O inicio das obras na praza da Capela suporá un cambio temporal na localización da parada de taxis. Estes situaranse na Costa do Pincho, do número 47 ao 55.
Mentres se executen estes traballos, a zona azul localizada entre os números 28 e 34 da Costa do Pincho quedará anulada sendo, de xeito temporal e ata novo aviso, zona de aparcadoiro sen limitación.
Carral iniciou onte a nova tempada de verán coa apertura das piscinas municipais. O Concello abre estas instalacións estivais despois substituír a soleira de plaqueta existente por un chan de céspede artificial. Ao mesmo tempo levouse a cabo a poda das árbores para garantir unha maior claridade, o encintado do vaso da piscina, limpeza da beirarrúa perimetral, etc. Ademais o Concello está a preparar un espazo aledaño ás piscinas de herba natural, con arbores e mesas no que os visitantes da piscina poderán xantar/merendar e descansar nas horas de máis calor este verán. Está previsto que esta zona poida ser inaugurada a principios do mes de xullo. A piscina funcionará ata o 8 de setembro de 12.00 a 21.00 horas.
Como todos os anos, o Concello ofrecerá diferentes modalidades de abono para os empadroados na localidade. Ademais da entrada individual diaria –que contará con bonificacións para a 3ª idade e para as persoas menores de 18-, haberá abonos familiares. Os menores de 3 anos poderán acceder de xeito gratuíto.
Nas piscinas, que contarán con varios socorristas para a súa vixilancia, os bañistas deberán usar roupa de baño e chanclas, sendo recomendable o uso de gorro. Ademais, deberanse cumprir todas as normas relativas ás piscinas de uso público.
Cursos de natación
Pola outra banda, un ano máis, o concello de Carral convoca os cursos de natación para os meses de xullo e agosto para nenos e nenas de entre 3 e 15 anos. As datas previstas para estes cursos serán desde o 1 ao 31 de xullo e do 1 ao 30 de agosto.
Os alumnos distribuiranse en grupos segundo as idades, e dentro de cada grupo estableceranse os niveis de iniciación e de perfeccionamento. Impartiranse en horario de mañá, entre as 12.00 e as 14.00 h segundo os grupos, gardando sempre a premisa de que os maiores acudirán nas primeiras horas da mañá e os máis pequenos en horario máis próximo ao medio día. As clases serán impartidas por monitores especialistas, e terán unha duración de 45 minutos por sesión de luns a venres, sempre coa presenza dun socorrista. O prezo do curso será de 28 €/alumno cada mes.
O prazo de inscrición para os cursos de xullo irá dende o 17 ao 24 de xuño, mentres que a inscrición para os cursos de agosto irá desde o 15 ao 22 de xullo. A inscrición poderase tramitar a través dun formulario web habilitado para elo ou presencialmente no Complexo Deportivo de Carral.
Para todos aqueles interesados poderán informarse ou inscribirse no Centro Deportivo de Carral, (tlfo. 678 338 847), ou en complexo.deportivo@carral.es.
O Concello de Carral publica toda a información relativa á realización de cacharelas, sardiñadas e churrascadas durante a noite do 23 ao 24 de xuño, coincidindo co San Xoán.
Para a realización de cacharelas e/ou sardiñadas e churrascadas en espazos públicos deberase solicitar a oportuna autorización municipal. A autorización deberá incluír o DNI da persoa responsable, que terá que ser maior de idade, así como o lugar do emprazamento (Anexo I).
En caso de que se realice en espazos privados, a persoa responsable deberá presentar comunicación previa (Anexo II).
As persoas interesadas poderán realizar a súa solicitude no rexistro xeral ou na sede electrónica municipal antes das 13.00 horas do 20 de xuño.
A Consellería de Medio Rural restrinxe as queimas de restos agrícolas e forestais a partir de mañá, xoves 30 de maio, e ata novo aviso.
Isto supón que non se darán máis permisos e que os xa concedidos quedarán en suspenso desde ese mesmo día.
Podedes consultar toda a información na páxina web da Consellería de Medio Rural ou na ligazón.
O Concello de Carral publica un decreto de Alcaldía de ampliación de horario de peche dos establecementos nas festas e verbenas populares das distintas parroquias, así como na ponte da Constitución, no Nadal, Entroido e Semana Santa durante o ano 2024.
Carral celebrará, esta fin de semana, un dos seus eventos estrela. Un ano máis, o Concello e a Asociación de Panadeiros axuntarán esforzos para celebrar a Festa do Pan, unha cita que chega, neste 2024, á súa vinte edición. Para celebrar este fito histórico ao grande, o Concello e os panadeiros propuxéronse un obxectivo nesta vixésima edición: manter e mesmo superar as cifras de participación da edición de 2023. Ese ano, tomaron parte nos clásicos obradoiros infantís de elaboración de bolos máis de 2.000 pequenos e pequenas e, a maiores, contáronse por miles os bocadillos cardiosaudables despachados ao longo da fin de semana.
O Concello acolleu, esta mañá, a presentación oficial do evento, que correu a cargo do alcalde, Javier Gestal, dos concelleiros e concelleiras do goberno local, de varios representantes da Asociación de Panadeiros e dos nenos e nenas de 2º de Primaria do CEIP Plurilingüe Vicente Otero Valcárcel que elaboraron o cartel da vinte edición.
Durante a presentación, o rexedor enxalzou o labor do colectivo de panadeiros, sen “cuxo esforzo e dedicación non se tería chegado ao vinte aniversario da cita gastronómica”.
Programa do sábado
O sábado, 11 de maio, o evento comezará ás 12.00 horas coa clásica exposición, venda de pan e, por suposto, do xa clásico bocadillo cardiosaudable. A base desta delicia é, por suposto, o pan de Carral pero, a maiores, leva aceite, tomate e xamón. A esa mesma hora está previsto o inicio da feira medieval e dos talleres de elaboración de pan, unha das principais atraccións da Festa. Con todo, a música tamén acompañará ao longo da xornada inaugural. Así, o sábado, ás 12.30 horas está prevista a actuación do grupo musical Gaeloc Medieval (que realizará outro pase ás 13.30 horas). Esta agrupación dará paso, ás 14.00 horas, á sesión vermú a cargo do grupo Zona Zero.
Xa pola tarde, a partir das 16.30 horas, o alumnado do IES de Carral representará a obra Amar o mar na sala multiusos do edificio social Toñito Espiñeira (os mozos realizarán un segundo pase ás 18.30 horas). Tamén pola tarde darán comezo os talleres de olaría e haberá, ademais, un expositor Pan en 3D. Non faltarán tampouco os espectáculos de zancos e malabaristas (ás 18.30 horas) e a sesión musical de noite (desde as 21.00 horas) cos grupos Zona Cero e América S.L.
Programa do domingo
O domingo, 12 de maio, a Festa do Pan arrincará ás 11.00 horas. Xa desde o inicio comezarán a exposición e venda de pan, os talleres e a feira medieval. Ás 12.30 horas haberá unha misa e procesión en honra a San Honorato, patrón dos panadeiros, que contará coa música do Grupo de Música Tradicional Arnela. A música continuará ás 13.30 horas coa actuación de Gaeloc Medieval e seguirá ás 14.00 horas co concerto de Lume.
Louband porá o toque musical pola tarde (ás 16.30 horas). Ás 17.30 horas levarase a cabo unha exhibición de cetrería. Gaeloc Medieval (18.00 horas), Louband (18.30 horas) e Lume (20.00 horas) encargaranse de amenizar o final da vinte edición da Festa do Pan.
Durante toda a fin de semana, o Campo da Feira contará cun expositor dos centros de ensinanza de Carral e, ademais, con outro en colaboración coa Asociación Española Contra o Cancro.
“A forza da voz poética manifesta a súa furia a través do ritmo e da limpeza das imaxes”. Esta foi unha das razóns polas que a viguesa Silvia Penas Estévez (Vigo, 1980) se fixo co 27º Premio de Poesía do Concello de Carral. Coa súa obra A pel do exilio, a autora conquistou ao xurado de xeito unánime.
O poemario de Penas Estévez foi escollido entre un total de 94 obras presentadas, o cal supón un novo récord para este certame, que medra ano tras ano en cifras de participación. De entre todos os traballos, o xurado elixiu o da viguesa salientando o seu ritmo e a súa “vocación de mediar co mundo, traspasando o texto na procura da reflexión metapoética e identitaria”.
O xurado estivo composto polo presidente; o alcalde Javier Gestal Pose, por Inma Otero, Tamara Andrés, Ciro Briones, e actuando como secretario, con voz e sen voto, o técnico de Cultura, Carlos Lorenzo.
O premio, que conta coa colaboración anual da Xunta de Galicia, está dotado con 3.500 euros e a publicación da obra na colección de poesía de Edicións Espiral Maior.
A entrega do premio Concello de Carral está prevista para o venres, 31 de maio, na Casa da Cultura e servirá, así mesmo, para presentar o libro Oídos de espeleóloga, co que Ciro Briones gañou a 26ª edición do certame. O certame carralés lévase a cabo en colaboración coa Xunta de Galicia.
Biografía da gañadora
Silvia Penas Estévez comezou a súa andadura poética no colectivo Redes Escartala. A autora colleitou varios premios e accésits ao longo da súa traxectoria profesional e, no 2010, publicou o seu primeiro poemario Biografía da multitude (en coautoría con Elvira Riveiro). Penas Estévez escribiu tamén de As uñas crecen, co que conquistou o certame Manuel Lueiro Rey de Poesía. A este séguenlle Diario de ladras, bailarinas, asasinas e flores (Premio de Poesía Avelina Valladares) e Fronteira Paraíso.
Os veciños e veciñas poderán tramitar desde hoxe, xoves 18 de abril, a solicitude de bolsas educativas municipais do Concello. Con esta medida, o goberno local destinará 10.000 euros dirixidos a alumnos e alumnas de diferentes etapas educativas e que estean matriculados durante o curso 2023/2024.
O obxectivo desta liña é colaborar coas familias do municipio, axudándoas a afrontar os gastos derivados dos estudos de 2º ciclo de educación infantil, educación postobrigatoria -ciclos formativos, bacharelato ou similares-, formación profesional e de estudos universitarios oficiais.
No caso de infantil, destinarase unha contía de 3.600 euros. Cada persoa beneficiaria recibirá unha cantidade mínima de 30 euros e un máximo de ata 70 euros.
Para a formación postobrigatoria e formación profesional básica, a partida será de 3.000 euros. Establécese un mínimo de 40 euros por persoa beneficiaria e un máximo de 150.
Por último, a liña dedicada a estudos universitarios ascenderá a 3.400 euros. Cada usuario poderá recibir un mínimo de 50 euros e un máximo de 200 euros.
As persoas interesadas en recibir máis información deberán contactar co departamento de Educación no teléfono 981 61 35 20.
A Asociación de Criadores de Ovino e Caprino de Galicia (Ovica) celebrará un curso gratuíto de Prevención de ataques de fauna silvestre en Carral.
Será o venres, 19 de abril, entre as 9.00 e as 14.00 horas, na Casa da Cultura. De 16.30 a 19.30 horas a actividade continuará cunha visita a unha granxa no Monte Xalo.
Ao longo do mesmo falarase da incidencia do lobo e doutros depredadores, de diversas medidas de protección e dos tipos de peche para a protección do gando.
As persoas interesadas deberán anotarse a través do correo ovica@ovica.org ou no teléfono 669 128 946.
O goberno elevará o orzamento do 2024 ao pleno do luns, 1 de abril (20.00 horas). O documento económico deste exercicio ascende a 6.321.018,87 euros, o que supón un crecemento de, practicamente, o 9 % con respecto ao anterior (de 5.800.917,34). Os orzamentos reflicten, non só a boa saúde das arcas municipais, senón tamén o compromiso do goberno local polos Servizos Sociais. Tanto é así, que na proposta destaca a contía destinada a gasto social, que chega ata 1.053.790,77 euros. Isto é, un 16,6 % do total dos orzamentos empregaríase para asistencia social primaria.
A contía dedicada a Servizos Sociais inclúe tanto as partidas de persoal e subministracións como as destinadas ao financiamento de programas asistenciais e para colectivos en risco de exclusión social. Na relación de gasto destaca a partida de axuda no fogar, que suma entre as modalidades de dependencia e libre concorrencia, un total de 703.560 euros. Neste apartado atópanse tamén as axudas de emerxencia social (10.000 euros), o programa de educación familiar (9.300 euros) ou as actividades para a terceira idade, que contan cunha consignación de 11.000 euros.
Un millón en investimentos
O goberno local reforzará, ademais, a súa aposta por continuar mellorando as infraestruturas e servizos dos veciños e veciñas. Para logralo, o orzamento de 2024 incorpora obras por valor de 1.038.427,64 euros. A relación inclúe as obras financiadas a cargo do Plan Único da Deputación da Coruña e tamén a través da Axencia Galega de Desenvolvemento Rural (Agader). Unha gran parte das intervencións servirán para reforzar as condicións de seguridade en vías e camiños mediante a mellora da capa de rodadura ou a creación de beirarrúas en Herves, Sergude, Quembre, Sumio e San Vicente.
O goberno mantén a súa aposta pola cultura
As actividades para promover a conciliación da vida familiar e laboral -campamentos de verán e programa madrugadores- en colaboración cos centros educativos, así como as de tipo cultural e deportivas seguirán sendo unha prioridade para o goberno local tal e como se recolle no documento económico.
O Concello manterá, así mesmo, o seu apoio ás familias e tamén á comunidade educativa, algo que conseguirá co aumento das partidas dedicadas á conciliación e ás bolsas de ensino.
Máis persoal
O documento económico de 2024 recolle un crecemento no capítulo de persoal, que chega ata os 2.216.920,18 euros. Desde o goberno local apuntan que co fin de garantir unha mellor atención á cidadanía, reforzarase o departamento de Obras e Urbanismo coa incorporación de dous obreiros e dun técnico.
Actualización da RPT
O pleno servirá, así mesmo, para elevar a actualización da Relación de Postos de Traballo -RPT-. Neste caso, exponse un cambio na relación de postos de traballo para adaptar o documento ás necesidades actuais da Administración local. Así, súmase a ficha correspondente ao persoal eventual e proponse modificar dous postos: por unha banda, o de administrativo/a de Intervención e o de auxiliar administrativo de Administración xeral.
Modificación da parada de taxis
Outro dos puntos que se elevarán ao pleno do luns será o cambio de localización da parada de taxis de Carral con motivo da execución inminente das obras na praza da Capela. A aprobación en pleno implicará a modificación desta parada, que pasará a estar situada na rúa Víctor Velasco.
O goberno local elevará, así mesmo, a proposta para solicitar á Deputación da Coruña unha subvención para a XX Festa do Pan de Carral.
Concello: 981670002
Policía local: 689544311 / 981670002
Protección civil: 112
Casa da cultura/bibliotecas: 981672580
Edif. Social Toñito Espiñeira: 981613520
Centro de saúde:981672186
