A OFERTA DE ACTIVIDADES DO COMPLEXO DEPORTIVO ADÁPTASE ÁS NOVAS MEDIDAS PARA EVITAR CONTAXIOS POLA COVID-19

Co fin de adaptar o día a día no Complexo Deportivo Municipal á nova normalidade, o Concello de Carral elaborou un estrito protocolo para garantir a seguridade dos usuarios e usuarias. Este documento inclúe medidas que afectan, non só no emprego do ximnasio, senón tamén no desenvolvemento das actividades gratuítas dirixidas para socios e socias. A oferta inclúe zumba, abdominais, pilates, global training, circuit training, core, gap, step tonic e body tonic. Así mesmo, organízanse tamén clases de pilates –de pago- que responden ao mesmo protocolo.

Como parte do mesmo, establécese un número máximo de 5 alumnos/alumnas máis o monitor/a por grupo. Isto é, a aula conta con 17 m2 por persoa. Para participar, os socios e socias deben facer previamente a súa reserva na recepción da dependencia. A desinfección de mans e o emprego da máscara é obrigatorio ao longo de toda a actividade –procurando, ademais, ventilar o espazo-. Antes e despois de cada sesión, lévase a cabo a ventilación, a limpeza e desinfección do material empregado e frégase o chan.

En total, unhas 30-40 persoas fan uso do ximnasio do Complexo Deportivo ao longo do día. Pola outra banda, as actividades dirixidas reciben, de media, a unhas 60 persoas á semana. 

FOTO CARRAL- Actividades dirixidas complexo deportivo 2

/by

INMINENTE SELECCIÓN PARA OS OBRADOIROS DUAIS DE EMPREGO PARA DESEMPREGAD@S

 

👉👉Dende a Consellería de Economía, Emprego e Industria concederon aos dous promotores (Abegondo e Betanzos) cos que Carral ten convenio para levar a cabo os Obradoiros de emprego dende o 15/12/2020 ata o 14/09/2021. Serán 9 meses de formación e aprendizaxe para empadroados que estean apuntados nas oficinas de emprego dos concellos que estamos en convenio para realizar estes programas.

👉👉Promotor Abegondo. Obradoiro REserva da biosfera : Emprego forestal
Formación:
📒📗📕Para acceso ter a ESO ou competencias clave nivel 2: Repoboacións forestais e tratamentos silvícolas
📕📗📒Para acceso sen estudos: Actividades auxiliares en conservación e mellora de montes
👉👉Promotor Betanzos: Obradoiro Formación para a empregabilidade
Formación para acceso ter ESO ou competencias clave nivel 2:
📒📗📕Atención sociosanitaria a persoas no domicilio
📕📗📒Atención sociosanitaria para persoas dependentes en institucións sociais
A selección de candidat@s será inmediata debido ao comezo próximo que marca a Xunta.
Interesad@s. Requisito imprescindible estar apuntados nas oficinas de emprego como desempregados e solicitar apuntarse aos obradoiros duais de emprego da formación mencionada. Pódense solicitar pedindo cita na oficina de emprego ou a través da aula virtual como desempregado.
Para máis información podedes chamar ao concello ao ☎️678338872
/by

CARRAL LEVARÁ A PLENO A CREACIÓN DUN SERVIZO DE TESOURERÍA CONXUNTO CON ABEGONDO E BERGONDO

O Concello celebrará, esta semana, un pleno extraordinario para elevar a proposta de creación dun servizo de tesourería conxunto cos Concellos de Abegondo e Bergondo. Inicialmente, esta agrupación estaría constituída tamén por Miño. Con todo, este último Concello ocupou xa a vacante, polo que o resto de Concellos teñen que volver aprobar esta proposta en pleno.

Actualmente, os Concellos contan con habilitados nacionais en Secretaría e Intervención, pero non en Tesourería, dada a dificultade que supoñería para cada un de forma individual tendo en conta a carga de traballo existente -sobre todo, tendo en conta que, tanto Carral como Abegondo e Bergondo teñen boa parte da recadación delegada na Deputación Provincial da Coruña-. Por esa razón, os tres concellos apostan por compartir o servizo cun mesmo habilitado.

O pleno servirá, así mesmo, para aprobar o convenio de colaboración para o desenvolvemento conxunto do transporte metropolitano de Galicia na área de Transporte Metropolitano da Coruña. A contía que o Concello consignará, anualmente, entre o 2021 e o 2024 para o desenvolvemento conxunto deste servizo será de 11.021,14 euros, aproximadamente. Desde o goberno local lembran as melloras implementadas no servizo de transporte grazas ás alegacións presentadas polo Concello no seu momento. Entre elas, destaca a incorporación da conexión cara a Os Campóns (Cambre) e o aumento de frecuencias na liña que conecta con Betanzos. Así mesmo, outra das novidades máis importantes será para os veciños e veciñas de Cabrois, que dispoñerán dunha parada nas liñas que conectan Entrexardíns e a Urbanización Monte Xalo.

Implantación dun sistema de xestión documental

Outro dos asuntos que se elevarán ao pleno extraordinario será a adhesión do Concello ao convenio subscrito entre a Xunta de Galicia e a FEGAMP para a implantación do sistema de xestión documental ARQA nos arquivos públicos municipais. Por medio deste convenio, o Concello comprométese, entre outras cuestións, ás seguintes:

  • Colaborar no proceso de migración de datos dos arquivos ao novo programa de xestión documental.
  • Asumir sobre o control de aplicación, así como das altas e baixas dos usuarios e usuarias.
  • Colaborar coa Xunta na formación e mellora dos encargados dos servizos de xestión documental.
  • Cooperar na actualización dos datos do Censo de Arquivos de Galicia e na elaboración de estatísticas.
  • Cooperar na difusión dos fondos documentais custodiados nos arquivos municipais.
/by

O CONCELLO ABRE O PRAZO DE SOLICITUDE DO PEL-REACTIVA, QUE CONTA CON 112.962 EUROS PARA AXUDAR A MICROEMPRESAS E AUTÓNOMOS

O Concello de Carral abrirá mañá, venres 6 de novembro, o prazo para solicitar as axudas do PEL-Reactiva da Deputación Provincial da Coruña. A contía do programa, de 112.962 euros, servirá para axudar ás microempresas e autónomos con domicilio fiscal en Carral. Do total, o 80% das axudas serán achegados polo ente provincial e o 20% polo Concello. Como explican desde o goberno local, “estas axudas son fundamentais para apoiar a uns dous sectores máis afectados pola crise dá COVID-19”.

Esta prestación está dirixida a persoas traballadoras autónomas –con ou sen empregados ao seu cargo- e a microempresas que se atopen nalgún dos seguintes supostos:

  • Que se visen afectados polo peche do seu negocio debido ao decreto do estado de alarma do pasado 14 de marzo.
  • Que percibisen un descenso na súa facturación no 2º trimestre fiscal de 2020 de, polo menos, un 75% en comparación coa media efectuada no semestre natural anterior á declaración do estado de alarma.
  • Que se visen na obrigación de acollerse a un Expediente de Regulación Temporal de Emprego – ERTE-.

As contías oscilan entre os 1.500 e os 3.000 euros segundo os requisitos que cumpra a persoa traballadora autónoma ou microempresa. Como parte dos gastos subvencionables, atópanse os seguintes: compra de material –material antiséptico ou desinfectante, produtos hixiénicos e de limpeza-, alugueres, renting e canons –maquinaria, vehículos, locais, instalacións, reparación e conservación –adaptación de locais ás medidas de protección fronte á COVID-19-, primas seguros, subministracións –auga, gas, combustibles e electricidade-.

O prazo de solicitude estará abierto desde mañá ata o 25 de novembro. As demandas derán realizarse a través da sede electrónica del Concello de Carral.

/by

ABRE O PRAZO PARA SOLICITAR AXUDAS A PERSOAS TRABALLADORAS AUTÓNOMAS E MICROEMPRESAS  NO CONCELLO DE CARRAL “PEL REACTIVA”

Coa achega da Deputación da Coruña a través do PEL REACTIVA do 80% e do Concello de Carral do 20% existe un fondo de financiamento de 112.962,78€ para poder levar a cabo esta liña de axudas. O procedemento de concesión de axudas reguladas é o de concorrencia competitiva de acordo co establecido no artigo 22.1 da Lei 38/2003, do 17 de novembro, xeral de subvencións.

O PRAZO é dende o 6 ata o dia 25 de novembro de 2020 ás 14.00 horas.

A SOLICITUDE realízase únicamente por via electrónica a través da sede electrónica do Concello de Carral. O enlace é o seguinte “Solicitude de axudas PEL REACTIVA”:

https://sede.carral.es/opencms/gl/procedimientosytramites/tramites/SolicitudAyudasPelReactiva

BENEFICIARIOS

Estas axudas van dirixidas a persoas traballadoras autónomas con ou sen traballadores/as ao seu cargo e microempresas, calquera que sexa a súa forma xurídica, que se atopen nalgún dos supostos indicados a continuación:

Grupo I: Que se visen afectados polo peche en virtude do disposto no RD 463/2020, do 14 de marzo, polo que se declara o estado de alarma para a xestión da situación de crise sanitaria ocasionada pola COVID-19, e a súa modificación aprobada no RD 465/2020, do 17 de marzo.

Grupo II: Que non se visen afectados polo peche, pero cuxa facturación no segundo trimestre fiscal de 2020 se vira reducida, polo menos, nun 75% en relación coa media efectuada no semestre natural anterior á declaración do estado de alarma. Cando a persoa física ou xurídica non leve de alta os seis meses naturais esixido para acreditar a redución os ingresos, a valoración levarase a cabo tendo en conta o período de actividade.

Grupo III: Que se viran na obriga de acollerse a un ERTE (Expediente de Regulación Temporal de Emprego), nos termos establecidos no RD 465/2020, de 17 de marzo.

 

Con carácter xeral, os beneficiarios/as das axudas, deberán cumprir cos seguintes REQUISITOS:

Ter o seu domicilio fiscal no municipio adherido a PEL-REACTIVA ao que presenta a solicitude.

Non atoparse incursas en ningunha das circunstancias recollidas no artigo 13.2 e 13.3 da Lei 38/2003, de 17 de novembro, Xeral de Subvencións.

Estar ao corrente no cumprimento das súas obrigas tributarias coa AEAT e coa TXSS.

Non ter débeda algunha co concello.

Estar ao dia no cumprimento das obrigas tributarias coa CC.AA. de Galicia e coa Deputación da Coruña.

Cumprir coas obrigas previstas na Base 14.

Requisitos específicos das persoas físicas

Estar dado de alta no Réxime Especial de Traballadores Autónomos (RETA) ou en calquera outro por conta propia da Seguridade Social, ou como mutualista de colexio profesional, con anterioridade á entrada en vigor do Real Decreto 463/2020, de 14 de marzo.

Requisitos específicos das persoas xurídicas

A data de constitución da empresa, atendendo á data de primeira inscrición, no rexistro público correspondente, debe ser anterior á entrada en vigor do Real Decreto 463/2020, de 14 de marzo.

Exclusións
Quedan expresamente excluídas destas axudas as asociacións, as comunidades de propietarios en réxime de propiedade horizontal, as administracións públicas, organismos públicos, entes dependentes, as congregacións e institución relixiosas, as Unións Temporais de Empresas, as comunidades de bens, as herdanzas xacentes así como as sociedades civís sen personalidade xurídica propia e demais entidades carentes da mesma.

DOCUMENTACIÓN

Solicitude de axudas PEL-REACTIVA. Anexos da sede electrónica

NIF/NIE ou CIF segundo corresponda (só se o presentador defire do interesado).

Declaración responsable do cumprimento de requisitos e obrigas.

Certificado actualizado de Situación Censal da Axencia Estatal Tributaria.

Informe actualizado de Vida Laboral da Empresa, expedido pola Tesourería xeral da Seguridade Social no que se inclúa o número de traballadores/as.

Beneficiarios do Grupo II: Acreditación da redución de ingresos no segundo trimestre fiscal de 2020, polo menos, nun 75% en relación coa media efectuada no semestre natural anterior á declaración do estado de alarma, mediante a presentación dalgún dos seguintes documentos: copia do libro de rexistro de facturas, libro diario de gastos, libro de rexistro de vendas e ingresos e libro de compras e gastos, ou declaración de IVE, IRPF.

Beneficiarios do Grupo III: Documento acreditativo da situación de ERTE

 

PERÍODO SUBVENCIONABLE: 1 de marzo ata o 31 de decembro de 2020

CONTÍA: Poden ser de 1500€ , 2000€, 2500€ ou 3000€ según os requisitos que cumpra a persoa traballadora autónoma ou microempresa.

CONCEPTOS SUBVENCIONABLES: compra de material (material antiséptico o desinfectante, produtos hixiénicos e de limpeza) arrendamentos, renting e cánones (maquinaria, vehículos, locais, instalacións), reparación e conservación (adaptación de locais ás medias de protección frente ao COVID 19), primas seguros (seguros responsabilidade civil, de accidentes), suministros (auga, gas, combustibles, electricidade). O IVA non se considera subvencionable.

Enlace á convocatoria completa

NORMA 18 BASES ESPECIFICAS PEL REACTIVA 

/by

O CONCELLO PREVÉ UN AFORRO DE 3.000 EUROS AO ANO COA NOVA ILUMINACIÓN DO CAMPO DE FÚTBOL BORJA RODRÍGUEZ ANS

O campo de fútbol Borja Rodríguez Ans loce, desde o pasado venres, un novo sistema de iluminación. O Concello de Carral acaba de concluír as obras para instalar o alumeado, tanto no terreo de xogo como nos vestiarios da instalación deportiva. Con estas intervencións, o goberno local aposta, unha vez máis, pola eficiencia enerxética. Tanto é así, que segundo as previsións do equipo de goberno, este investimento suporá un aforro de 3.000 euros ao ano.

O proxecto, que contou cun investimento de 14.682,56 euros máis IVE, consistiu na substitución das oito luminarias halóxenas existentes por 16 unidades LED (catro por torre). Esta tecnoloxía traerá consigo unha importante redución no consumo enerxético, que pasará dos 16 aos 8 kW/h, co seu correspondente aforro económico.

A maiores, a incorporación deste sistema suporá tamén unha mellora dos niveis luminosos para a práctica deportiva, corrixindo os déficits que esta dependencia presentaba en canto a alumeado.

O Concello renovou tamén as luces nos vestiarios e duchas, cambiándoas por outras de tipo LED, que mellorarán as condicións lumínicas e ofrecerán unha maior durabilidade.

FOTO CARRAL- Campo de fútbol Carral 2

/by

CARRAL CONMEMORARÁ A VIDA E OBRA DE RICARDO CARVALHO CALERO, O AUTOR HOMENAXEADO NAS LETRAS GALEGAS

A Casa da Cultura de Carral acollerá este mércores, 4 de novembro ás 20.00 horas, unha homenaxe á vida e obra de Ricardo Carvalho Calero, o autor laureado nas Letras Galegas de 2020. Trátase dun recital poético e musical no que o público asistente vivirá unha auténtica viaxe sonora e audiovisual sobre a traxectoria do escritor.

Durante o acto, os poemas de Carvalho Calero converteranse en música grazas á guitarra de Moisés Quintas Suárez e á voz de Aser Álvarez. O espectáculo inclúe a proxección do documental ‘Carvalho Calero sem fronteiras’, dirixido por Aser Álvarez.

Atendendo á situación sanitaria da COVID-19, a función contará con aforo limitado. As persoas interesadas en acudir deberán anotarse previamente chamando ao teléfono 981 67 25 80.

Cartel Letras Galegas en Carral - Carvalho Calero

/by

ESTA SEMANA O CONCELLO OFRECE UNHA AMPLA OFERTA CULTURAL

INSTALau-01A concellería de Cultura do Concello de Carral ofrece diversas propostas culturais desde o mércores ata o domingo desta semana.

A escritora Emma Pedreira visitará este mércores o Club de Lectura da Biblioteca municipal para comentar coas súas participantes sobre o proceso creativo na escrita de poesía, centrando a atención na súa obra Libro das mentiras co que gañou o premio Concello de Carral no ano 2011.

Os ratos da biblioteca de Trinketrinke volven este xoves para ofrecer a nenas e nenos de 5 a  8 anos de idade o seu contacontos teatral Aprendendo a querer, que aborda o tema da saúde afectiva. A sesión terá lugar na Casa da Cultura ás 18:00 h.

O programa Cine na Casa da Cultura presenta o venres, ás 20:30 h. o filme galego Eroski Paraíso, producida a partir da exitosa obra teatral homónima da compañía Chévere e protagonizada por Miguel de Lira e Patricia de Lorenzo. Conta distintas historias reais ocorridas na sala de festas “Paraíso”, que funcionou en Muros ata o ano 1990 e que logo foi convertida nun supermercado.

Teatro da Ramboia trae o sábado a Tabeaio O meu mundo non é deste reino, unha obra teatral baseada no texto de Manuel María e que se presenta en Carral grazas ao convenio que o Concello ten coa fundación do autor chairego. O espectáculo comezará ás 20:30 h.

Durante a fin de semana a Casa da Cultura e o pavillón do Espiño acollerán o ciclo Elas son artistas que se ven desenvolvendo na Coruña e nos concellos da súa área metropolitana. En Carral a actividade consistirá por unha banda na realización dun mural a cargo dun grupo de mozas e nun concerto de Lau, unha xove cantautora de Cambre que está a sorprender pola súa calidade artística en todos os concertos que leva feito. A súa actuación terá lugar no pavillón municipal ás 18:00 h. do domingo, mentres as participantes no obradoiro de pintura rematan o mural ao seu carón.Eroski_Para_so-342605765-large

Para todas as actividades é necesario inscribirse no teléfono da Casa da Cultura 981 672 580, dadas as limitacións de aforos e para garantir as medidas sanitarias que axuden a evitar os contaxios do coronavirus. Todas as sesións rematarán coa antelación suficiente para poder respectar as limitacións de movilidade fixadas polo estado de alarma.

 

 

/by

O CONCELLO POSPÓN O INICIO DAS ESCOLAS MUNICIPAIS ATENDENDO ÁS RESTRICIÓNS ANUNCIADAS POLA XUNTA

O Concello de Carral acaba de pospor o inicio das Escolas Municipais atendendo á evolución epidemiolóxica da COVID-19 en Galicia. A Xunta de Galicia decretou novas restricións para toda a comunidade que entraron en vigor hoxe, xoves 22 de outubro. Entre elas, o organismo autonómico limita a realización de actividades en instalacións deportivas cubertas a grupos de 5 persoas como máximo –sen contar ao monitor-, sexan ou non conviventes.

O goberno local incide en que “nesta situación, a saúde e o benestar dos veciños e veciñas é a máxima prioridade, polo que adiaremos o inicio destas actividades ata que mellore a situación sanitaria”.

As actividades dirixidas que se levan a cabo no Complexo Deportivo, ao longo de todo o ano, manteranse. Iso si, o desenvolvemento destas adaptaranse á última resolución anunciada pola Xunta de Galicia. Isto é, os grupos estarán compostos por un total de 5 persoas.

Co fin de reanudar o programa tan pronto como a situación sanitaria o permita, o Concello manterá aberto o prazo de inscrición. Así, as persoas interesadas poderán presentar a súa solicitude cuberta e asinada, preferiblemente, de xeito telemático a través do correo casadacultura@carral.es ou da sede electrónica carral.es. Así mesmo, poderán presentala de xeito presencial na Casa da Cultura ou no Complexo Deportivo.

Boletín informativo Escolas Municipais Concello de Carral

/by

CARRAL ABRE O PRAZO DE INSCRICIÓN PARA AS ESCOLAS MUNICIPAIS, QUE NESTA EDICIÓN CONTARÁN CON 17 ACTIVIDADES

O Concello abrirá mañá, martes 20 de outubro, o prazo de inscrición para as súas Escolas Municipais. Co fin de reducir o risco de contaxio pola COVID-19, as 17 propostas que conforman a oferta desta edición levaranse a cabo atendendo a un estrito protocolo de seguridade. Así, o desenvolvemento das actividades estará limitado a grupos de 10 persoas (nove participantes máis o monitor/a), a máscara será obrigatoria e procurarase manter, en todo momento, a distancia interpersoal de seguridade.

O protocolo elaborado pola Concellería de Deportes indica o seguinte: as instalacións ventilaranse tanto durante o desenvolvemento da actividade como despois da participación de cada grupo –os labores de ventilación complementaranse coa desinfección da estancia-. A maiores, non poderá acceder ao recinto ningunha persoa agás o propio alumno/a, queda prohibida a utilización dos vestiarios e os baños só poderán empregarse en caso de urxencia.

Na convocatoria actual, o Concello ofrecerá as seguintes actividades:

  • Atletismo escolar (a partir de 5 anos)
  • Ximnasia rítmica escolar (nados no 2017 e anteriores)
  • Patinaxe escolar (a partir de 4 anos)
  • Tiro con arco (a partir de 6 anos máis persoas adultas)
  • Baloncesto (a partir de 6 anos)
  • Pádel (a partir de 6 anos máis persoas adultas)
  • Equitación (a partir de 7 anos máis persoas adultas)
  • Tiro olímpico (a partir de 8 anos máis persoas adultas)
  • Zumba (a partir de 14 anos)
  • Tai Chi (a partir de 14 anos)
  • Ioga (a partir de 14 anos)
  • Jumping fitness (a partir de 14 anos)
  • Pilates (a partir de 14 anos)

Os socios do Complexo Deportivo poderán acceder, ademais, á seguinte oferta deportiva gratuíta: Zumba, G. Training, Abdominais, Circuit T., CORE y GAP.

O Concello contará tamén cos programas Aprender a aprender e Debuxo e pintura como parte da oferta de educación. Ademais, o executivo ofrece o servizo Madrugadores e o Venres Ventevindo.

As persoas interesadas deberán presentar a solicitude cuberta e asinada, preferiblemente, de xeito telemático a través do correo casadacultura@carral.es ou da sede electrónica carral.es. Así mesmo, poderanse presentar de xeito presencial na Casa da Cultura ou no Complexo Deportivo. O prazo de solicitude estará aberto desde mañá, 20 de outubro ás 9.00 horas, ata o día 28.

Boletín informativo Escolas Municipais Concello de Carral

/by