PROCEDEMENTO DE INFORMACIÓN PÚBLICA DO PROXECTO DO PARQUE EÓLICO AS ENCROBAS

Concello de Carral

Sométese a información pública por prazo de 30 días a partir do seguinte ao de publicación do Acordo de Vicepresidencia segunda e Consellería de Economía , Empresa e Innovación do 30 de xullo de 2021 da Xefatura Territorial da Coruña polo que se somenten a información pública a solicitude de autorización administrativa previa a declaración de utilidade pública en concreto a necesidade de urxente ocupación que iso implica a autorización administrativa de construcción o estudo de impacto ambiental e o proxecto sectorial de incidencia supramunicipal ( proxecto de interés autonómico) do proxecto do parque eólico As Encrobas nos concellos de Cerceda, Carral e Ordes ( A Coruña) ( Expediente IN408A 2020/93) no DOGA nº158 do mércores 18 de agosto de 2021, que estará a disposición no seguinte enlace:

https://www.xunta.gal/dog/Publicados/2021/20210818/AnuncioG0596-300721-0003_es.html

A solicitude está relacionada coa instalación que se describe a seguir: Solicitante /promotor: Naturgy Renovables, S.L.U (CIF – B84160423) Domicilio: Avda Arteixo nº171, 15007 A Coruña Denominación do proxecto: Parque eólico As Encrobas Concellos afectados pola poligonal do parque eólico: Cerceda, Carral e Ordes ( A Coruña) Potencia que se vai instalar: 20 MW Número dos aeroxeradores que se van instalar: 4Ud. x 5MW de potencia unitaria Produción media neta estimada : 68.326 MWh/Ano

Horas netas anuais: equivalentes a potencia nominal 3.416 horas Orzamento execución material : 20.378.055,01 € Prazo de execución: 7 meses A documentación estará a disposición dos interesados nas dependencias da sección de enerxía desta Xefatura Territorial da Coruña, da Vicepresidencia 2ª e Consellería de Economía, Empresa e Innovación (rúa Vicente Ferrer, nº2, 2º Andar, 15071, A Coruña das 9:00 horas ás 14:00 horas, de luns a venres, con cita previa no correo electrónico, seccion.enerxia.coruna@xunta.es ou nos teléfonos 981.184983 e 981.284962) asi como nos concellos de Cerceda, Carral e Ordes ( A Coruña).

O estudo de impacto ambiental estará tamén disponible, durante o mesmo prazo na Xefatura das dependencias da Xefatura Territorial da Coruña da Consellería de Medio Ambiente, Territorio e Vivenda.

/by

O CONCELLO REFORZA A ÁREA DE EMPREGO E DESENVOLVEMENTO LOCAL COA INCORPORACIÓN DUN NOVO AXENTE

Concello de Carral

O Concello conta desde onte, luns 16 de agosto, cun novo axente de emprego e desenvolvemento local. Esta contratación realízase en réxime de persoal laboral temporal e parte dun convenio entre os Concellos de Carral, Oza-Cesuras e Coirós. Coa incorporación deste axente, o goberno local busca reforzar as áreas de emprego e promoción económica.
Este traballador acudirá Carral os luns e xoves e desempeñará entre outras, estas funcións: promoción do emprendemento, asesoramento na posta en marcha de proxectos de empresa, apoio na xestión empresarial, difusión das diferentes formas de financiamento e subvencións existentes, identificación no territorio de novas oportunidades de negocio e emprego e, ademais, promoción e implantación de políticas activas de traballo.
Este axente traballará no edificio social Toñito Espiñeira. Os veciños e veciñas que desexen acceder a este servizo poderán solicitalo a través do teléfono 981 67 00 02 ( Concello) ou do 981 61 35 20.

/by

PROBLEMAS NO TDT POLA INSTALACIÓN DE SERVIZOS 4G

Con motivo da nova instalación de servizos 4G poden producirse interferencias na sinal de recepción do TDT dos televisores en algúns fogares do municipio.

Se isto sucede, podes contactar e facer a túa reclamación no seguinte teléfono 900 83 39 99 ou a través da páxina web WWW.LLEGA800.ES. As posibles reparacións que precisen os televisores, serán gratuítas nos 6 primeiros meses.

Máis información no servizo de Medio Ambiente do Concello ou no teléfono 981 67 00 02.

/by

PATEANDO POLO CAMIÑO INGLÉS

O sábado, 30 participantes pateamos o tramo do camiño inglés que transcorre polo noso concello.

Realizamos un bonito percorrido por diferentes parroquias do noso concello durante case 4 horas que nos levou realizar o roteiro.

Foron máis de 12 km que nos levaron por lugares destacados do noso municipio como a área de descanso de A Lameira, ou polo albergue de peregrinos/as de Sergude, onde fixemos a correspondente parada para comer algo e tomar folgos.

Durante practicamente todo o roteiro contamos coa colaboración de protección civil de Carral, que nos axudou nos tramos máis complexos ou perigosos, xa que algunhas partes do percorrido, cruzaba vías con circulación de vehículos. Pero o realmente importante foi a satisfacción coa que os/as participantes e nos, os organizadores, rematamos esta actividade que sen dúbida nos encantou.

/by

PATEA CARRAL: CAMIÑO INGLÉS

A OMIX (oficina municipal de información xuvenil) organiza nesta ocasión un novo roteiro, concretamente unha parte do camiño inglés que transcorre polo noso concello. A actividade que se realizará o día 14 de agosto, sábado, comezará ás 9:30 h. e a saída será desde o campo da feira. O regreso está programado no mesmo lugar sobre as 14:00 h.

Organizada para maiores de 13 anos, para participar e imprescindible anotarse. Para elo, tes que enviar a ficha de inscricción e/ou autorización por correo electrónico a omix@carral.es ou por whatsapp ó 674.793.475.

Serán un total de 13 km, e a dificultade e baixa. Debes levar calzado axeitado, auga, algo de comer e unha viseira.

O prazo para anotarse remata o 11 de agosto.

/by
,

A PISCINA ACOLLE UNHA NOVA EDICIÓN DE MÚSICAS ÍNTIMAS

MJ Pérez e Lulavai serán as artistas que conforman o cartel da 7ª edición do ciclo Músicas Íntimas: concertos na piscina, que terá lugar na fin de semana do 31 de xullo e 1 de agosto.

MJ Pérez, que actuará o sábado en formato dúo, é unha das novas voces da música galega. Cantautora que iniciou a súa traxectoria no 2014 e que acumula máis de 100 concertos, 4 discos, o premio Xuventude Crea, ademais de ser finalista noutros certames. A música de MJ Pérez bebe da esencia da canción de autor, unha fusión de diversos estilos musicais co predominio do rock-pop ata o de agora, mais co seu novo disco emprende un cambio de rumbo no que os ritmos latinos e a música de raíz están máis presentes.  A palabra e a mensaxe dos temas cobra especial protagonismo xunto coa voz de MJ, cargada de personalidade.  O seu concerto en Carral servirá para presentar o seu novo disco “A luz prendida”.

O domingo toman o escenario o cuarteto Lulavai, una formación única no que a polifonía se xunta aos fermosos sons das arpas celtas nuns elaborados arranxos de temas tradicionais e de compositores galegos. Lorena Reinaldo, Paula Oanes, Josefa Fernández e Elena Paz formaron Lulavai no 2008, gravaron 3 discos  e acumulan concertos realizados por Galicia, o resto de España e Portugal. O seu concerto será un percorrido por temas propios, adaptacións da nosa música tradicional, con temas tranquilos e outros máis rítmicos, empregando as arpas celtas e outros instrumentos de percusión tradicional.

Para ambos os dous concertos as localidades son limitadas, polo que é necesario reservar convites na Casa da Cultura antes das 14:00 h. do venres chamando ao 981 672 580.

O ciclo Músicas Íntimas é o evento musical de referencia de Carral que cada ano chega no verán con propostas galegas de gran calidade e aceptación por parte do público.

No caso de meteoroloxía desfavorable, as actuacións trasladaranse á Casa da Cultura, dando acollida ás primeiras 25 reservas de entradas de cada concerto.

/by

VOLTAMOS Ó AQUAPARK!

Despois de ter que aprazar a actividade para hoxe e de que o ano pasado non poidemos organizar esta excursión, voltamos a Cerceda a pasar o día no Aquapark.
A pesar de que o día comezou algo nubrado, e do verán que estamos a ter, foi aparecendo o sol por momentos e quedou unha tarde xeitosa para que as nenas e nenos aproveitaran o dia.
A piscina de ondas, o jacuzzi, o Roaller Coaster ou o multipistas, foron algunhas das atraccións das que puideron gozar.

/by

ENGLISH SPORT CAMP – SOLICITUDES ADMITIDAS

Listados admitidos English Sport CampDescarga

Faise pública a listaxe das solicitudes admitidas para o ENGLISH SPORT CAMP que terá lugar entre o 19 de xullo e o 6 de agosto.

Para calquera consulta ou aclaración os interesados poden poñerse en contacto coa Casa da Cultura no 981.67.25.80 ou no mail casadacultura@carral.es.

/by

COÑECENDO O NOSO CONCELLO CON “PATEA CARRAL”

O sábado pasado un grupo de 20 persoas realizamos unha variante do roteiro mariñán PR-G 101, organizado pola OMIX.

Ás 9:30 horas desde o campo da feira comezamos esta andaina que nos levou toda a maña e que nos fixo pasar por lugares do noso municipio que moitas e moitos das/os participantes descoñecían.

Lugares tan característicos e representativos do noso concello coma San Pedro de Rubieiro, onde paramos para coller folgos e repoñer forzas tras a dura subida a esta capela, os muíños da Costa da Égoa, e tamén por varias parroquias como Herves, Barcia ou Quembre, onde puidemos ver varios pazos e fontes, patrimonio e historia de Carral, e acompañados por protección civil, que nos axudou en determinadas situación e sempre que o precisamos.

Foi un roteiro bastante duro, que nos levou mais de catro horas realizar pero que o final mereceu moito a pena, e coa sorte de que o tempo nos acompañou.

/by

ÉXITO DA EXPOSICIÓN “9 MESES, 9 CAUSAS”

O pasado martes rematou a exposición “9 meses, 9 causas”, que se organizou desde o CEIP Vicente Otero Valcarcel, e coa que colaborou o Concello de Carral, a través da OMIX (oficina municipal de información xuvenil).

Durante unha semana, entre o 15 e o 22 de xuño, preto de 250 persoas pasaron polo Local Interxeracional para ver os traballos que as rapazas e rapaces de Carral fixeron para esta exposición sobre o medio ambiente.

Os micro plásticos, as abellas, a contaminación do mar ou incluso os xabóns artesanais, foron algunhas das temáticas que o alumnado do CEIP Vicente Otero Valcarcel tratou nesta exposición que se puido ver no local e que esperamos que, pola gran acollida que tivo, póidase repetir no vindeiro curso escolar.

/by