Os núcleos de Tabeaio e Carral verán reforzadas as súas condicións de seguridade viaria coa elevación de pasos de peóns, a instalación de semáforos, a colocación de iluminación e de nova sinalización. Estas intervencións realizaranse a través dun convenio coa Deputación da Coruña e supoñerán resolver os problemas de accesibilidade, seguridade e visibilidade en varios puntos do termo municipal. En concreto, por medio do acordo co ente provincial, actuarase nun total de dez sendas: sete delas son as situadas na N-550, entre os núcleos de Tabeaio e Carral, e outras tres correspóndense coas situadas nas zonas escolares e no centro de saúde.

Con estas actuacións, o goberno local busca “ mellorar as condicións de seguridade viaria non municipio, dándolle unha maior prioridade aos peóns fronte aos vehículos”.

Por unha banda, instalaranse semáforos con pulsador no primeiro e o último paso de peóns de Tabeaio, así como no último da zona de Carral en dirección Santiago. Polo outro, no resto de sendas da Nacional dispoñerase un sinal luminoso de peóns e colocaranse, ademais, focos que iluminarán a travesía, garantindo así unha maior visibilidade e seguridade para os viandantes. A maiores, pintarase o cebrado do asfaltado doutro dos pasos peóns da zona centro de Carral, ao atoparse a capa actual en mal estado.

Estas obras completaranse coa colocación de bolardos no sentido da marcha dos vehículos. Con esta última actuación búscase evitar que aparquen cara á dereita da estrada e dificulten a visibilidade dos peóns que se dispoñen a atravesar a calzada.

Nos pasos de peóns fóra da Nacional instalaranse redutores de velocidade en forma de pasos sobreelevados que se executarán in situ.

O Concello sacou a licitación estes traballos por preto de 70.000 euros. Unha vez que se adxudiquen estas obras, o prazo de execución será de dous meses.

O Instituto Enerxético de Galicia, publica:

Axudas a proxectos de enerxía fotovoltaica: colocación de paneis solares e acondicionamento da enerxía eléctrica (monitorización, cableado, sistemas de acumulación, etc.). Esta liña de axudas está dirixida a autónomos, empresas e entidades sen ánimo de lucro.

Prazo: 16/07/2021 a 01/12/2021

Máis información no servizo de Medio Ambiente do Concello ou no teléfono 981 67 00 02.

O Concello celebrou un pleno no que se aprobou a proposta do goberno local para bautizar a senda peonil que une Carral e Tabeaio co nome de Martín Cortés Cacheiro. Este veciño, natural de Tabeaio, faleceu no ano 2018 e, ao longo da súa vida, contribuíu a mellorar os servizos, infraestruturas e, en xeral, a calidade de vida dos carraleses e carralesas. Durante a súa intervención, o alcalde, Javier Gestal, definiuno como “unha persoa moi querida e implicada na vida social da parroquia”.

No 1998, e ao non existir instalacións de titularidade municipal, deportiva e/ou cultural en Tabeaio, acordou coa Administración local a cesión dos terreos nos que, posteriormente, o Concello construíu a actual pista polideportiva da parroquia. Tal e como se recollía na proposta elevada a pleno, este espazo supuxo un gran impulso no fomento da actividade física e o deporte en Tabeaio. Esta operación implicou, así mesmo, a cesión dos terreos anexos á entidade cultural Xente Nova para a construción dun local social que, a día de hoxe, segue tendo un crecente uso.

A iniciativa parte dunha solicitude dos propios residentes da parroquia, así como dos familiares de Cortés Cacheiro, cos que tanto o alcalde como membros do goberno local mantiveron varias reunións. A proposta recibiu luz verde por unanimidade dos votos da corporación (Alternativa dos Veciños, PSOE, PP e a concelleira non adscrita).

Reforma das pistas deportivas

O pleno acordou, así mesmo, solicitar á Deputación da Coruña unha subvención nominativa para financiar a reforma das pistas deportivas da rúa Paleo. O rexedor alcanzou o apoio do ente provincial para destinar 89.684 euros á execución deste proxecto, que supoñerá unha importante mellora na instalación. A contía restante, 22.421 euros, procederán das arcas municipais.

Actualmente, o lugar está ocupado por dúas pistas de tenis que se atopan en malas condicións e que están en desuso. As obras supoñerán a reforma dunha das pistas e a creación doutra multideporte, dun skatepark e dun lavadoiro de bicicletas que se situará nun punto estratéxico polo que pasan moitos ciclistas cando baixan desde o Monte Xalo. O plan incluirá, ademais, a substitución da iluminación actual por outra con tecnoloxía LED e a instalación de bancos na zona.

A proposta aprobouse cos votos a favor de Alternativa dos Veciños, do PP e da concelleira non adscrita, que sinalaron a necesidade de acometer este proxecto, e coa abstención dos concelleiros do PSOE.

O goberno local reafirma así a súa aposta por mellorar as dependencias deportivas do municipio. Seguindo a mesma liña de traballo, o Concello acometerá a ampliación do Centro Deportivo de Carral.

Por último, o pleno aprobou, por unanimidade dos votos, o Plan de Prevención e Defensa contra os Incendios Forestais.