O Concello de Carral prepárase para un verán cheo de actividades culturais, deportivas e xuvenís para todos os públicos. A oferta conta con preto de 40 propostas que se levarán a cabo ao longo dos meses de xuño, xullo e agosto. Con este amplo abano, o goberno local reforza, aínda máis, a súa aposta pola promoción da cultura e o deporte, organizando propostas adaptadas á nova normalidade e nas que se cumpre, de xeito estrito, cos protocolos sanitarios pola covid-19.

A programación arrincará esta mesma fin de semana coas actividades do ciclo ‘Elas son artistas’. Este programa incluirá a realización dun obradoiro de arte urbano (12 e 13 de xuño), dun espectáculo de danza a cargo da compañía Cía. Entremáns e dun concerto de Pauliña. Estas tres propostas celebraranse na  piscina municipal. Esta fin de semana está a ter lugar, ademais, o XVII Torneo de Tiro Olímpico (12 e 13 de xuño), organizado polo Club de Tiro Olímpico de Carral.

En xuño retomaranse, así mesmo, os cursos de pilates no Complexo Deportivo (entre o 14 de xuño e o 31 de agosto) e a actividade na piscina municipal (aberta desde o 18 de xuño e ata o 3 de setembro). A través da OMIX, levarase a cabo un obradoiro de arte urbana os días 25 e 26 de xuño. A última actividade deste mes chegará o 29 de xuño, ás 18.00 horas, cando Pedro Brandariz aterrará na contorna da piscina.  

O mes de xullo suporá o inicio dun novo programa cultural, “Culturúa”, con proxeccións de películas ao aire libre, espectáculos na rúa e música. A iniciativa arrincará o 1 de xullo, ás 18.00 horas, no Campo da Feira co espectáculo ‘Mere Clown’. Ao día seguinte, o 2 de xullo ás 22.30 horas, as persoas interesadas poderán gozar da película “A illa das mentiras”, que se proxectará no Campo da Feira. ‘Culturúa’ continuará o 22 de xullo (ás 18.00 horas no Campo da Feira) cunha actuación musical para os nenos e nenas da man de Paco Nogueira. O 24 de xullo, o Mago Antón tomará o relevo e realizará varios pases do seu espectáculo de maxia no Campo da Feira. O cine volverá inundar o núcleo urbano o 30 de xullo, ás 22.00 horas, con “Érase una vez… Hollywood”. No mes de agosto, ‘Culturúa’ ofrecerá outras tres actividades: un concerto de Xavi Longueirón para os cativos e cativas (26 de agosto, ás 18.00 horas, no Campo da Feira), proxección da película “Mientras dure la guerra” (28 de agosto, ás 22.00 horas, no Campo da Feira) e unha actuación de Xaracandaina (domingo, 29 de agosto, coincidindo coa feira municipal).

O mes de xullo suporá o inicio dos cursillos de natación (que se prolongarán tamén en agosto), a celebración do ciclo ‘Músicas Íntimas’ (con actuacións de Lulavai e MJ Pérez), e o arranque dos cursos de Doma Clásica (3 e 4 de xullo no Centro Ecuestre Finca Abrigosa) e de Pádel (do 5 ao 30 de xullo). O Concello organiza, ademais, unha excursión ao Aquapark de Cerceda (7 de xullo) e unha ruta de sendeirismo (3 de xullo), entre outras propostas.

Os amantes do pádel terán a súa propia cita coa organización do Torneo de Pádel x Parellas. A competición disputarase entre o 15 de xullo e o 4 de setembro, e as persoas interesadas poderán anotarse ata o 12 de xullo.

Agosto virá tamén cargado de actividade. Para este mes, o Concello prevé a organización dunha ruta de sendeirismo (14 de agosto) e de rutas a cabalo (21 de agosto). A piscina volverá converterse no epicentro da actividade cultural e a instalación converterase no escenario no que Pedro Brandariz chegará cos seus ‘Contos e outras andrómenas’ (24 de agosto). O mes de agosto incluirá a celebración do IX Torneo de Xadrez de Verán (28 de agosto). O Concello concluirá a programación estival coa II Festa da Auga (domingo, 29 de agosto, de 16.00 a 20.00 horas, na piscina municipal).

Actividades de conciliación

Ao longo de toda a época estival levaranse a cabo tamén os campamentos urbanos de verán en diferentes quendas: 1º irán os campamentos deportivos (28 de xuño ao 16 de xullo), a continuación os English sport camp (19 de xullo ao 6 de agosto) e, por último, os campamentos sobre Medio Ambiente (do 9 de agosto ao 3 de setembro). Nesta primeira quenda, a rapaza coñecerá a vida deportiva de Carral, así como as modalidades que practican os deportistas do municipio.

Protocolo covid-19

Todas as actividades celebraranse tendo en conta as medidas fixadas polos organismos sanitarios en cada momento. As persoas interesadas en recibir máis información ou en anotarse poderán chamar aos seguintes teléfonos: 981 67 25 80, 678 33 88 47 e 674 793 475 (dispoñible para o envío de WhatsApps).

Podes descargar o díptico completo nesta ligazón.

Queres aprender a facer pintura mural de arte urbana? Desde a OMIX (oficina municipal de información xuvenil) organizamos este obradoiro para que desenvolvas toda a túa creatividade artística e aprendas a facer pintura mural tanto con spray como con pintura plástica.

Para rapazas e rapaces a partir de 15 anos, desenvolverase no local Interxeracional durante o venres 25 e sábado 26, de 10:00 a 14:00 h. e de 15:00 a 20:00 h.

O curso é gratuito e as prazas son limitadas e a data para inscribirse remata o 22 de xuño. Se estás interesado/a en realizalo ou queres mais información podes chamar o 674.793.475 ou a través dun correo electrónico a omix@carral.es.

A realización de este obradoiro levarase acabo cumprindo as medidas de prevención do Covid-19.

O Concello celebrará mañá, xoves 27 de maio, un pleno ordinario no que se elevarán os orzamentos de 2021. O documento ascende a 5.800.917,34 euros, o que supón un crecemento do 5,30% con respecto ao de 2020. A concelleira de Economía, Facenda, Réxime Interior e Recursos Humanos explica que se trata duns orzamentos “sociais porque estiveron marcados pola pandemia, de xeito que tivemos que facer varias modificacións para adaptarnos ás novas demandas xurdidas a raíz da pandemia”. Precisamente, o documento inclúe novas partidas dedicadas á reactivación da economía na era poscovid, así como a apoiar aos veciños e veciñas en risco de exclusión social.

O documento económico contempla novas partidas que irán dirixidas a apoiar ás empresas e persoas autónomas do municipio, así como outras dedicadas a favorecer o comercio local. Estas premisas cumpriranse, fundamentalmente, a través de dúas medidas: por unha banda, coa incorporación dun apartado de 140.000 euros para as axudas do programa PEL-Reactiva e, polo outro, por medio da creación dun novo posto de ADL -en colaboración con outros Concellos-.

O departamento de Servizos Sociais segue sendo prioritario para o goberno local. Así, ademais de manter as partidas económicas con respecto a outros exercicios, o goberno local reforzará o traballo que se realiza desde este departamento cunha importante novidade: a contratación dun técnico e dun auxiliar que reforzarán o traballo realizado desde o departamento de Servizos Sociais.

Preto dun millón en investimentos

O capítulo de investimentos, de 905.375,36 euros, servirá para realizar proxectos que incrementarán e mellorarán os servizos e infraestruturas para os veciños e veciñas. Nesta contía inclúense aquelas actuacións financiadas pola Deputación da Coruña (instalación de iluminación con tecnoloxía LED na DP-1704, humanización e mellora da capa de rodadura en varios viais de Paleo, Beira, Tabeaio, Soavila e Cañás, reforma do Centro Deportivo de Carral e renovación das pistas de tenis para convertelas en pistas multideporte), e outras que se pagarán con fondos propios. Neste último apartado, o goberno local destaca a creación dunha partida para a adquisición de terreos que, probablemente, empregarase para comprar unha parcela anexa ao Campo da Feira coa que crear unha zona de acceso peonil a praza da Capela, así como para comprar outro solar anexo á nave de obras coa que se incrementará o espazo de provisión. O goberno local reseña, ademais, os proxectos de humanización e mellora do núcleo urbano, entre os que se inclúen a derriba do antigo bar Primavera e a creación de amplas zonas de aparcamento na zona centro.

O goberno centrará esforzos, ademais, na renovación do tendido eléctrico para reducir o número de incidencias no municipio. Para logralo, destinarase unha partida de 100.000 euros -da cifra total, o 80% financiaríase a través dunha subvención do IDAE-. A previsión do goberno local é iniciar estes traballos polas parroquias, por ser as que presentan máis carencias.

O goberno mantén a súa aposta pola cultura

As actividades para promover a conciliación da vida familiar e laboral -campamentos de verán e programa madrugadores- en colaboración cos centros educativos, así como as de tipo cultural seguen sendo unha prioridade para o goberno local.

O Concello manterá, así mesmo, o seu apoio aos centros de ensino con dúas partidas: unha de 12.000 euros para a organización de cursos e actividades extraescolares e outra de 8.000 euros para continuar promovendo medidas que favorezan a conciliación.

O documento de 2021 reflicte tamén un aumento do Gasto de Persoal (1.960.683,25 euros) do 7,2%. Así mesmo, preséntase tamén un incremento do gasto en Bens Correntes e Servizos (2.044.805 euros) do 7,7%.

Actualización da RPT

O pleno servirá, así mesmo, para elevar a actualización da Relación de Postos de Traballo – RPT-. Como explica a concelleira Economía, Facenda, Réxime Interior e Recursos Humanos, a proposta realizouse para adaptar os postos ás necesidades que non estaban cubertas no Concello, e supuxo unha revisión salarial.

O Club de Ximnasia Rítmica de Carral celebrará mañá, sábado 8 de maio, en colaboración co Concello, a 6ª edición do seu Torneo de Ximnasia Rítmica. Porén, debido á situación sanitaria actual, a competición trasladarase, este ano, ao formato telemático. En concreto, as 30 actuacións incluídas na programación desta 6ª edición retransmitiranse a través da canle de Youtube de Deportes Carral. Ao longo de toda a mañá, daranse cita un total de nove clubs das provincias da Coruña e Pontevedra.

O torneo estará dividido en dúas partes: a primeira consistirá na publicación das diferentes actuacións das agrupacións, mentres que a segunda será a deliberación do xurado. Os números dos diferentes clubs faranse públicos entre as 11.30 e as 13.05 horas –cun descanso de 20 minutos-. O xurado, composto por Elena Sierra –profesora no INEF da Coruña-, Míriam Fernández e Sandra Estrada –ambas as dúas ximnastas de nivel e adestradoras- irán valorando as actuacións a medida que se vaian publicando. As clasificacións do Torneo faranse públicas ao longo do día e os trofeos –un total de 21- enviaranse aos clubs gañadores.

Esta 6ª edición contará coa participación dos seguintes clubs: Club Rítmica Coruña, Club Agarimo, Club Saraiba ED. Poio, Club Biqueira, XR. Abegondo, Club XR Carral, Colexio Obradoiro e Club de Ximnasia Porriño.

Carral ofrecerá, ao longo do mes de maio, unha nova edición do seu programa de espectáculos infantís ‘Papeques’, dirixido aos nenos e nenas do municipio. A programación arrincará mañá, venres día 7, e prolongarase ata o 27 de maio. Ao longo das vindeiras semanas, os pequenos e pequenas poderán gozar de funcións de teatro, contacontos, cine e mesmo música. Esta nova convocatoria estará estreitamente vinculada ao Premio de Poesía Concello de Carral e á celebración do Día das Letras Galegas.

A primeira actividade terá lugar mañá, venres 7 de maio ás 18.00 horas, na biblioteca da Casa da Cultura. A compañía Migallas Teatro relatará aos cativos e cativas o conto “Os tres porquiños”.

O programa continuará o xoves, 13 de maio ás 18.00 horas, na biblioteca da Casa da Cultura con “O Paroleiro” de Pablísimo. Ao día seguinte, 14 de maio ás 18.00 horas, terá lugar a proxección da película “Dora y la ciudad perdida” na Casa da Cultura.

A primeira función teatral aterrará o sábado, 15 de maio ás 18.00 horas, no local Xente Nova de Tabeaio. A interpretación correrá a cargo da Asociación Teatral Paso de Valverde con “Ultrasónica”. A agrupación Talía Teatro collerá a testemuña o xoves, 20 de maio ás 18.00 horas, coa obra “Rosa Caramelo” (Casa da Cultura).

O calendario continuará coa proxección do filme “A Familia Adams” o venres, 21 de maio ás 18.00 horas, na Casa da Cultura.

Lydia Botana traerá a Carral “A feira das linguas”, un espectáculo que mestura música e teatro dirixido a nenos e nenas maiores de 7 anos. Será o sábado, 22 de maio ás 18.00 horas, no local Xente Nova de Tabeaio.

O grupo de música Mamá Cabra tomará parte tamén nesta 4ª edición de ‘Papeques’ co seu obradoiro de arrolos. O evento levarase a cabo o domingo, 23 de maio, ás 12.00 horas no local Xente Nova de Tabeaio.

Este ciclo pecharase co contacontos “Festa da Poesía das Catro Estacións” de Trinketrinke Teatro. Será o xoves, 27 de maio ás 18.00 horas na Casa da Cultura.

Todas estas actividades levaranse a cabo atendendo a un estrito protocolo de seguridade para reducir o risco de contaxio pola covid-19. Así, as entradas –de balde- serán limitadas co fin de garantir a distancia interpersoal entre o público asistente e os aforos. As persoas interesadas poderán obter os seus convites chamando ao 981 67 25 80 -72 horas antes da celebración da actividade-.

‘Papeques’ conta coa colaboración da Deputación da Coruña, a través da súa Rede Cultural, e da Xunta de Galicia por medio de Ler conta moito

O dia 22 de abril comeza o prazo para solicitar as axudas ao estudo do Concello de Carral do curso actual 2020/2021

Entregar solicitude no rexistro municipal ou pola sede electrónica https://sede.carral.es/opencms/gl/1.

PRAZO: ata o 12 de maio

Requisitos: empadroad@s en Carral

     Estudos postobrigatorios de carácter público: bacharelato, ciclos formativos, fp básica ou similares

     Estudos universitarios públicos ou privados

     Estudos de 2º ciclo de infantil de carácter público

Inscricións no BOP do día 15 de marzo de 2021 :

https://bop.dacoruna.gal/bopportal/publicado/2021/03/15/2021_0000001952.pdf

Tamén no Edificio Social Toñito Espiñeira ou no rexistro do Concello. Para máis información no Departamento de Educación educación@carral.es ou no 678338872

Ata o 5 de maio podes solicitar a inscrición nas accións formativas do programa Pel Emprego Sustentable no ámbito rural. Programa desenvolto pola Excma Deputación de A Coruña.

As accións a desenvolver son:

Competencias Clave nivel 2 Matemáticas e Lingua Castelá

Competencias Clave nivel 3 Matemáticas e Lingua Castelá

Sedes máis cercanas a Carral: Oleiros e Ordes

Horario de mañan

Acceso por orde inscrición e cumprimento de requisitos na sede electrónica de carral.es ou no teléfono do servizo municipal de educación 678338872 ou por mail educacion@carral.es

https://sede.carral.es/opencms/gl/procedimientosytramites/tramites/AccionFormativa_PEL_Sustentable

As dúas farmacias de Carral súmanse á campaña do Colexio Oficial de Farmacéuticos e a Consellería de Sanidade da Xunta de Galicia para realizar un cribado de saliva  SARS-COV-2, coas que detectar posibles asintomáticos entre adolescentes de 12 a 17 anos.

Os interesados ou interesadas en participar neste  cribado poderán recoller de xeito gratuíto a súa proba para partir do luns, 19 de abril. Ao ser menores de idade deberán levar un xustificante ou ir acompañados dos seus titores legais, ademais do seu número de tarxeta sanitaria. Na propia farmacia daranlles as instrucións para realizar o test de forma correcta.

Ademais, desde as farmacias poñeranse en contacto coa Consellería de Educación para sensibilizar aos mozos e mozas da importancia de participar neste  cribado.

A Biblioteca Municipal leva a cabo este xoves a sesión mensual de contacontos teatral de animación á lectura. Trinketrinke Teatro, compañía encargada destas actividades, presenta nesta ocasión Os ratiños da caixa.

A sesión, dirixida a nenas e nenos de 4 a 8 anos, comezará ás 18:00 h. e é necesario reservar convites chamando ao 981 672 580. As localidades son limitadas atendendo ás medidas de protección contra o Covid19.

Por decreto da alcaldía nº 101/2021, do 10 de marzo, resolveuse aprobar a lista provisional de admitidos e excluídos dos candidatos/as presentados para a contratación de cinco traballadores/as (4 albaneis e 1 electricista) para a cuadrilla de obras e servizos mínimos municipais subvencionada pola Deputación da Coruña, “Programa de Integración Laboral” dos Concellos da provincia de menos de 20.000 habitantes 2021 ,a xornada parcial, modalidade contractual de obra e servizo.
Outórgaselles aos interesados un prazo de DOUS DÍAS HÁBILES (xoves 11 e venres 12 de marzo de 2021) para reclamacións ou correccións segundo o establecido nas bases que rexen o procedemento.
Para calquera dúbida ou aclaración poden dirixirse ao departamento de Persoal no 981670002.

Ver lista provisional de persoas admitidas e excluídas