O CONCELLO RECUPERA O SEU CONCURSO DE TAPAS “CARRAL, CON MOITO GUSTO” PARA PROMOVER O CONSUMO NO TECIDO HOSTALERIO

Tras un ano de parón por mor da covid-19, o Concello retomará, este outono, o seu concurso de tapas “Carral, con moito gusto”. Trátase da segunda edición desta iniciativa, que naceu en 2019 e acadou uns excelentes resultados entre os locais de hostalaría do municipio. Agora, o goberno local recupera a proposta, coa que se busca “promover o consumo nos bares, restaurantes e todo tipo de locais de hostalaría, que viviron un ano e medio especialmente difícil pola emerxencia sanitaria, sufrindo varios peches e paróns na súa actividade”.

O certame estará aberto á participación de bares, mesóns, restaurantes e cafeterías, sempre e cando prime o emprego de produtos locais e de tempada na elaboración das receitas. Os locais interesados poderán tramitar a súa inscrición entre o 2 e o 5 de novembro (ambos os dous incluídos). A folla de inscrición debidamente cuberta deberá presentarse no rexistro do Concello antes das 14.00 horas do 5 de novembro. Terá que incluír o selo do establecemento, ou o CIF e sinatura no caso de non ter selo. O propio concurso levarase a cabo entre o 3 e o 6 de decembro como preámbulo das festas de Nadal.

Premios aos hostaleiros

Todas as tapas poderán optar aos seguintes recoñecementos: Premio do xurado popular, Premio Mellor Tapa 2021 e primeiro e segundo premio do xurado profesional.

Descarga a ficha de inscrición aquí.

Descarga as bases do concurso aquí.

/by

O CONCELLO SUBSCRIBE CONVENIOS POR VALOR DE MÁIS DE 16.000 EUROS CUNHA DECENA DE ENTIDADES DEPORTIVAS, CULTURAIS E AMBIENTAIS

O alcalde de Carral, Javier Gestal, asinou, esta semana, unha decena de convenios de colaboración con entidades deportivas e culturais, así como cunha asociación medioambiental do municipio. Con estes acordos, que ascenden a 16.400 euros, o goberno local reforza o seu compromiso co tecido asociativo do municipio, que “vén de vivir un ano e medio especialmente difícil por mor da pandemia, tendo que parar a súa actividade”.  

Os acordos subscribíronse coas seguintes entidades:

  • U.D. Carral: 8.000 euros
  • Club Patinaxe Alquimia de Carral: 1.300 euros
  • Club Ximnasia Rítmica Carral: 1.000 euros
  • Centro Ecuestre Finca Abrigosa: 1.000 euros
  • Club Deportivo Ares Racing: 1.000 euros
  • Club BTT Carral: 900 euros
  • Club de Tiro Olímpico: 600 euros
  • Custodia do Territorio de Carral “Brexa”: 1.000 euros
  • Asociación cultural “Cultura Aberta”: 600 euros
  • Asociación cultural “Aires de Carral: 1.000 euros

As contías servirán para sufragar, entre outros, os seguintes gastos: desenvolvemento de actividades e posta en marcha de escolas deportivas, organización e participación en torneos e competicións, adquisición de material, transporte, licencias federativas, realización de charlas, organización de actividades culturais e doutro tipo, etc. 

/by

INFORMACIÓN DE INTERESE SOBRE O OBRADOIRO DE EMPREGO “RESERVA DE BIOSFERA: EMPREGO VERDE”

O Concello de Carral publica toda a información relativa sobre o obradoiro de emprego “Reserva de Biosfera: Emprego verde”.

Resultado definitivo dos procesos de selección do persoal de Reserva de Biosfera: Emprego verde

Resultados definitivos dos procesos de selección das prazas de persoal directivo, docente e administrativo de apoio
Descarga

Resultados definitivos proceso selectivos prazas alumnado de Reserva de Biosfera: Emprego verde

Resultados definitivos dos procesos de selección correspondentes ás prazas do alumnado da especialidade “Actividades auxiliares en conservación e mellora de montes” Descarga
Resultados definitivos dos procesos de selección correspondentes ás prazas de alumnado-traballador da especialidade “Instalación e mantemento de xardíns e zonas verdes”Descarga
Puntuación entrevistas alumnado nivel 1Descarga
Puntuación entrevistas alumnado nivel 2Descarga
Resultados selección alumnado nivel 1Descarga
Resultados selección alumnado nivel 2Descarga
/by

ANDAINA POLO PARQUE EÓLICO DAS ENCROBAS

Gustaríavos coñecer o parque eólico das Encrobas? Este domingo, 17 de outubro ás 10.30 horas no Marco das Eiras realizarase unha andaina de 2 km pasando polos distintos puntos onde está prevista a instalación de aeroxeneradores.

A actividade está organizada pola Asociación Salvemos o Val de Barcia e o Monte Xalo en colaboración co Concello de Carral.

/by

O CONCELLO PROGRAMA OITO FUNCIÓNS PARA VECIÑOS DE TODAS AS IDADES A TRAVÉS DO SEU CICLO DE TEATRO DE OUTONO

O Concello viviu hoxe, luns 11 de outubro, o pistoletazo de saída do Ciclo de Teatro de Outono, que se celebrará entre o 16 de outubro e o 11 de decembro. A Casa da Cultura acolleu o acto de presentación desta edición, que incluirá a representación de oito obras de teatro a cargo de varias compañías de renome. Na inauguración tomaron parte o alcalde, Javier Gestal, o deputado de Cultura, Xurxo Couto, membros do goberno local e representantes das agrupacións que se subirán ao escenario ao longo do programa.  

Durante a súa intervención, o rexedor incidiu en que a organización deste ciclo supón “seguir apostando pola promoción da cultura, un compromiso que este goberno mantivo mesmo tras a irrupción da pandemia da covid-19”.

Este ano, o programa incluirá sete funcións dirixidas a público adulto e unha ao familiar. Gloria nacional, de Teatro do Noroeste, inaugurará o calendario o sábado, 16 de outubro. A obra conta a historia de Uxío Rodas, un escultor e pintor considerado como unha auténtica “gloria nacional” polo seu traballo. Porén, despois de que lle encarguen unha escultura monumental, o autor entrará nunha fonda crise creativa.

Crónica dunha heterosexual insatisfeita a cargo de Verdeveras (23 de outubro) tomará o relevo convidando ás persoas asistentes a reflexionar sobre as normas e parámetros preestablecidos que facemos propios sen sequera pensar se hai outra opción diferente. Unha semana despois (30 de outubro), Ainé chegará ao municipio con Coleccionistas. Trátase dunha comedia didáctica, unha clase de arte chea de humor na que o público asistente terá un papel do máis participativo.

Novembro arrincará con Dúas pedras no camiño da man de Mofa e Befa (6 de novembro). En palabras da propia compañía, é un espectáculo antolóxico de pezas míticas que se manteñen na memoria do público. O título xoga coas alusións á música popular a á súa filosofía, que nos lembra que unha pedra no camiño pode ser algo que nos ensine e nos transforme.

De seguido, o 20 de novembro, Ibuprofeno Teatro subirá á escena para representar O mel non caduca, protagonizada por dous científicos/apicultores que tratan de crear sinteticamente unha abella a partir do último tarro de mel que se conserva na historia.

Contraproducións terá a ocasión de conquistar á veciñanza carralesa o 27 de novembro con A compañeira de piso, na que se tratan os temas de idade, muller e identidade dun xeito fresco e divertido.

A lúa vai encuberta chegará o 4 de decembro a Carral a cargo de Incendiaria e A Quinta do Cuadrante. Este espectáculo relata a historia da realidade de Galicia e da loita incesante por conformar unha identidade propia, enfrontándose, para iso, ao seu pasado recente e ás súas contradicións. A obra acaba explicando as razóns de porque Galicia ten os rasgos políticos, sociais e económicos que a caracterizan. Este traballo recibiu o segundo premio do certame Manuel María de proxectos teatrais que convoca a Casa Museo Manuel María.

Patapatum de Elefante Elegante pechará, o 11 de decembro, a nova edición do Ciclo de Teatro de Outono. Trátase dunha obra visual dirixida ao público infantil e familiar a partir dos 4 anos. Patapatum é unha reflexión sobre o tempo, a crianza e sobre como enchemos os baleiros das nosas ausencias.

Agás no caso de Coleccionistas, todos os espectáculos levaranse a cabo a través da Rede Cultural da Deputación da Coruña. En todos os casos, as propostas levaranse a cabo seguindo un estrito protocolo de seguridade pola covid-19. O aforo será limitado, polo que será preciso reservar os convites antes do venres previo á función. Para facelo, as persoas interesadas deberán chamar ao teléfono 981 67 25 80.

/by

MERCA CARRAL, O NOVO ESCAPARATE CO QUE O CONCELLO BUSCA APOIAR E DAR VISIBILIDADE AOS NEGOCIOS NA CRISE DA COVID-19

Baixo o lema “O negocio que precises está en Carral”, o Concello puxo en marcha a plataforma Merca Carral, un novo espazo web co que o goberno local busca apoiar e dar visibilidade aos negocios afincados no municipio, sobre todo na situación sanitaria actual. Así, tal e como indica o equipo de goberno “a irrupción da pandemia provocou o peche de moitos establecementos e trouxo consigo enormes perdas para os responsables dos locais. Con este novo espazo web o que buscamos, precisamente, é promover as compras e o consumo no tecido económico de Carral”.

Ata o de agora, son xa preto de medio centenar as compañías que forman parte deste directorio. Esta relación inclúe restaurantes e bares, salóns de peiteado, axencias de viaxes, panadarías e tendas de alimentación, dentistas, zapaterías e tendas de roupa, etc.

As firmas e persoas autónomas que desexen incluír a súa ficha en Merca Carral poderán rexistrarse de xeito gratuíto na propia web https://mercacarral.com/. Unha vez dentro, terán que encher o formulario web indicando o seu nome e o da empresa, os datos de contacto, o tipo de compañía e o enderezo. Así mesmo, terán que incluír o logo, imaxe e unha descrición do negocio.

/by

AS NENAS E NENOS DE CARRAL EN HUMOR AMARELO!

Este pasado mércores a OMIX (oficina municipal de información xuvenil), levou a vinte nenas e nenos a Humor Amarelo.

Ao largo de case dúas horas puidemos realizar as diferentes probas que hai nestas instalación en Feáns. Organizados por equipos as/os participantes fixeron combates de sumo, de paos de espuma, ou carreiras de dragóns. Tamén pasaron por diferentes percorridos de obstáculos onde mostraron a sua axilidade e destreza, facendo que pasásemos unha tarde moi entretida e divertida, e que, vendo a cara das nenas e nenos e o regreso en autobús a Carral, parece que quedaron moi satisfeitas /os.

Agradecervos o voso, coma sempre, impecable comportamento e esperamos que participedes e nos acompañedes nas vindeiras actividades que organicemos desde o departamento de xuventude! Arigatōgozaimashita!

/by

CARRAL INSTARÁ Á XUNTA DE GALICIA A QUE DECLARE A NULIDADE DO PARQUE EÓLICO DAS ENCROBAS

  • A corporación municipal aprobou, por unanimidade dos votos, a moción presentada por Alternativa dos Veciños sobre esta construción

O Concello de Carral instará á Xunta de Galicia a declarar a nulidade do procedemento e o arquivo do expediente para a construción do parque eólico das Encrobas. Así se acordou onte durante o pleno ordinario, no que se aprobou esta moción presentada por Alternativa dos Veciños. O documento, ao que se sumou o PSOE, foi aprobado por unanimidade dos membros da corporación municipal. Entre os motivos, a moción reflicte as
deficiencias deste proxecto, así como as consecuencias que o parque eólico terá a nivel social e ambiental.

Como se explicou no pleno, este documento reflicte as demandas e solicitudes trasladadas tanto polos propios veciños e veciñas como polas diferentes asociacións do municipio como Brexa Custodia do Territorio e a plataforma Salvemos o Val de Barcia e O Monte Xalo.

Por unha banda, a moción indica que algúns dos autogeneradores do parque eólico de Meirama están máis próximos aos das Encrobas que entre si, compartindo, ademais, a rede de transporte, distribución e subestación situada en Meirama. Ambas as construcións suman, en total, unha potencia de 69 MW. En definitiva, segundo reflicte o documento, debería ter consideración como un único parque eólico, tendo que pasar a súa competencia á Área de Industria e Enerxía da Delegación do Goberno de Galicia en lugar da a Xefatura Territorial da Coruña da Vicepresidencia Segunda e Consellería de Economía, Empresa e Innovación.

Pola outra, o proxecto baséase nas áreas de desenvolvemento eólico definidas no Plan Sectorial Eólico de Galicia de 2007, que foi aprobado sen avaliación ambiental e que está pendente de normativa de desenvolvemento. Segundo reflicte a moción, este documento podería considerarse obsoleto, sobre todo tendo en conta que as dimensións dos aeroxeradores aumentaron considerablemente e que non se comprobou se a distancia de 500 m a núcleos de poboación será suficiente para evitar as molestias aos veciños e veciñas.

Como expuxo en grupo durante o pleno, este proxecto terá efectos en canto á ocupación do chan, ruído, eliminación da vexetación, alteración das augas superficiais e subterráneas, paisaxe, fragmentación de hábitats, despoboamento rural, etc. A isto haberá que sumar, ademais, as afección sobre espazos naturais e elementos patrimoniais protexidos.

Durante o período de exposición pública, o Concello presentou dúas alegacións ao proxecto do parque eólico, unha delas en canto ao aspecto urbanístico e outra ao ambiental.

/by

BASES PARA A SELECCIÓN DO ALUMNADO-TRABALLADOR E DO PERSOAL DIRECTIVO, DOCENTE E ADMINISTRATIVO DO OBRADOIRO DUAL DE EMPREGO “RESERVA DE BIOSFERA: EMPREGO VERDE”

O Concello de Carral publica as bases para a selección do alumnado-traballador e do persoal directivo, docente e administrativo de apoio do obradoiro dual de emprego “Reserva de biosfera: emprego verde”.

BasesDescarga
/by

O CONCELLO REABRE AS PISTAS DE PÁDEL TRAS A EXECUCIÓN DE VARIAS OBRAS DE MELLORA NA INSTALACIÓN

O Concello de Carral reabriu, esta semana, as pistas de pádel municipais tras concluír as obras que se executaron nestas instalacións. Con estas intervencións, o goberno local reafirma a súa aposta pola mellora das infraestruturas deportivas do municipio.

O proxecto do Concello incluíu a realización dos seguintes traballos:  colocación de novas redes de protección fronte as condicións climatolóxicas adversas, disposición dunha porta de acceso lateral para o corredor entre pistas -ata o de agora, os usuarios e usuarias tiñan que cruzar polo medio da propia pista para saír-, pintado do corredor cun material antiescorregadizo e colocación de novas redes.

Estas intervencións contaron cun orzamento próximo aos 20.000 euros e supuxeron unha considerable mellora das instalacións, moi empregadas ao longo de todo o ano.


Un compromiso co deporte

A maiores destas actuacións, o Concello levará a cabo outras iniciativas para mellorar as instalacións deportivas, como a ampliación do Centro Deportivo, a reforma interior do polideportivo do Vicente Otero e a rehabilitación da pista deportiva exterior de Tabeaio. 

/by