O Concello de Carral prepárase para un verán cheo de actividades culturais, deportivas e xuvenís para todos os públicos. A oferta conta con preto de 40 propostas que se levarán a cabo ao longo dos meses de xuño, xullo e agosto. Con este amplo abano, o goberno local reforza, aínda máis, a súa aposta pola promoción da cultura e o deporte, organizando propostas adaptadas á nova normalidade e nas que se cumpre, de xeito estrito, cos protocolos sanitarios pola covid-19.
A programación arrincará esta mesma fin de semana coas actividades do ciclo ‘Elas son artistas’. Este programa incluirá a realización dun obradoiro de arte urbano (12 e 13 de xuño), dun espectáculo de danza a cargo da compañía Cía. Entremáns e dun concerto de Pauliña. Estas tres propostas celebraranse na piscina municipal. Esta fin de semana está a ter lugar, ademais, o XVII Torneo de Tiro Olímpico (12 e 13 de xuño), organizado polo Club de Tiro Olímpico de Carral.
En xuño retomaranse, así mesmo, os cursos de pilates no Complexo Deportivo (entre o 14 de xuño e o 31 de agosto) e a actividade na piscina municipal (aberta desde o 18 de xuño e ata o 3 de setembro). A través da OMIX, levarase a cabo un obradoiro de arte urbana os días 25 e 26 de xuño. A última actividade deste mes chegará o 29 de xuño, ás 18.00 horas, cando Pedro Brandariz aterrará na contorna da piscina.
O mes de xullo suporá o inicio dun novo programa cultural, “Culturúa”, con proxeccións de películas ao aire libre, espectáculos na rúa e música. A iniciativa arrincará o 1 de xullo, ás 18.00 horas, no Campo da Feira co espectáculo ‘Mere Clown’. Ao día seguinte, o 2 de xullo ás 22.30 horas, as persoas interesadas poderán gozar da película “A illa das mentiras”, que se proxectará no Campo da Feira. ‘Culturúa’ continuará o 22 de xullo (ás 18.00 horas no Campo da Feira) cunha actuación musical para os nenos e nenas da man de Paco Nogueira. O 24 de xullo, o Mago Antón tomará o relevo e realizará varios pases do seu espectáculo de maxia no Campo da Feira. O cine volverá inundar o núcleo urbano o 30 de xullo, ás 22.00 horas, con “Érase una vez… Hollywood”. No mes de agosto, ‘Culturúa’ ofrecerá outras tres actividades: un concerto de Xavi Longueirón para os cativos e cativas (26 de agosto, ás 18.00 horas, no Campo da Feira), proxección da película “Mientras dure la guerra” (28 de agosto, ás 22.00 horas, no Campo da Feira) e unha actuación de Xaracandaina (domingo, 29 de agosto, coincidindo coa feira municipal).
O mes de xullo suporá o inicio dos cursillos de natación (que se prolongarán tamén en agosto), a celebración do ciclo ‘Músicas Íntimas’ (con actuacións de Lulavai e MJ Pérez), e o arranque dos cursos de Doma Clásica (3 e 4 de xullo no Centro Ecuestre Finca Abrigosa) e de Pádel (do 5 ao 30 de xullo). O Concello organiza, ademais, unha excursión ao Aquapark de Cerceda (7 de xullo) e unha ruta de sendeirismo (3 de xullo), entre outras propostas.
Os amantes do pádel terán a súa propia cita coa organización do Torneo de Pádel x Parellas. A competición disputarase entre o 15 de xullo e o 4 de setembro, e as persoas interesadas poderán anotarse ata o 12 de xullo.
Agosto virá tamén cargado de actividade. Para este mes, o Concello prevé a organización dunha ruta de sendeirismo (14 de agosto) e de rutas a cabalo (21 de agosto). A piscina volverá converterse no epicentro da actividade cultural e a instalación converterase no escenario no que Pedro Brandariz chegará cos seus ‘Contos e outras andrómenas’ (24 de agosto). O mes de agosto incluirá a celebración do IX Torneo de Xadrez de Verán (28 de agosto). O Concello concluirá a programación estival coa II Festa da Auga (domingo, 29 de agosto, de 16.00 a 20.00 horas, na piscina municipal).
Actividades de conciliación
Ao longo de toda a época estival levaranse a cabo tamén os campamentos urbanos de verán en diferentes quendas: 1º irán os campamentos deportivos (28 de xuño ao 16 de xullo), a continuación os English sport camp (19 de xullo ao 6 de agosto) e, por último, os campamentos sobre Medio Ambiente (do 9 de agosto ao 3 de setembro). Nesta primeira quenda, a rapaza coñecerá a vida deportiva de Carral, así como as modalidades que practican os deportistas do municipio.
Protocolo covid-19
Todas as actividades celebraranse tendo en conta as medidas fixadas polos organismos sanitarios en cada momento. As persoas interesadas en recibir máis información ou en anotarse poderán chamar aos seguintes teléfonos: 981 67 25 80, 678 33 88 47 e 674 793 475 (dispoñible para o envío de WhatsApps).
Podes descargar o díptico completo nesta ligazón.
CARRAL DOBRA A SÚA APOSTA POLA CONCILIACIÓN AMPLIANDO OS HORARIOS DOS SEUS CAMPAMENTOS DE VERÁN
O Concello acaba de dobrar a súa aposta pola conciliación a través do lanzamento dunha nova convocatoria dos campamentos de verán que, este ano, se levarán a cabo con dúas importantes novidades. Por un lado, a ampliación de horarios ata as 16.00 horas. Polo outro, brindándolles ás familias a opción de que poidan anotar aos pequenos e pequenas por semanas. Tal e como sinalan desde o goberno local, ambas as dúas medidas buscan cumprir un mesmo obxectivo: “darlles aos veciños e veciñas máis facilidades a prol da conciliación da vida familiar e laboral durante a época estival”.
Os campamentos, dirixidos a nenos e nenas de 3 a 15 anos, celebraranse ao longo de todo o verán en tres quendas coas seguintes temáticas: 1º irán os campamentos deportivos (28 de xuño ao 16 de xullo), a continuación os English sport camp (19 de xullo ao 6 de agosto) e, por último, os campamentos sobre Medio Ambiente (do 9 de agosto ao 3 de setembro). Nesta primeira quenda, a rapazada coñecerá a vida deportiva de Carral, así como as modalidades que practican os deportistas do municipio.
Co fin de axustar á organización da actividade ás medidas hixiénicas e preventivas fixadas pola Xunta de Galicia, o Concello celebrará os campamentos no recinto do CEIP Vicente Otero Valcárcel (pavillón do colexio, pista polideportiva, patio cuberto, etc.) e no local interxeracional, sito a poucos metros do centro de ensinanza.
Os nenos e nenas terán a posibilidade de entrar no recinto desde as 8.00 horas. Así, entre a hora de entrada e as 10.00 horas terá lugar o programa Madrugadores, entre as 10.00 e as 14.00 horas realizaranse as propias actividades e, de 14.00 a 16.00 horas, será a hora da comida. En caso de solicitalo, os cativos e cativas deberán traer o seu propio xantar da casa e poderán tomalo no comedor do colexio baixo a supervisión dos monitores e monitoras.
Medidas covid-19
Os rapaces e rapazas estarán separados en grupos burbulla. Antes de entrar no recinto, os usuarios e usuarias deberán desinfectar as mans. Ademais, os maiores de 6 anos deberán empregar a máscara de xeito obrigatorio. A maiores, o Concello establecerá quendas nas saídas e entradas dos campamentos co fin de evitar aglomeracións.
O período de inscrición acaba de abrir, e as persoas interesadas poderán presentar a solicitude ata o 21 de xuño. A documentación deberá achegarse a través do correo electrónico casadacultura@carral.es.
O Concello levará a cabo, ao longo de toda a fin de semana, varias actividades nas que a música, a pintura e a danza serán as grandes protagonistas. Como parte do programa Elas son artistas, a piscina municipal de Carral converterase no lenzo dun obradoiro de pintura mural co que se busca concienciará mocidade sobre as desigualdades de xénero neste eido creativo.
Este obradoiro terá lugar o sábado, 12 de xuño de 11.00 a 14.00 horas, e o domingo, 13 de xuño, de 10.00 a 19.00 horas –cunha pausa para comer-. O sábado impartirase a parte teórica da actividade, mentres que o domingo será a quenda da parte práctica, coa que se dará continuidade ao mural iniciado o ano pasado, tamén como parte de Elas son Artistas.
A programación da fin de semana incluirá, ademais, unha actuación a cargo da cantante Pauliña, tamén na piscina municipal (domingo, 13 de xuño ás 19.30 horas). Este acto será de entrada libre e ata completar aforo. Así mesmo, e como broche final do obradoiro, terá lugar a actuación da agrupación Entremáns, que interpretará a peza Amparo, baseada na novela “La Tribuna”, de Emilia Pardo Bazán.
Atendendo ás restricións sanitarias pola covid-19, as persoas interesadas deberán anotarse chamando previamente ao 981 67 25 80.
Desde o Concello de Carral infórmase de que as persoas interesadas en facer unha cacharela de San Xoán na noite do 23 ao 24 de xuño, deberán facer unha comunicación ao Concello de Carral.
Poden formulala enchendo o seguinte documento.
Queres aprender a facer pintura mural de arte urbana? Desde a OMIX (oficina municipal de información xuvenil) organizamos este obradoiro para que desenvolvas toda a túa creatividade artística e aprendas a facer pintura mural tanto con spray como con pintura plástica.
Para rapazas e rapaces a partir de 15 anos, desenvolverase no local Interxeracional durante o venres 25 e sábado 26, de 10:00 a 14:00 h. e de 15:00 a 20:00 h.
O curso é gratuito e as prazas son limitadas e a data para inscribirse remata o 22 de xuño. Se estás interesado/a en realizalo ou queres mais información podes chamar o 674.793.475 ou a través dun correo electrónico a omix@carral.es.
A realización de este obradoiro levarase acabo cumprindo as medidas de prevención do Covid-19.
A situación sanitaria obrigou ao Concello de Carral a cancelar, este ano, a súa tradicional Festa do Pan, unha celebración gastronómica para exaltar ao seu produto estrela: o pan de Carral. Con todo, co obxectivo de poñer en valor este e outros produtos locais, o Concello organizará este domingo, 30 de maio, unha xornada de exaltación á súa rica oferta gastronómica. O evento arrincará ás 13.00 horas no campo da feira, onde ese día se celebra tamén o tradicional mercado do último domingo de mes.
A actividade incluirá un showcooking a cargo de Iago Cagiao, Premio Picado Cidade da Coruña 2019. Así mesmo, como parte do evento haberá tamén unha maridaxe por parte de Miguel Viña, responsable da tenda de alimentación Mundo Galego.
O evento levarase a cabo seguindo as medidas de prevención hixiénico-sanitarias para reducir así o risco de contaxios pola covid-19.
O Concello celebrará mañá, xoves 27 de maio, un pleno ordinario no que se elevarán os orzamentos de 2021. O documento ascende a 5.800.917,34 euros, o que supón un crecemento do 5,30% con respecto ao de 2020. A concelleira de Economía, Facenda, Réxime Interior e Recursos Humanos explica que se trata duns orzamentos “sociais porque estiveron marcados pola pandemia, de xeito que tivemos que facer varias modificacións para adaptarnos ás novas demandas xurdidas a raíz da pandemia”. Precisamente, o documento inclúe novas partidas dedicadas á reactivación da economía na era poscovid, así como a apoiar aos veciños e veciñas en risco de exclusión social.
O documento económico contempla novas partidas que irán dirixidas a apoiar ás empresas e persoas autónomas do municipio, así como outras dedicadas a favorecer o comercio local. Estas premisas cumpriranse, fundamentalmente, a través de dúas medidas: por unha banda, coa incorporación dun apartado de 140.000 euros para as axudas do programa PEL-Reactiva e, polo outro, por medio da creación dun novo posto de ADL -en colaboración con outros Concellos-.
O departamento de Servizos Sociais segue sendo prioritario para o goberno local. Así, ademais de manter as partidas económicas con respecto a outros exercicios, o goberno local reforzará o traballo que se realiza desde este departamento cunha importante novidade: a contratación dun técnico e dun auxiliar que reforzarán o traballo realizado desde o departamento de Servizos Sociais.
Preto dun millón en investimentos
O capítulo de investimentos, de 905.375,36 euros, servirá para realizar proxectos que incrementarán e mellorarán os servizos e infraestruturas para os veciños e veciñas. Nesta contía inclúense aquelas actuacións financiadas pola Deputación da Coruña (instalación de iluminación con tecnoloxía LED na DP-1704, humanización e mellora da capa de rodadura en varios viais de Paleo, Beira, Tabeaio, Soavila e Cañás, reforma do Centro Deportivo de Carral e renovación das pistas de tenis para convertelas en pistas multideporte), e outras que se pagarán con fondos propios. Neste último apartado, o goberno local destaca a creación dunha partida para a adquisición de terreos que, probablemente, empregarase para comprar unha parcela anexa ao Campo da Feira coa que crear unha zona de acceso peonil a praza da Capela, así como para comprar outro solar anexo á nave de obras coa que se incrementará o espazo de provisión. O goberno local reseña, ademais, os proxectos de humanización e mellora do núcleo urbano, entre os que se inclúen a derriba do antigo bar Primavera e a creación de amplas zonas de aparcamento na zona centro.
O goberno centrará esforzos, ademais, na renovación do tendido eléctrico para reducir o número de incidencias no municipio. Para logralo, destinarase unha partida de 100.000 euros -da cifra total, o 80% financiaríase a través dunha subvención do IDAE-. A previsión do goberno local é iniciar estes traballos polas parroquias, por ser as que presentan máis carencias.
O goberno mantén a súa aposta pola cultura
As actividades para promover a conciliación da vida familiar e laboral -campamentos de verán e programa madrugadores- en colaboración cos centros educativos, así como as de tipo cultural seguen sendo unha prioridade para o goberno local.
O Concello manterá, así mesmo, o seu apoio aos centros de ensino con dúas partidas: unha de 12.000 euros para a organización de cursos e actividades extraescolares e outra de 8.000 euros para continuar promovendo medidas que favorezan a conciliación.
O documento de 2021 reflicte tamén un aumento do Gasto de Persoal (1.960.683,25 euros) do 7,2%. Así mesmo, preséntase tamén un incremento do gasto en Bens Correntes e Servizos (2.044.805 euros) do 7,7%.
Actualización da RPT
O pleno servirá, así mesmo, para elevar a actualización da Relación de Postos de Traballo – RPT-. Como explica a concelleira Economía, Facenda, Réxime Interior e Recursos Humanos, a proposta realizouse para adaptar os postos ás necesidades que non estaban cubertas no Concello, e supuxo unha revisión salarial.
O Concello reforzará a seguridade cidadá por medio de dúas importantes novidades: por unha banda, coa incorporación de dous novos policías locais e, polo outro, coa instalación de cámaras para a vixilancia, control, regulación e disciplina do tráfico no municipio. O goberno local confía en que estas dúas medidas “sirvan para mellorar a calidade de vida dos veciños e veciñas de Carral, garantindo unha maior seguridade, sobre todo na situación actual”.
Estes dous axentes municipais incorporaranse á Policía Local como funcionarios en prácticas. A previsión é que tomen posesión o 24 de maio para o seu inmediato ingreso no curso formativo impartido pola Academia Galega de Seguridade. Unha vez rematen o programa de formación -de 9 meses de duración- os dous axentes tomarán posesión definitiva como funcionarios de carreira na Policía Local de Carral.
As condicións de seguridade veranse incrementadas, ademais, coa instalación de varias cámaras de vixilancia. Estes elementos servirán para vixiar, controlar e regular o tráfico e favorecerán a xestión das principais incidencias que se suceden nos viais do municipio.
O núcleo urbano de Carral experimentará unha reurbanización completa. Todo grazas ao proxecto que o Concello executará no centro -no tramo que discorre pola N-550- e que supoñerá unha importante mellora para a seguridade e mobilidade peonil e un estímulo para o consumo no comercio e a hostalería da zona. O alcalde de Carral, Javier Gestal, acaba de aceptar a subvención por parte do Instituto para a Diversificación e Aforro da Enerxía – IDAE- co que se sufragarán estas intervencións.
O plan de reurbanización incluirá a ampliación das beirarrúas, a renovación da iluminación pública, a mellora dos pasos de peóns e a reordenación das zonas de estacionamento no centro de Carral.
O proxecto executarase cun orzamento de 1.416.983,53 euros. Ao tratarse dunha subvención do IDAE, o Concello tería que asumir 283.396,71 euros. Segundo a reunión mantida entre o rexedor e o concelleiro de Urbanismo co presidente da Deputación da Coruña, o organismo provincial comprometeríase a achegar a parte do Concello. Desde o goberno local informan de que están a contactar cos bancos para conseguir o financiamento necesario para facer fronte a este proxecto dada a situación económica do Concello.