tradicionais galegos dunha forma nova e atractiva. Para conseguilo, empregan novos estilos musicais como o ska, o rock e o hip-hop.
Ademais de música e cine, Papeques ofrecerá varios contacontos. O primeiro aterrará na Casa da Cultura o 22 de setembro ás 18.00 horas. María Canosa chegará a Carral coa historia Versos para perder medos, para nenos de 5 a 7 anos. Ao día seguinte, o 23 de setembro ás 18.00 horas, a Casa da Cultura volverá acoller un novo contacontos sensorial dirixido a bebés.
O xoves, 24 de setembro ás 18.00 horas, será a quenda de Trinketrinke, que traerá o seu contacontos O coelliño branco, que narra a historia de como Lili Gruyére atopou un coelliño branco e o levou para Lonxetodo. Falando con el, deuse conta de que o animal era o protagonista dun conto e que traballara moitos anos como axudante dun mago.
Animais de compañía, de Teatro do Noroeste, será a última proposta de Papeques. Será o sábado, 26 de agosto ás 19.00 horas, no local Xente Nova de Tabeaio. Trátase dunha fábula moderna sobre as relacións humanas e o respecto ás diferenzas.
O acceso aos espectáculos é de balde, pero as prazas son limitadas, polo que será precisa a inscrición ou a retirada previa de convites.
Papeques conta coa colaboración da Deputación Provincial da Coruña, a través da súa Rede Cultural, e da Xunta de Galicia por medio de Ler conta moito e Camiños de Cultura.
Ao redor de 130 nenos e nenas participaron nos campamentos de verán programados polo Concello de Carral, que contaron cun protocolo para evitar posibles contaxios por COVID-19.
Hoxe tivo lugar a xornada de clausura da terceira e última quenda duns campamentos que comezaron o 1 de xullo e que contaron con diferentes temáticas. Nesta ocasión, a última proposta buscaba concienciar aos pequenos e pequenas sobre o coidado do medio ambiente, a ecoloxía e a reciclaxe.
Ao longo desta quenda, os nenos e nenas -de entre 3 e 15 anos- participaron en actividades multideporte, socioculturais, de concienciación ambiental, reciclaxe e en excursións.
Protocolo de seguridade
O Concello reforzou, este verán, a súa aposta polas actividades e medidas de conciliación. Como explican desde o goberno local, “considerabamos necesario reforzar as actividades de conciliación pero na situación actual, a seguridade é, máis que nunca, a máxima prioridade. Por iso, reaxustouse a organización dos campamentos aplicando un completo protocolo”.
Estas actividades leváronse a cabo no CEIP Vicente Otero Valcárcel e no local interxeracional co fin de cumprir coas distancias de seguridade. Para acceder a estes recintos, os participantes tiñan que desinfectar calzado e mans e someterse, así mesmo, á medición da temperatura.
Os cativos e cativas maiores de 6 anos debían empregar a máscara de xeito obrigatorio, agás naqueles casos nos que os presenten algunha patoloxía que impedise este uso. No caso das excursións, todos os nenos e nenas, con independencia da súa idade, debían levar a máscara de protección no autobús, tal e como indica a normativa. Unha vez dentro do recinto dos campamentos, os rapaces e rapazas estaban separados en grupos formados por un máximo de 10 participantes.
O Concello de Carral remitiu un escrito á Xefatura Territorial de Mobilidade da Xunta de Galicia solicitándolle que manteña a liña de autobús que vai de Vila de Cruces a A Coruña e que, a pesar de presentar o goberno local alegacións contra a súa supresión, finalmente non se incluíu no Plan de Mobilidade.
Este itinerario, que vai de Vila de Cruces a A Coruña e pasa por Mesía, As Travesas, Montouto, Figueroa, Sarandóns, Carral e Tabeaio é de vital importancia xa que por unha banda é o único que une As Travesas con Carral e tamén é o que permite aos peregrinos do Camiño Inglés visitar A Coruña, un servizo moi demandado.
A supresión desta liña significará illar aos veciños e veciñas destes núcleos anteriormente citados dos centros de poboación máis importantes da zona como é Carral, lugar ao que por proximidade acoden moitos residentes de Figueroa e Sarandóns (Abegondo) para ir ao médico, ao colexio ou mesmo a facer as súas compras.
Desde o goberno local inciden en que “no seu momento xa manifestamos a nosa oposición total á supresión desta liña, que cremos que é imprescindible. O rural precisa servizos e o único que se consigue con estas decisións é afastar á xente das zonas rurais”
O ciclo anual Noites de película que organiza a Concellería de Cultura do Concello de Carral, coa colaboración da Rede Cultural da Deputación da Coruña, volve esta semana con dúas películas de gran éxito.
Bohemian Rhapsody, o biopic sobre Freddie Mercury e o seu grupo Queen é a película que se ofrecerá o martes 1 de setembro, mentres que o thriller Quien a hierro mata presentarase o mércores 2 de setembro.
Ámbalas proxeccións comezarán ás 22:00 h.
Durante as películas é obrigatorio o uso da máscara e manter a distancia de seguridade.
O Concello de Carral quere que a veciñanza do municipio se involucre no devir deste e por iso creou ‘Cuida Carral’, unha aplicación para dispositivos móbiles que permite ao cidadán estar ao tanto da actualidade municipal e comunicar incidencias ou achegas.
A aplicación, que está dispoñible para descargar en dispositivos Android e IOS, conta cun apartado de incidencias para que os cidadáns comuniquen ao goberno local posibles situacións a mellorar e poder arranxalos así o antes posible. A ferramenta permite engadir a xeolocalización da incidencia, unha fotografía e un pequeno texto describíndoa. Ademais, poderá estar ao tanto da evolución do seu aporte, tendo constancia de que se está tramitando e de cando se resolva.
Por outra banda, o usuario ou usuaria tamén recibirá no seu dispositivo as últimas novas municipais, estando así informando ao instante de todo o que sucede no municipio.
A app pode descargarse tanto na Play Store nos dispositivos Android como na App Store para IOS.
Concello: 981670002
Policía local: 689544311 / 981670002
Protección civil: 112
Casa da cultura/bibliotecas: 981672580
Edif. Social Toñito Espiñeira: 981613520
Centro de saúde:981672186
